حد هنا جرب يسقط ايكوتيك 2000

[creative_art]

انا معايا اوبل فيكترا b 1997 مانيوال .. المكنه السوده .. بأمانه الموتور الى عندى حمار شغل ولسه بحالته وجميل وعملي وبيوفر بنزين ... بس ف الجري وتجميع السرعات تعبان اوى ، وانا بجري كتير جدا ، لدرجة واحد صاحبي معاه سيراتو كنا بنشد مع بعض بهدلني اخر بهدله وتقريبا مكنش بيشوفني فى المرايه خالص ... تجميع سرعات سواء تحت ال 100 او فوق ال 120 ..
انا بفكر مع الوقت اسقط ايكوتيك 2000 .. بس المكنه الى عندى بحالتها وجديده جدا .. ( عربيتي ماشيه 130 ) صعبانه عليا ومش عارف هل هلاقي حد ياخدها ويقدر حالتها ولا ..

في نفس الوقت مستخسر المكنه دى ف الاوبل .. بجد عربيه تستاهل 3000 سي سي تربو وهتقولك هات كمان ..

المهم .. بفكر اسقط ايكوتيك 2000 ... بس اهم حاجه تكون ( مانيوال ) .. حد جرب قبل كده ... وهل التسقيط وتغيير الموتور دا متعب .. ولا شكة دبوس ولا ايه النظام بالظبط ..

والسيستم هيتكلف كام لانى تقريبا كده هغير نص امامى كامل .. ولا ايه ؟؟؟

وهل هحتاج اغير عفشه وفرامل ولا ؟؟


وبالنسبه للاستهلاك والصيانه للايكوتيك هل هي اوفر كده فعلا ، ولا المواتير الاستيراد بتبقي محترمه ومفيهاش اعطال

..

المهم .. انا عايز واحد يكون موسوعه فى الاوبل .. يقولي الحوار والحكايه كلها .. ويجيب من الأخر ..

ربنا يخليكيو :d

[zizo50001]

بص الماكنة الايكوتيك غبية فى الجرى انا عندى اتوماتيك رهيبة و فى المانيوال رهيبة اكتر
و فى مكنة 2500 و دة 6 سلندر ماتور وهمى المهم
التسقيط سهل جدا
انت عربيتك 1600 مانيوال و انت عايز تسقط مانيوال
يعنى مش هيبقل التعديبل كبير انت هتجيب ماكنة ايكوتيك 20 واتأكد انها 20 علشان فى نفس الشكل 18
المهم هتجيب ماكنة و فتيس مانيوال باكنتروال بالضفيرة و هتجيب 2 جنب فشة ورا فرامل بس بتاع ال 20 و هتغير الطنابير اللى قدام برضة باالطنبرة الكبيرة ال 5 خرم بتاعت الموديل 2000 علشان اكبر و الصح انك تغير علبة شكمان ورا و قدام
ولما تجيب ماكنة جيبها من على نص يابانى علشان النص اليايانى بيبقى بحالتة واتوماتيك يعنى مش هيبقى مقروص علية وخلى الراجل يغير الفتيس يجيبلك الفتنيس المانيوال بتاع ال 2000 المواتير اكتريتها بتيجى نظيفة
التعديل سهل فى الاوبل عموما لان كل حخاجة متجهز ليها
وكمان التسقيط المانيوال سهل
بس المهم هتسقط عند مين المهم يكون واحد ممتاز
انا معرفش حد فى الاسكندراية
بس فى القاهرة يبقى هيثم
لو عزت اى حاجة انا معاك

[فادى محمد]

- الصح ,تجيب نص امامي كامل تاخد منه كل حاجته وعلي فكره مواتير ايكوتك 2000 سي سي كتير جدا بتيجي بفتيس مانوال وطبعا فتيسها احدث من اللي عندنا f18
-الحوار ده يتكلف من 7500 الي 9000ج
-لو هتبيع الموتور القديم اشتريه منك بالفتيس لو حالته حلوه لان الصنايعيه هيخدوه منك بسعر بخس ,تحياتي ,ربنا يوفقك

[creative_art]

فيه واحد جمب عباس اوبل قالى هاخد المكنه الى عندك وهديك ايكوتيك وهتدفع فرق 5 الاف وفيه كلام .. يعني قول 4 ونص , هوا كان متمسك بالمكنه الى معايا لانها فعلا زيرو ... بس الى قلقنى منه انه بيقول كلام غريب , زي ان الفتيس بتاعى ينفع يشتغل على الايكوتيك 2000 مش هحتاج اغيره .. والحاجات الى هتتغير مش كتير ... طبعا كلام فاضي !!

وعموما انا عايز نصيحه اخيره من خبراء الاوبل , هل ابيع العربيه فابريكه وخلاص واشتري cdx موديل 2000-2001 وكده نازله بمكنتها الاوريجنال ايكوتيك , ولا اخليني فى الى معايا ومش هيقل من تمنها ولا قيمتها ..

المشكله ، ان عربيتي فابريكه بمعني الكلام , مدخلتش عند صنايعيه كتير و كل حاجه فيها تمام انا بس الى طماع وعايز جري اكتر .. وخايف اسقطلها الحوار ده يقل من تمنها جامد

في نفس الوقت خايف اشتري حاجه cdx مش عارف اصلها ولا كان بيحصل فيها ايه وتلسعني مصاريف

موضوع محير انا عارف .. :)

[فادى محمد]

-بص ياباشا...
-هو كلامه صح في نقطه ان فتيسك يركب علي الايكوتك f16 -f18 الاتنين يركبوا بس ال18 اداؤه احسن مناللي راكب عندك
-موتور ايكوتك 2000 سي سي من غير فتيس يعمل من 4500 الي 5000 ج بمغذياته (مارش-دينامو-....) وطبعا بالكونترول والضفيره ,كده تمام ؟ الفتيس المانوال لوحده 900ج
يبقي هو كده لما يديلك الموتور الايكوتك مقابل موتورك +4500 ج يبقي هو اخد موتورك ببلاش ,حتي مش هيتغرم الفتيس كمان
-نصيحه ماتبيعش لتاجر مش عشان حاجه ..بس لان التاجر مايبخسرش ,هو يكسب وانت تتحمل
-فكره حلوه انك تبيع العربيه علي بعضها بحالتها وتشتري سي دي اكس اوريجنال بحالتها برده ولو ان المعروض منها قليل ,ربنا يوفقك

[medomorgan]

ماتجيب متور تيجرا 3500 جنية سعر كويس 2000 سي سي احسن واوفر زي موتور ايكوتك 2000 سي سي الفرق في الشكل اما القوه واحد وي الخرجي واحد انا كن هسقتو في فيكترا a والمكنيكي قال ماتور التيجرا زي ايكوتك 16 صباب 2 كامه

[Dr.M_baz]

المثل بيقول ... شراء العبد ولا تربيته
الأحسن تشتري واحده كامله لأن معظم من عمل حوار التسقيط تعب جدا بعدها ... عربيتك معاك شوف الموجود براحتك ولما تستقر على واحده نظيفه عربيتك هتتباع في يومين طالما حالتها كويسه.

[zizo50001]

لا على فكرة التسقيط لما بيكون صح انسه بيبقى روعة اكن شارى العربية جديدة
وعلى فكرة مش محتاجة نص ولا اى حاجة لان انت هتسقط مانيوال و دة سهل جدا
لو قررت تعدل و ناوى تبيع الماكنة و فادى مش هيشترى قولى و انا اخدها منك

[medomorgan]

التعديل احسن من الشرا علشان حجة انتا عملها علي ايدك وبعدين عربيتك انتا عرفا

[medomorgan]

ماتور تيجرا وريح دماغك

[medomorgan]

هوا المتورك كام سي سي

[hagagatc]

نصيحه مني خليك زي مانت مواتير الايكو تك مشكلها اكتر حساساتها اكتر صيانتها اغلي بس هي موفره في البنزين علي ما سمعت من ناس كتير لان انا الي عندي ايكو تك ومجربتش الموتور الاسود غير لو مكنت بدات تتعب

[احمد فهمى]

متورك بيجيب فلوس ولو بعتو بفتيسو وهو حاله ممتازه كما وضحت يمكن الفرق يكون كلام فاضى فى نصين فى الحرفيين مانيوال ايكو تك شفتهم عند هانى عربيه زيرو تاخد كل اللى فيها متور بفتيسو بكنترولاتو النص على بعضو بالطبلوه كمان وتبقى عربيتك فيها ايرباجز وكل حاجه غير كده عك ومنصحش توفق حته من هنا على حته من هناك بس الحق النصين دول لو ناوي وحاجتك بتجيب فلوس كويسه

[احمد فهمى]

نصيحه مني خليك زي مانت مواتير الايكو تك مشكلها اكتر حساساتها اكتر صيانتها اغلي بس هي موفره في البنزين علي ما سمعت من ناس كتير لان انا الي عندي ايكو تك ومجربتش الموتور الاسود غير لو مكنت بدات تتعب

الاوتوماتيك بس المانيوال مفيهوش مشاكل