استفسار عن فيكترا a

[reallistic]

كنت عاوز أعرف إيه نظام قطع غيار أوبل فيكترا a
قطع غيار موتور و ميكانيكا و عفشة و كهرباء
و بالنسبة لقطع الغيار إللي زي الحلية و الحاجات دي
إللي زي الباكيتات و الفيبر و النواكل و الكاوتشات هل متوفرة ؟؟؟

قدامي عربية بس ممكن تحتاج حتت فيبر من إللي بتبقى عند مداخل الأبواب و الحواف و كده
و كمان صاحبها بيقول أن ظاهر في الشاشة حرف مش فاكر F أو S
و بيقول أن المفروض فيها حاجة في الفيتيس (أوتوماتيك) بس العربية ماشية عادي
إيه النظام ؟؟؟

[jemy_tnt]

حرف s يا باشا و ده معناه فى مشكله فى الفتيس الاوتوماتك و لازم تتحط على الكبيوتر و نصيحه بلاش منها لانو اظن الفتيس الاوتوماتك بتاع الفكترا بيعمل 3000 ده فى حاله لو منفعش يتصلح و احتاج تغيير
اما قطع غيارها ميكانيكه و عفشه و الكهرباء موجوده انما الحليات و باقى الكلام معرفش الناس فى المنتدى هنا هتفيدك اكتر

[reallistic]

شكراً يا باشا لمشاركتك و الإفادة و هأشوف كده
لو هايكون فيه فرصه أخلّص فيها يبقى قبلها هأكشف عليها و أحطها على الكمبيوتر
و أشوف إيه نظامها و بعدها أحدد
منتظر مشاركات أكتر و كمان للإفادة عن توفر الحليات بتاعتها من عدمه

[reallistic]

العربية مركونة بقالها فترة و صاحبها معاه عربية تانية
هو ماكانش فاضي النهارده بس أنا رحت اتفرجت عليها من بره

من ناحية الدهان الخارجي حتت كتير فابريكة و الحتت إللي راشة شكلها نظافة
محتاجة ترش شنطة لأن الصاج باين عند حافة الشنطة ، لو هأخدها إحتمال أرشها بره كلها
و هي عاوزه مرايتين جنب و تظبيط اكصدام أمامي و فانوس إشارة و فانوس خلفي
يا ترى إيه أسعار الحاجات دي استيراد ؟
و هل فيه منها جديد ؟ و أسعارها ؟

[reallistic]

صاحب العربية بيقول أنها ماشية عادي و مافيش مشكلة ظاهرة في الفتيس
إنما قاللي فعلاً حرف s دي معناها أن فيه مشكلة في الفتيس
و هو صريح و قاللي أن فيه ناس قالتله طالما حرف s ظهر يبقى الفتيس عاوز يتغير
دلوقتي أنا هأتكلم معاه على أساس أن العربية هايتغيرلها فتيس ، أتكلم معاه في كام فلوس ؟؟؟
و هل ممكن تكون مشكلة الفتيس بسيطة و مايحتجش يتغير ولاّ أكيد لازم يتغير
يعني هل ممكن يكون سينسور أو حاجة زي كده بس ولاّ إيه ؟

و على فكرة هو قاللي أن العربية معاها 3 مرايات جنب بس شايلهم في الشنطة :)

أهم حاجة بقى ، لو كشفت على العربية و لاقيت مشكلة الفتيس بسيطة و اتحلت يبقى تمام
الأهم بقى لو لاقيت مشكلة الفتيس كبيرة و لازم يتغير أروح لمين ؟
صنايعي ولاّ مركز متخصص ؟ الأسامي و العناوين و يا سلام لو نمر تليفونات
و أجيب الفتيس من عند مين نمرة واحد ؟ و مين تانيين غيره ؟

عارف أني متعب و طولت عليكم بس ده من عشمي :)

[Driver101]

مش بالضرورة إن اللمبة تكون منورة إن الفتيس يكون محتاج يتغير، عن تجربة كانت منورة عندي والفتيس مخرف وكل اللي اتعمل هو تغيير فيوز في علبة الفيوزات. الفتيس الاستيراد الناس بتبدأ الكلام (إن شاء الله مش هتحتاجه) بـ 2500 جنيه، طبعا أنت مش هتشتري بالسعر ده ولو مش بتعرف تفاصل أنصحك يكون معاك حد بيعرف يفاصل. لو هتشتريه من القاهرة، أنصحك تبدأ تشوف في الحرفيين عند هاني العايدي.

الفوانيس والمرايات وكل الاكسسوارات في منها جديد واستيراد.

سعر المراية الكهرباء 150 جنيه تقريبا

الفانوس الأمامي: 150 جنيه، لو هتيغر الوش بس 25 جنيه

الفانوس الخلفي (ديبو) من 100 إلى 120 جنيه وفي صيني يعمل 75 في الحرفيين

بالنسبة لتجار الجديد، ممكن تسأل عن اللي أنت عايزه عند سرور وأمريكان ستار والاتنين جنب بعض في شارع شامبليون، وفي كمان الشيماء في التوفيقية.

نصيحة تعمل قائمة بكل الحاجات اللي هتغيرها وتعرف أسعارها قبل الشراء وكمان بص على التكييف، شغال ولا لا؟

وبالتوفيق إن شاء الله

[ehabnagip]

تظبيط الاكصدام يختلف تمنة على حسب الى فية .. و فى حاجالت متنفعش تتعمل فى اكصدام الفيكترا a .. عامة الاستيراد بيبقى حوالى 1000 الامامى و 800 الخلفى .. بالنسبة للفيبر و النواكل بتبقى انت و حظك بس فى اغلب الاحيان بتبقى موجودة انشاء الله .. عامة كل الاسعار ممكن تسأل عليها عند هانى العايدى او اسلام عبد الشافى دول احسن ناس ممكن تتعامل معاهم فى الحرفيين مع العلم دائما انك لازم تاخد بالك و تقلب كويس فى كل حاجة تشتريها استيراد , انا بتعامل علطول مع اسلام عبد الشافى و هو راجل محترم قوى و ممكن تفاصل معاة لو حبيت قولة انت من طرفى من نايل موتورز
و دى نمرتة 01003016660 .. بالنسبة للصنايعية عند فى الحرفيين محمد علام و الشيخ هيثم انا بتعامل مع محمد علام علطول و بردوا الناس الى بتتعامل مع الشيخ هيثم بتشكر فية جدا و هما الاتنين اكتر ناس فاهمة فى الاوبل هناك و بيراعوا ربنا فى شغلهم نمرة محمد علام 01002857023 ... بالنسبى للجديد فى الحرفيين عنك شارع المرسيدس فية كتير قوى و معظمهم كويسيين انا اغلب الاوقات بجيب من الدولية و احيانا من الوطنية او الشرقاوى و بردو دة خاضع الى انك تسأل و تدور على احسن جودة و سعر و تحاول تقييم الحاجة بنفسك المهم انك لو نزل الحرفيين تبعد عن اولاد الشاطر سواء ميكانيكا او استيراد او جديد .. عندك كان سفينة اوبل فى شارع المرسيدس للأستيراد و حاجتة كويسة جدا بس صاحب المحل ناشف فى المعاملة و مبيفاصلش و بيحبش يرجع الحاجة الى اتباعت .. و انشاء الله باقى الناس هنا هتساعدك بمعلومات اكتر عن ناس و مناطق تانية

[reallistic]

ألف شكر يا جماعة
و دلوقتي عاوز أعرف لو هأكشف على العربية ميكانيكا أروح بيها لمين ؟
لو في الجيزة و لو في القاهرة
ميكانيكي ولا مركز صيانة ؟ مين و فين ؟ بس نمرة واحد في الأوبل
و لو الميكانيكي حبيت أخده معايا يشوف العربية و يكشف عليها ياخد كام فلوس ؟
و لو في مركز صيانة الكشف يتكلف كام ؟