اخيرا إستلمت الفيكترا ( هتجنن والله )

[creative_art]

الســـــــــــلام عليكمـــــ ورحمــة الله وبركـــاتــهـ ..

بعد الدباجه وشوية الكلام الى فى الاول دول ..

انا استلمت الفيكترا b اول امبارح ولله الحمد الف حمد والف شكر ليك يارب ..

موديل 97 عربيه ولله الحمد مفيش فى حالتها فى مصر كلها وتحدي قده الحمدلله ..

مانيوال 1600

اول مالك .. صاحبها توفي سنة 2005 وهي مركونه محدش بيستخدمها عشان مانيوال ..

وانا شاريها من ورثته

عداد عامل 120 اغلبه سفر وكل فتفوته فى التابلوه وفى العربيه بريحة ولمعان المصنع

والمكنه بتاعتها بتسمع فركتها ونتا عالتالت الحمدلله ..

من الاخر عربيه لقطه وطالعالى مجامله من صحاب العربيه مش اكتر ..

والمهم إن دا طبعا بعد مجهودتاكو معايا ... ومن كتر مانتو حببتوني فى العربيه بصراحه قلت مقداميش غير أوبل ..

وبصراحه بصراحه ..

بعد تجربة كيا سيراتو وشوما ورينو فلوانس و اوبترا ولانسر ..

أحب بكل فخر اقول ..

الى مــــــركــــــبــــــش أوبـــــــل مركــــــبش عربـــــــيـــه ..


بأمانه والله ..

ثبات .. وهتكلم عالنقطه دي كتير لانى بجري .. وللأسف الشديد جري غبي ولو نمله سخنتني بطلع اجري معاها ...

العربيه بحس انها مغناطيس عالارض .. طوبه .. لازقه فى الأرض ماشاء الله بشكل عالى جدا جدا ميتوقعوش اى حد ... لدرجة ابقي داخل ملف عندنا عالبحر باخد غرزه فى الملف وباخده عالديق .. وكل ده على 160 ... والعربيه ثابته فى مكانها مبتتهزش سنتيمتر واحد ولا بتيجي شمال ويمين ولا الكلام الى كان بيحصل فينا زمان ده ..

تصنيع العربيه ... انا سألت عالموضوع ده قالولي هو الالمانى كده .. الابواب تقيله جدا وصناعتها تحس انها فوق المحترمه .... خامات التابلوه تقيله جدا لدرجة زرار الزجاج اليمين من كتر ماحدش بيستخدمه تقيل جدا وتقريبا محتاج هركل يدوس عليه عشان الازاز ينزل .. الابواب مش بتتقفل بسهوله لازم ترزع الباب .. العضم رهيب ماشاء الله ... الفروق بين الصاج وبعضه مظبوطه بالمسطره والنسب متساويه وشغل هندسي عالي جدا ..

بالنسبه للعيوب ..

الصالون ضيق نسبيا بالنسبه للعربيه الى كانت معايا " كيا شوما " ..

الدبرياج تقيل فحت .. رجلي لحد الأن بتوجعني منه .. وكذلك الاكسلاتير تقيل جدا جدا


شكل ال 97 مش ظريف فى نظري .. مش زي ال 2000 فيه كساحات وعتب شكلهم شيك جدا ..

الموتور ال 1 كامه مش قادر احكم عليه لحد دلوقتى بس هوا ضعيف نسبيا عالعربيه .. ولما بيشد مع كوري بيتبهدل اوى .. وكمان صوته عالى شوية .. انا كان نفسي اركب 2 كامه بس للأسف الحاله تحكم انك تشتري دى

..

سوألي بقه ..

كنت عايز اعرف سعر الاكصدام الامامى استيراد وجديد بكام بتاع ال 97 وبتاع ال 2000 ... وهل ينفع يركب اكصدام ال 2000 علي ال 97

[alaamousa]

مبارك عليك وربنا يكرمك ويديلك خيرها ويكفيك شرها

[فادى محمد]

ينفع كله يركب مكان بعضه بس اللي عندك اللي فيه الرموش السودا اشيك دي وجهات نظر
الاكصدام الخلفي 500ج
الامامي750ج -بالشبوره1000ج

[Menna Hassan]

ربنا يباركلك فيها وفعلا معلومات حلوة اوى ومفيدة..

[S O P H O S]

الف مبروك يا باشا ..

[akmm]

الف مبروك ويديك خيرها ويكفيك شرها .

[creative_art]

HellBOY

الف شكر ياحبي ..

نسيت اسأل عن مشكله تانيه ياجماعه ....
أول حاجه لمبة ABS بتنور وساعات تطفي .. الفرامل شغاله معايا كويس وال ABS حلو ومفيش عجله بتكلبش .. بس ايه اللمبه دى .. وغالبا بتكون المشكله فين بالظبط ...

--

تانى حاجه كنت عايز اسأل عن الحراره ..

دلوقتى انا معدل الحراره عندى كالتالي ... 90 لو جوه البلد زحمه ... 95 لو التكييف مفتوح ... 98 لو الجو حر اوى والدنيا واقفه ..

المشكله بقه .. لما احرق عالغيارات والتكييف مفتوح ... واعمل Overload عالموتور مع التكييف بلاقيها تعدى ال100 بحاجه بسيطه ..

هل دا طبيعي ؟؟؟؟ انا خوفي كله من الحراره الزياده دي ممكن تضرب جوان او صبابات وده مش كويس ..

[cool_man]

انا لسه جايب اكصدام للعربيه جديد ايطالي عامل بعد الفصال 320 من 350 وده بتاع موديل العربيه اللي من غير فوجات
كنت هجيب استيراد ووصلت لسعر 550 وده سعر جميل
بتاع ال2000 يركب عليها عادي وال2002 كمان
الأحسن تجيب واحد ايطالي موديل 2000 اللي بفوانيس هتلاقيه ب450 جنيه وخامة الايطالي كويسه ومطبع تمام علي وش العربيه الاستيراد غالي والاتنين فالاخر اكصدامات وبتتكسر لا قدر الله :)

بالنسبه للسخونه لما بتعدي ال95 مش بتهدي والمراوح بتشتغل علي العالي ولا ايه ؟؟

انت ظبط الميه بتاعت العربيه واغسل الموتور ودورة المياه لان علي كلامك العربيه مركونه من فتره وهتلاقيها ظبطت معاك ان شاء الله

[zrzr1]

الف مبروك يا باشا وربنا يديك خيرها ويكفيك شرها, بالنسبه للحراره فكده عاليه شويه لازم تشيك علي دوره التبريد وتشوف الافلاس تغيرها لو فيها مشكله ولو تعرف تغير غطا القربه يبقي تمام وتشيك علي الثرموستات اللي بيشغل درجتين المروحه

[creative_art]

الله يفتح عليك :)

انا والله بقيت محتار اظبط ايه فى العربيه دى .. كل حاجه فيها فابريكه الحمدلله .. ولسه مرشوشه قريب ومفيهاش خدش واللون ابيض يعنى اجمل الوان الفيكترا ..

وعربيه تفتح النفس والله ... بس كل ماشوفها من قدام اتنكد

وش العربيه بايظ تماما .. الاكصدام وديته لخالد بتاع الفبر فى الازاريطه ، قالى لا هات واحد جديد ..

وخالد دا معروف انه سياحى .. يعنى شماط فى اسعاره وكل العربيات الى واقفه عنده مرسيدس و BMW

نرفذني ربنا يسامحه :-( ... مفيش حاجه اسمها مستحيل فى الفبر ... الفايبر شغلانة دماغ يعني يخلق الإكصدام من اول وجديد ...

لحد دلوقتى بدور على حد بتاع فبر يكون محترم محـــــــــتـــــــــرم محـــــتــرم .. 3 مرات محترم ... ويكون عايز يشتغل وياكل عيش ..

يادوب هظبط الوش الى قدام .... وممكن اخليه يفتحلي فتحتين فوجات لو ينفع ..


--

بس برضه المشكله متحلتش .. انا بقف قدام العربيه .. من حلاوتها ببقي محتار اظبط فيها ايه ..

يعنى مثلا قول جنوط 17 ..

--

لالا نخليها فوانيس لينسات قدام

--

اقولك .. نخليه ديفيل وفلتر سبور ابيكس ولا K&N محترم بال Full Intake بتاعه ......

و بعدين بقة انا تعبت ..


--

الحاجه الأكيد الى لازم هعملها اليومين الجايين بعد ماظبط الاكصدام ..

هعمل ستيكر سقف كاربون ... وهعمل الجرايد والرموش بتاعت الإكصدامات وتانك البنزين بومبينج ستيكر .. او زي مابيسموه الصنايعيه ستيكر العاب ..


دا غير انى فيمت الفوانيس الى ورا وعملت 2 ستاره خلفيه + فاميه سوبر دارك الازاز الى ورا + 2 فاميه امامى لايت دارك درجه خفيفه جدا عشان المرايات وعشان متعملش فرق لون مع الستاير الى محطوطه ورا ....


===================


المهم يعنى بعد الجدال والحديث والصداع الطويل الى انا صدعتكو بيه ده :)

عايز رأيكو فى الى قولته ... وازاى العربيه دي بالذات تتظبط .. اللون ابيض مايل على لؤلؤي .. او Pearly White

[alnmr79]

الف مبروك يا باشا دائما اللى جرب العربية غير اللى مركبهاش وساقها.
عربيتك محتاجة شوية تظبيطات بس وهتبقى كولو تمام.
1-تغيير طقم دبرياج المانى علشان اللى عندك تعبان ودة بيبان من تقل الدبرياج على رجللك وفى الطلعة.اوعى تركب الكورى بتاع النوبيرا مش هيكمل معاك شهرين .
2-تغيير مياة الريداتير وتنظيفة ومياه خضراء والحرارة هتظبط على 80 و85 .
3- الايه بى اس محتاج كشف اسكنر لو طلع الحساس هتنضف الفيش بدبليو دى 40 وتجرب لو طلع فى حساس بايظ بيعمل استعمال 50 الى 70 جنيه مش حكاية يعنى.
4- اكشف على السيو ر ورومان البلى بتاع العربية (طرمبات وعجل)ودة هينعم صوت العربية جدا ومش هتسمع صوت العربية على اى سرعة.
وخف السرعة شوية حرام عليك ال160 على الكورنيش انتى مبتشوفش الحوادث اد ايه على البحر من الناس اللى بتعدى فاجاة.ربنا يسترها معانا.

[alnmr79]

خد اللينك دة وهو هيجيبلك احلى تظبيطات للفيكترا شوف اللى تعجبك واعمل برينت واشتغل عليها بس كل مايبقى شغل هادى وبتاع الفبريكة بيعلى العربية والعكس صحيح شغل استيكارات والحاجات البلدى دى بتنزل العربية الارض.
يعنى ممكن تجيب الكراسى الجلد الطبيعى بتاعة السى دى اكس بمكن الكهرباء بتاعة الكراسى.
فتحة السقف بتاعة السى دى اكس الكهرباء.-جنوط 16 اصلى بتاعة الاوبل_____اسبويلر اصلى زى اللى فى الصور.
دى حاجات غالية بس تمانها فيها وبتعلى العربية.
شكلك كدة هتحطها فى دماغك وهتخليها احلى عربية فى مصر ..انا بسخنك هههههههههههههههههه
Vectra (B) - Vectra B Tuning - Tuning Cars

[الع العمدة مدة]

الســـــــــــلام عليكمـــــ ورحمــة الله وبركـــاتــهـ ..

بعد الدباجه وشوية الكلام الى فى الاول دول ..

انا استلمت الفيكترا b اول امبارح ولله الحمد الف حمد والف شكر ليك يارب ..

موديل 97 عربيه ولله الحمد مفيش فى حالتها فى مصر كلها وتحدي قده الحمدلله ..

مانيوال 1600

اول مالك .. صاحبها توفي سنة 2005 وهي مركونه محدش بيستخدمها عشان مانيوال ..

وانا شاريها من ورثته

عداد عامل 120 اغلبه سفر وكل فتفوته فى التابلوه وفى العربيه بريحة ولمعان المصنع

والمكنه بتاعتها بتسمع فركتها ونتا عالتالت الحمدلله ..

من الاخر عربيه لقطه وطالعالى مجامله من صحاب العربيه مش اكتر ..

والمهم إن دا طبعا بعد مجهودتاكو معايا ... ومن كتر مانتو حببتوني فى العربيه بصراحه قلت مقداميش غير أوبل ..

وبصراحه بصراحه ..

بعد تجربة كيا سيراتو وشوما ورينو فلوانس و اوبترا ولانسر ..

أحب بكل فخر اقول ..

الى مــــــركــــــبــــــش أوبـــــــل مركــــــبش عربـــــــيـــه ..


بأمانه والله ..

ثبات .. وهتكلم عالنقطه دي كتير لانى بجري .. وللأسف الشديد جري غبي ولو نمله سخنتني بطلع اجري معاها ...

العربيه بحس انها مغناطيس عالارض .. طوبه .. لازقه فى الأرض ماشاء الله بشكل عالى جدا جدا ميتوقعوش اى حد ... لدرجة ابقي داخل ملف عندنا عالبحر باخد غرزه فى الملف وباخده عالديق .. وكل ده على 160 ... والعربيه ثابته فى مكانها مبتتهزش سنتيمتر واحد ولا بتيجي شمال ويمين ولا الكلام الى كان بيحصل فينا زمان ده ..

تصنيع العربيه ... انا سألت عالموضوع ده قالولي هو الالمانى كده .. الابواب تقيله جدا وصناعتها تحس انها فوق المحترمه .... خامات التابلوه تقيله جدا لدرجة زرار الزجاج اليمين من كتر ماحدش بيستخدمه تقيل جدا وتقريبا محتاج هركل يدوس عليه عشان الازاز ينزل .. الابواب مش بتتقفل بسهوله لازم ترزع الباب .. العضم رهيب ماشاء الله ... الفروق بين الصاج وبعضه مظبوطه بالمسطره والنسب متساويه وشغل هندسي عالي جدا ..

بالنسبه للعيوب ..

الصالون ضيق نسبيا بالنسبه للعربيه الى كانت معايا " كيا شوما " ..

الدبرياج تقيل فحت .. رجلي لحد الأن بتوجعني منه .. وكذلك الاكسلاتير تقيل جدا جدا


شكل ال 97 مش ظريف فى نظري .. مش زي ال 2000 فيه كساحات وعتب شكلهم شيك جدا ..

الموتور ال 1 كامه مش قادر احكم عليه لحد دلوقتى بس هوا ضعيف نسبيا عالعربيه .. ولما بيشد مع كوري بيتبهدل اوى .. وكمان صوته عالى شوية .. انا كان نفسي اركب 2 كامه بس للأسف الحاله تحكم انك تشتري دى

..

سوألي بقه ..

كنت عايز اعرف سعر الاكصدام الامامى استيراد وجديد بكام بتاع ال 97 وبتاع ال 2000 ... وهل ينفع يركب اكصدام ال 2000 علي ال 97

انا اتحداك بعربية فيكترا 95 في سنة 2011 ماشية 60 الف كيلو بدهان المصنع طبعا والكنبة الي ورا لسا عليها اكياس الشركة لما كانت جديدة ايه رايك؟ متغيرش فيها الا سيور و فحمات فرامل بس من الركنة والاستبن منزلش الارض

[wama00]

الف مبروك يا باشا

[tananybasha]

الف مبروك
اعمل صيانه شامله
سيور
بوجيهات
زيوت
فلاتر
تنضيف دورة مية
و بعدين جرب العربية