كشف الأعطال الشامل في إخوان مقار!!!

[Dr-Daly]

السلام عليكم؛
انا النهارده في إخوان مفار بعمل كشف شامل علي عرببه فيكترا وتخيلوا التكاليف كام؟؟؟
420جنيه تدفع مقدما والعربيه دخلت 11صباحا وبيقول تخلص علي 3م !!!!
حد عندو تعليق ؟؟

[kar!m]

انت المستفيد طبعا .. في حاجات كتير مبتظهرش غير في الكشف الشامل.

تخيل مثلا علبة الدركسيون أو طلمبة البنزين أو الباور .. أهو لو بتشتري تخصم تمنهم من تمن العربية او تشترك فيها مع صاحب العربية .. هتلاقي نفسك بتوفر أكتر من تمن الكشف.

و في نفس الوقت تعرف العربية فيها ايه و محتاجه ايه بالضبط.

بس متتخضش من التقرير اللي هيطلع عشان بيكتب فيه كل ما تتخيله وما لا تتخيله :-)

[amrelsaqqa]

السعر كويس جدا مقارنة بالبدايل التانية
حضرتك البنزينة اللى مالهمش فيها بياخدوا 110 جنيه على الاقل ، ده غير البقشيش و"الدخان"

سيرفس سنتر هيونداى بيكشف على "الفيرنا" بـ 250 جنيه قبل الخدمة وضريبة المبيعات !


من وجهة نظري المتواضعة 420 جنيه للاوبل في التوكيل (اللى حافظ العربية صم وعنده الاجهزة بتاعتها وبيقولك قصة حياتها ويطلعلك الهوا اللى فيها ) مش وحش خالص !

اه ممكن يكون 420 جنيه كقيمة مطلقة كتير ، بس هو الواحد بيكشف على العربية كام مرة ولا بيشترى كام مرة ، وزي ما قلت بالمقارنة بغيره سواء بنزينات او توكيلات فئة اقل ، شايفه معقول جدا رغم اني الصراحة شايف ان كل الارقام دى غالية ، بس ده واقع وما نقدرش نلوم مقار على الـ 420 في حين ان الفيرنا بيندفع فيها 290 جنيه !

الفكرة في موضوع الكشف ده ان يبقى عندك الخبرة الكافية اللى تقدر تستبعد عربية قبل ما تدخلها في الكشف اوتفكر تخلص فيها ( مش كل ما تشوف عربية تروح تكشف عليها ، وتكتشف ان كان فيها عيوب ظاهرة مش مستاهلة كشف شامل عشان يطلعها .. )

[hesham ahmed]

في اتوماستر ب 305 ب الضريبه
و مش عاجبني .... هو عام جدا مش جايب كل حاجه بالتفصيل زي ما كنت عايز
و قالي في صوت من الموتور بس مش عارفين منين و محتاجين نفك الموتور عشان نعرف

[elmtr mohamed]

السعر كويس جدا مقارنة بالبدايل التانية
حضرتك البنزينة اللى مالهمش فيها بياخدوا 110 جنيه على الاقل ، ده غير البقشيش و"الدخان"

سيرفس سنتر هيونداى بيكشف على "الفيرنا" بـ 250 جنيه قبل الخدمة وضريبة المبيعات !


من وجهة نظري المتواضعة 420 جنيه للاوبل في التوكيل (اللى حافظ العربية صم وعنده الاجهزة بتاعتها وبيقولك قصة حياتها ويطلعلك الهوا اللى فيها ) مش وحش خالص !

اه ممكن يكون 420 جنيه كقيمة مطلقة كتير ، بس هو الواحد بيكشف على العربية كام مرة ولا بيشترى كام مرة ، وزي ما قلت بالمقارنة بغيره سواء بنزينات او توكيلات فئة اقل ، شايفه معقول جدا رغم اني الصراحة شايف ان كل الارقام دى غالية ، بس ده واقع وما نقدرش نلوم مقار على الـ 420 في حين ان الفيرنا بيندفع فيها 290 جنيه !

الفكرة في موضوع الكشف ده ان يبقى عندك الخبرة الكافية اللى تقدر تستبعد عربية قبل ما تدخلها في الكشف اوتفكر تخلص فيها ( مش كل ما تشوف عربية تروح تكشف عليها ، وتكتشف ان كان فيها عيوب ظاهرة مش مستاهلة كشف شامل عشان يطلعها .. )

عمرو جاب من الاخر

اضيف بس انى قبل عربيتى كشفت على عربية فيكترا 97 فى مقار بردو من سنتين وشوية كشف شامل
ب 250 جنيه طبعا باين عليه غلى اسعاره لكنه طلع كل حاجة فى العربية ولقيت فيها عيوب مكنتش هعرفها بالكشف العادى

نصيحة انك تختار افضل عربية اللى هتخلص فيها يعنى ودى وتكشف عليها مش كل عربية

ثانيا اكد على المهندس شفويا بردو انه يقولك بينك وبينه بعد الفحص رايه الشخصى ليك لانهم ممكن يطلعوا حاجات كتير عايزة تتغير مع اننا ممكن نشتريها بنفس الحالة استيراد من بره لكن انت اساله عن الحالة العامة للعربية واساسياتها وموتورها بينك وبينه لانى انا عملت كده وهو رسانى على اللى فى العربية فعلا وقالى لا متاخدهاش .. وراحو ال 250 بس مزعلتش لانى كنت هاخد مقلب ب 47000 الف جنيه

[Dr-Daly]

فعلاً التقرير اللي طالع يخض ويخوف جداً وعايز آراءكم بصراحه،
هي العربية فيكترا سي ٢٠٠٨ إليجانس اول فئه بترولي:
١-جلبه المقص الامامي شمال فيها قطع مش حاجه والفني وراهولي بنفسه( كاتبين المقصات الاماميه )
٢-مساعدين غير أصلي( متغيرين في مارس الماضي من ٢٠ألف كلم في مقار بردو بس الأصلي مكانوش متوفرين عندهم وقتها!!!)
٣-حساس الأوكسجين محتاج تغيير (يقوللي بيزود إستهلاك البنزين شويه مش كتير!!)=١٣٣٠جنيه
٤-فيه تسريب زيت تحت الفتيس ( بيقوللي غالبا اولسيه الواصل بالكوبلن وسعره ب٥٠٠جنيه لكن مش متأكدين جوان والا اولسيه لازم يغسل العربيه من تحت عشان يعرف الزيت جاي منين بالظبط!!)
٥-الجنط الخلفي فيه خبطه( الفني قال يمكن إستعداله ويشتغل عادي ده الاصلي بتاعها)
٦-المراية اليمين معلقه مش بتقفل مع السنتر لكن كهربتها شغاله لو هتظبطها بتتظبط سألت المهندس طب هنحتاج مرايه وألا إيه توه الكلام ومردش عليا تقريبا خاف يشرَّك العربيه أكتر من كده :)))
٧-مفتاح الإزاز الخلفي يمين كهرباء مش شغال بيقول عايز يتغير=٥٠٠جنيه
٨-فانوس الشبورة اليمين إزازه مكسور والشمال مطوس خالص عايزين تغيير "غالبا رأيي انا شخصي" (الاتنين قيمتهم=١٨٠٠جنيه)
٩-العربيه فبريكه دواخل لكن راشه حزام ماعدا السقف
١٠-الإكسدام الخلفي متغير في مقار بردو بس مش بتاع المصنع
١١-الإزاز الأمامي متغير أكتر من مره في ورش شركه التأمين نتيجه خبطات طوب والموجود حاليا سليم وحلو
١٢-الباب السائق كان واخد خبطه ومستعدل ومش باين لكن فيه طقه مع الفتح والقفل
١٣-الدريكسيون جلده متقطع من حته تحت إيد السائق كده لاحظتها لما ركبت العربيه
١٤-الفوانيس الأماميه متغيره من فتره بردو والأصليين موجودين بس متآكلين من الإستعمال
١٥-البطاريه تتغير( برغم إن نورها أخضر يعني لسه جديده المفروض)
صاحب العربيه كان طالب ٨٥الف بعد الريبورت ده نزلت معاه لحد٨٠ألف وقال مش هينزل مليم تاني مش عارف هيه كده تسوي وألا إيه يعني أخلص فيها وألا أسيبها وألا أكسر معاه هوه واضح إنه فقد الأمل فيا لما شاف معايا التقرير ومعدش هيعمل الكشف الشامل تاني مع إن معظم الحاجات مش أساسيات ولا تخوف وأغلبها"كهربا وفوانيس الشبورة ومفتاح النور وحساس الأكسجين" والباقي أي كلام بس منظر التقرير يرعب!!!!!!
مستني نصيحتكم انا قلتله خليك يومين وهرد عليك..

[nagy wassef]

العربية سعرها قليل عشان ماشية ميه و شوية و رشة و محتاجة مصاريف لو عندك استعداد تصرف و تضيع وقت اشتريها طالما متورها و فتيسها سلام لكن لو عايز تريح دماغك زى حلاتى انا اشتريتها غالية قوى عشان كانت ماشية 17 الف بس. و ريحت دماغى الحمد لله.و انا لو منك .....الهرووووووب العظيم.وكل واحد و تفكيره

[kar!m]

حاجات كلها عادية و السعر حلو لو العربية ايزي ترونيك.

[Astra Lover]

الحاجات الى فيها تتلم بلمبلغ الى نزلو (5000) طول ما الموتور والفتيس كويسين انا رأى العربية جامدة بلسعر ده وكل منتا مهتم بيها الالمانى بيوصل مرتاح 500الف كيلو ومبتقلوش لا

[Astra Lover]

حاجات كلها عادية و السعر حلو لو العربية ايزي ترونيك.

هى ايزى ترونيك ودى موصفتها كامل واكانت عاملة 175 الف جنية اول مانزلت


Elegance Line نظام الفرامل المانع للأنغلاق عجلة قيادة رياضية ، ثلاثية الأذرع عجلة قيادة متعددة الوظائف4 وسائد هوائية للسائق و الراكب الأمامى وعلى الأجناب سنترال لوك راديو + مشغل اسطوانات مدمجة تكييف هواء أوتوماتيك مخارج لهواء اتكييف فى الخلف زجاج كهرباء مسند للذراع أمامى وخلفى ضبط مقعد السائق والراكب الأمامى فى 8 أتجاهات مختلفة6 سماعات حامل أكواب أمامى وخلفى شاشة بيانات ( الوقت / التاريخ / الحرارة الخارجية) باور ستيرنج ناقل حركة ايزى تورنيك مصابيح ضباب أمامية وخلفية جنوط اسبور 16 بوصة مرايا خارجية قابلة للطى و الضبط كهربائيا المرآة الداخلية حساسة للضوء مساحات حساسة للرطوبة / بها حساس للمطر

[dodz]

سؤال خارج الموضوع شوية. هو احنا الكلام ده عن مقار ال في شارع التحرير؟ أنا مكنتش أعرف إن بيعمل كشف عام عن الاوبل، هو اوبل بس ولا في أنواع تاني؟

[Dr-Daly]

بيعمل كشف وصيانه دوريه لشيفروليه كمان كان فيه عربيات كتير "شيفي" بكل الأنواع لانه مركز معتمد ل منصور

[Mostafa.Ismail]

اوبل وشيفرولية وهما احسن ناس يجيبولك من الاخر ... يعنى ممكن تكشف عندهم وتعرف العيب وتصلح برة.

[halimo]

راى الشخصى اصرف نظر فورا لان واضح من التقرير ان العربية متهانة رغم ان ماتورها وفتيسها الكويسين بس المشاكل ال فى التقرير كتير رغم عدم تأثيرها على العربية .
والنتيجة ان صاحب العربية مابيصرفش على العربية يعنى ممكن يحطلها زيت 3000ك ويغيره بعد 5000ك (مثلا)علشان مش فاضى الى اخرة من الحاجات ال ممكن تظهر معاك فى المستقبل وتبقى مؤثرة ريح دماغك زى مااتقالك وكمان دة المانى مش كورى ممكن تلمها لو فتحت بؤها اسف لو دايئتك بكلامى لكن انا مجرب وحبيت انقلك خبرتىوالراى فى الاول والاخر ليك.

[Dr-Daly]

انا بشكركم جميعا علي المساعده في إتخاذ القرار بالشراء؛
دي أول مرة أشتري مستعمل وربنا يسترها ويباركلي فيها إن شاء الله.
والحمدلله دفعت عربون وكتبنا عقد إبتدائي بمبلغ العربون 5آلاف والمبلغ عند إستلام العربيه 65ألف والباقي عند التسجيل النهائي وهستلم منه العربيه الأحد أو الأتنين الجايين لأنه مسافر تركيا وهيرجع السبت وطبعا البنوك قافله السبت ف هيبقي الأحد أو الأتنين.
انا فرحان بالعربيه بس بردو قلقان منها ومن سواقتها في زحمه الدقي والكورنيش ومن السفر بيها علي الزراعي وانا أول مرة أسوقها هتبقي لما أستلمها