مية تحت الكرسي اللي جنب السواق

[MaaM]

السلام عليكم
بعد اما اشتريت العربية وشغال تكييف عادي وعايش حياتي ، لاقيت في مرة وانا بنضف الدواسة بتاعة الكرسي اللي جنب السواق تحتها مية فلما حطيت ايدي على الموكيت لاقيته مبلول ولما شيلته لاقيت الأرض عايمة مية كتيير جدا والسفنجة اللي تحت الموكت شاربة مية لما قالت يابس
ولاد الحلال قالول تلاقي خرطوم الفايض بتاع التكييف مسدود وأي كهربائي يعمله
بالفعل روحت لكهربائي شاطر جدا ومعروف في المنقطة عندنا وسلك الخرطوم وغسلي السربنتينة وحطلي برفان ودلعني !
ولما كنت واقف وراه وهو بيشتغل ولاقيته بيلزق باب التكييف اللي تحت درج التابلوه بالسليكون ، وسألته ليه ، فقالي انه بيعمل معايا الصح !

بعدها باسبوع او اكتر شوية المية رجعت تاني روحتله ، فقالي انه كدا هايطلع الكويل برا وينضفه ويشحن التكييف والحوار هايكلف 350 جنيه وانه بيعمل معايا أحلى واجب ، وسيبلي العربية 3 ساعات عشان اشتغل براحتي

روحت لواحد بتاع تكييف (تكييف بس) وقولتله عندي تسريب مية من التكييف ، قالي عالطول مباشرة انت مش حاطط فيلتر تكييف ، ولما فتح بالفعل لاقاه مش موجود وجابلي واحد من عنده وركبه و سد بوابة الهوا (لأنها كانت مفتوحة عالطول) والدنيا بقت تمام والمية الحمد لله مابقتش ترجع زي الأول ، مجرد تعريقة بس لكن مش بحر

الخلاصة
- الصنايعي الشاطر طلع نصاب محترف وكان مضايقه وقفتي وراه
- لما فتح باب التكييف مالاقش الفلتر وأصر انه مايقوليش عليه عشان تبقى فيه زيارة تانية ويظبطني براحته
- الموضوع اتحل من واحد بتاع تكييف بـ 150 جنيه بدلا من 350 جنيه
- من ساعتها اتعلمت لما حاجة تبوظ اروح للمتخصص بتاعها مش مجرد واحد بتاع كله
خليك رخم وغلس (بالنسبة للصنايعية) واقف ورا الصنايعي حتى ان كان شاطر وأمين وشوف بيعمل ايه عشان تتعلم

[wama00]

للاسف معظم الصنايعية ما عندهمش ضمير او مش فاهم وبيعمد على طريقة ال try and error

[Khaled Lanos]

للأسف أغلب الصنايعية في مصر نصابين ومعندهومش ضمير.

بس الحمد لله ان المشكلة اتحلت بدل ما كنت هتفتح على نفسك فتحة كبيرة.

[احمد فهمى]

مفيش ضمير للأسف عند معظم الناس مش الصنايعيه بس

[M.Osama]

ميه تحت كرسي السواق = خرطوم الفايظ
ميه تحت الكرسي الي جنب السواق = الفلتر او الكويل

[Dr.M_baz]

الحمد لله أن المشكله اتحلت من غير ما يطلع الكويل ده فكه لوحده مشكله.