مشاكلى مع السيارة اوبل فيكترا

[ahmedsayed77]

السلام عليكم و رحمة الله و بركاته
احب اعرفكم الاول ان سيارتى اوبل فيكترا اوتوماتيك 2000 سى سى موديل 1995 طبعا شاريها استعمال من حوالى سنتين و نص
عندى كذا استفسار لعباقرة الاوبل و برجاء الافادة و احب اسمع اراء فادى و طنانى باشا و اسلام البنا
أولا :
طبعا مش هنتكلم كتير عن موضوع الحرارة و يكفى شرحكم المستفيض فى هذا الموضوع و ايضاحاتكم الممتازة و انا فى سبيلى لتنفيذ اراءكم و لكن استفسارى هو عن شئ فى دورة التبريد
انا راكب عندى ترموستات المروحة 2 طرف و تقريبا مش شايف سلك ملغى و المروحة اللى راكبة مروحة بوش قوية جدا و هى 2 طرف برضه و كنت عاوز انفذ اراءكم و اركب الترموستات ال 3 طرف
ازاى ممكن يركب الترموستات و انا مش شايف انه فى طرف كهرباء ثالث فى العربية يركب للترموستات ابو 3 رجل و نفترض انه ركب المروحة طرفين و انا عاوز اراءكم قبل ما اروح للكهربائى علشان ما يخترعليش و يبوظلى حاجة
ثانيا :
انا عندى مشكلة فى موضوع فيشة حساس الكرنك لأنها كانت ملزوقة بشريط لحام و انا كنت شاكك فيها ففكيت شريط اللحام و لقيت ان جميع اطرافها مقطوعة و موصولة بين الفيشة و السلك و ده بالنسبة للفيشة اللى جاية من المسطرة السودا و انا بصراحة عاوز اظبط العربية فكنت باسأل هل القطعة دى بتتغير ( السلك بفيشته ) و لا اسيبها على كده مع العلم انها مش عاملة مشكلة بس بتخلينى علطول شاكك فى اداء العربية و انا نفسى اغيرها فعلا و لو بتتغير طب اجيبها منين
ثالثا :
العربية كانت بتسك على السلانسيه من غير مشى و تروح مبطلة لوحدها شكيت فى البنزين و غيرت تفويله كاملة ببنزين 92 و حطيت عليه منظف رشاشات تحسبا انه يكون العيب منها
المهم طلع العيب من الايدل كنترول و اكتشف العيب الميكانيكى اللى باتعامل معاه لأنه طلع بيعلق فكه و نظفه و شغال زى الفل بس باسأل هوه ليه اصلا علق و لو كده هل دى تبقى بداية نهاية عمره الافتراضى و لو كده اجيبه منين جديد ولا استيراد و سعره كام
رابعا :
العربية على السلانسيه فيها رجه و هزة خفيفة لكن مع تعشيق العربية على وضع d العربية بتبقى هتتنطط من كتر الاهتزاز و غيرت قاعدة الموتور زى ما بعض الاعضاء افادوا و لسه زى ما هى رحت غيرت قاعدة الفتيس الامامية و لسه العيب زى ما هو و انا مش عارف اعالج العيب ده ازاى بصراحة من غير العيب ده العربية ممتازة
و لحد ما اعالج الحرارة و الاهتزاز الجامد و اشوف بقه التكييف اللى مش لاحق اصلحه من اعطال السيارة معايا ( الحرارة - الاهتزاز - نقصان المياه - ريحة البنزين فى العادم )
برجاء الافادة يا رجالة الاوبل

[احمد فهمى]

الحراره بسبب المروحه اللى متعدله ودورة التبريد ممكن تكون محتاجه تتنضف ونقص المياه يا جوان بينفس يا اما عندك خرطوم مع الحراره بيهرب مياه او غطا القربه عندك مش سليم
الاهتزاز قواعد المتور والفتيس تعبانين والجداد مضروبين
ريحة بنزين ده حرق نى عندك ممكن بسبب الماف عندك مش مظبوت والايدل كنترول بيتنضف باسبراى وبيشتغل تانى لو علق وهو نضيف يبقى يتغير

[ahmedsayed77]

مشكور الاستاذ احمد فهمى على الرد السريع ولكن
اذا كان الميكانيكى خاف يقرب من الماف مين هيظبطهولى و ريحة البنزين هتفضل معايا ولا ايه
و بالنسبة لدورة التبريد انا لسه هاشتغل فيها و بأسأل ازاى اقدر اشغل الترموستات ال3 رجل اذا كان اصلا مافيش طرف كهرباء تالت و انا اشتريت الترموستات ال3 طرف و اشتريت ترموستات الكوعة و اشتريت غطاء القربة و الميه الخضرا و الابرو و فاضل بس على التركيب و شغل بتاع الريدياتيرات بس انا عاوز اعرف ازاى المروحة هتشتغل بالترموستات ابو 3 رجول
و بالنسبة للاهتزاز اذا كان الموجود فى السوق كله مضروب اعمل ايه افضل كده و لا ايه الحل

[ahmedsayed77]

بانتظار افادة الاعضاء و المنسقين و الزوار و كل من ركب اوبل و عاوز يفيد زمايل الركوبة

[islambana]

حضرتك ماقولتش درجه الحراره بتبقي عندك كام في العداد
اولا اتأكد ان المروحتين اللي راكبين عندك دول مروحتين اوبل مش بتوع اي موديل تاني
ثانيا الفيشه بتاعت الترموستات هتلاقيها في اخر ضفيره المراوح الاصليه (الضفيره الواصله من علبه الكتاوت اللي جنب البطاريه تقريبا وماشيه تحت الصدر بتاع العربيه لغايه اخرالردياتير من الناحيه الشمال وانت واقف قدام الكبوت )لو مالقيتهاش يبقي الضفيره اللي عندك معموله عموله
وقدامك حل من الاتننين
1-انك تشتري الفيشه بتاعت الترموستات دي استيراد ومعرفش هتبقي بكام وحد هيرضي يفكها ولا لا
2-انك تجيب 3 ترامل صغيرين زي بتوع السماعات بتاعت العربيه وتركب كل واحده فيهم في سلك وتركبهم في الترموستات (خلي كهربائي يعملهوملك)

وبعد كده تبداء بالترتيب
1-تركب الترموستات التلاته طرف و بافتراض ان الضفيره اللي عندك دي مش الاصليه يبقي هتعمل الاتي(فيشه الترموستات علي شكل مثلث الطرفين بتوع قاعده المثلث توصلهم ببعض) والطرف التالت هيبقي لوحده كده بقي عندك اتنين طرف توصلهم بالاطراف اللي كانت واصله في الترموستات القديم
2- تفور الردياتير خالص زي ماقولتلك وتركبه ترموستات الكوعه وغطاء القربه
3-تجرب العربيه علي الوضع ده لو لقيت الحراره اتظبطت خاااااالص يبقي تغير لمياه اللي عندك وتحط المياه الخضراء وتنسي مشاكل الحراره خالص
4-لو العربيه ماتظبطتش يبقي كده عندك تسريب في احد الخراطيم او من جوان وش السلندر تعالجه الاول عشان العربيه تتظبط

ولو احتاجت حاجه كلمني وانا تحت أمرك في أي وقت

[islambana]

بالنسبه لقواعد الموتور مش قدامك غير انك تجيبهم استيراد من حد معرفه او تجيبهم من التوكيل
وبالنسبه للأيدل طالما اتنضف والعربيه اتظبطت مفيش داعي للقلق عموما الايدل عندك ارخص حاجه (ب50 جنيه استيراد) وبالنسبه للماف طناني ممكن يفيدك ويقولك تظبطه فين وازاي

[ahmedsayed77]

مشكور استاذ اسلام على معلوماتك المفيدة و ربنا يبارك فى حضرتك
الحرارة عندى 90 و بتطلع 95 و تنزل لحد 90 بس ايام الحر الشديد و لو خارج بالعربية فترة الظهر بتبقى 95 ثابتة بس انا فضلت انى اعمل الشغل المذكور هنا على الموقع علشان ارجع العربية لأصلها طبعا ترموستات الكوعة متشال و الترموستات طرفين و المروحة شغالة ديركت و كمان انا التكييف بايظ و مش شغال و الحرارة بتبقى 95 يعنى اخاف حتى لو التكييف شغال انى اشغله الحرارة تعلى اوى
طيب الايدل ده اللى عامل زى علبة الكانز هوه بيعلق و فرضا انه باظ و حضرتك قلت نجيبه استيراد ب 50 جنيه اجيبه منين انا باتعامل مع سوسو بتاع الوكالة بس حاجته بتبقى غالية اقدر اجيبه منين لو حضرتك تعرف
و بالنسبة لفيشة حساس الكرنك بتتغير و لا اسيبها كده وضعها و شكلها مش مريح و حاسس انه ممكن اى طرف من الاطراف الملزوقة ببعض ممكن يفك فى اى وقت و يسببلى مشكلة و انا ما اكنش عارف

[islambana]

فيشه حساس الكرنك خلي كهربائي نشيف يراجعلك عليها وماتشيلش همها تاني
الايدل اكتر واحد يفيدك تشتريه منين هو طناني باشا
بالنسبه للحراره فهي كده ماتعتبرش عاليه بالنسبه للموديل بتاعك
بس خلي بالك لازم تتأكد ان المروحتين شغالين عندك المروحه اللي وراء الردياتير والمروحه اللي قدامه الاتنين شغالين وياريت تشوفلي مكتوب كام علي الترموستات التلاته طرف عندك وتقولي

[tananybasha]

منور يا باشا
1. الحرارة مش عالية و لا قليله هى مش مظبوطه
2. المروحه 2 طرف عادى
3. المروحه اللى قدام شغاله مع اللى ورا و لا لأ
4. فيشة الكرنك يا تغيرها يا تقطعها و تعملها ترامل رفيعه معزوله يا تجيبها استيراد لو لاقيتها
5. نقص المية غطا او القربة او تنفيس فى حته و الأهم ضغط الدورة اخبارة ايه
6. الأهنزاز ممكن يكون العربية اصلاً مش مظبوطه و ده من الماف اغلب الأحيان

[ahmedsayed77]

الحرارة هاحلها ان شاء الله حسب موضوع الاستاذ اسلام البنا و بالنسبة للترموستات ال3 رجل انا اشتريته حسب التعليمات و لسه ما ركبتوش هوه 87 - 92 -97 -102
العربية فعلا على السلانسيه عاملة زى ما تكون متلتة و الموتور شغال و يترعش مرة واحدة و هكذا فى رعشة مرة واحدة زى التتليتة و البوجيهات جديدة 2 شمعة gm و الاسبراتير زى الفل و البوجيهات كلها بتحرق تقريبا هى مشكلة الماف
المروحة اللى قدام بتشتغل بزرار التكييف يعنى لما اشغل الكمبروسور الاقيها تشتغل مش مرتبطة بمروحة الريدياتير
بالنسبة لموضوع الميه لما هاشتغل فى دورة التبريد هاضغط الدورة و اسلك الريداتير و عامل حسابى اغير الخراطيم لو بتنفس و اغير غطاء القربة و انا كنت عملت موضوع الاستاذ فادى ( ملح الليمون و الخل ) و فعلا نزلت بلاوى بس من باب التأكد هاروح لبتاع الريدياتيرات يفك و يسلك لأن المواسير مبططة و خايف يكون فيها حاجة مسدودة لأنى حاسس ان ضغط طلمبة الميه مش قوى حتى لما بازود من بكرة الاكسراتير الميه ضعيفة و ربنا يسهل
فيشة الكرنك على وضعها ده افضل من موضوع الترامل الفكرة انى عاوز يبقى شكلها العام مظبوط و ما اشيلهاش هم او تتعطل فجأة فعلشان كده باسأل هى ممكن تتغير و تتفك ولا لأ
ياريت ازاى اعرف اظبط الماف اذا كان الميكانيكى خاف ييجى جنبه اصلا

[islambana]

علي فكره مشكله الحراره عندك تتلخص في ان المروحه اللي قدام مش شغاله المفروض المروحتين بيشتغلوا مع بعض لو شغلت المروحتين مع بعض الحراره هتتظبط معاك سواء علي الترموستات الاتنين رجل او التلاته رجل
موضوع الماف مافتيش فيه عشان الحمد لله معنديش منه (فضل ونعمه )
الأيدل هتلاقيه في الوكاله عند سوسو او الحرفيين في حدود 50 الي 60 غيره وريح دماغك

[ahmedsayed77]

كل عام و انتم بخير
و شكرا جدا للأستاذ اسلام البنا و اهتمامه بالرد فعلا راجل محترم محترم

[islambana]

وحضرتك بألف صحه وسلامه وده أقل حاجه الواحد يقدر يخدم بيها المنتدي ومتشكر جداااا علي كلامك وذوقك

[ayman hamdy]

كل عام وانتم طيبين جميعا

[Driver101]

فيشة الكرنك على وضعها ده افضل من موضوع الترامل الفكرة انى عاوز يبقى شكلها العام مظبوط و ما اشيلهاش هم او تتعطل فجأة فعلشان كده باسأل هى ممكن تتغير و تتفك ولا لأ
ياريت ازاى اعرف اظبط الماف اذا كان الميكانيكى خاف ييجى جنبه اصلا

نصيحة بلاش تحاول تظبط الماف بنفسك أو تسيب الميكانيكي يجرب، وطالما الميكانيكي خايف يجي جنبه يبقى بيفهم لأنه عارف إنها عملية محاولة وخطأ وممكن النتيجة تكون أسوء. علشان ترتاح من الماف، اكشف كمبيوتر وشوف إيه رسائل الأخطاء، أنا عندي الماف مش مظبوط بيخلي البوجيهات مهببة وكذلك في دخان أسود من العادم. إذا كانت مشكلتك في الماف، أمامك حل من اتنين تغييره أو تروح لمكان متخصص يظبطه.

وكل عام وأنت بخير.