نصيحة بخصوص الاوبل استرا 2000 ؟

[iyounes]

رجاء من الاخوة المساعدة

معروض عليا اوبل استرا 2000 بحالة جيدة 1200 سى سى محتاجة تغيير فوانيس وشوية نظافة فى البوية وتغيير زجاج امامى وصاحب العربية بيقول ان فيه بيضة عايزة تتغير ومروحة التكييف عايزة تتصلح وباقى العربية سليمة 45000 جنيه

بس انا قلقان من موضوع قطع الغيار ومش عارف هيه ممكن تكون مشاكلها ايه وهل 1200 سى سى كويس وله قليل على جسم العربية علشان انا سمعت من ناس بتقول انها 2 كامة بس انا مش فاهم المشكلة فين ؟ وايه اخبار الموتور عمرة وادائة ومشاكلة ؟

انا كنت بدور على لانوس على اساس قطع غيار رخيصة وبياعة وواسعة ومريحة بس الاوبل فى نفس السعر وفيه ناس بتقولك حتى لو قطع الغيار غالية ده فى التوكيل لكن ممكن تلاقى فى استعمال الخارج والعربيات المتقطعة بأسعار قريبة من اللانوس وان اسعار اللانوس الرخيصة ده فى الصينى لكن الاصلى برده غالى يمكن اقل شوية من الالمانى بس غالى لكن اللى مرخصها الصينى مش الاصلى ؟

ممكن الخبراء بالمنتدى يفيدونى علشان انا محتار والعربية كانت بره دائرة اختيارى

وشكراً مقدماً على الافادة

[Astra Lover]

العربية محترمة معلهاش غبار والموتور كويس جدا عليها مش حتحس انو 1200 وقطع الغيار فعلا زى منت قولت متوفرة استعمال خارج وجديد واسعارها مش غالية مقارنة بلانوس الاصلى وكفاية انها معمرة ده يفرق كتير اتأكد كمان من التكيف عشان حوار المروحة ممكن يكون اشتغالة ومحتاجة مثلا كمبروسور(حيكلفك رقم مش هين) ولو تمام حاول نزل معاه 3 بواكى كمان وانت تلم الحاجات ديه كله وهو كده متظلمش بس انت مقلتش ماشية كام كيلو وحالة الصاج ايه؟ وطبعا لازم تكشف عليها عشان لو فيها حاجة تانى !
وربنا يوفقك ان شاء الله.

[Demhavi]

عربية حلوه جداً بس لازم تكشف عليها في التوكيل و تنزل شوية في السعر لانه غالي على الحاجات الي عايده شغل فيها
و ربنا يوفق للخير

[ashourashour]

الموتور لو مظبوط العربيه بسحب حلو جدا

والاعطال الشائعه للموتور ده حساس الماف (حساس كمبه الهواء) و الايدل كنترول دول بيتغيرو باستمرار اعرف سعرهم كام

العربيه راسيه جدا على الطريق

اكشف عليها كويس قوي في التوكيل

[uirap]

العربية معايا من 3 سنين. ملاحظاتي كما يلي:
1- بالنسبة للموتور مش حتحس بانها 1200 ابدا (طبعا لو الموتور سليم). حساساته كتيرة شوية بس لو محافظ عليها مفيش مشكلة. البنزين اقتصادية جدا يعني الصفيحة تعمل 200 كيلو جوة البلد. انا التفويله تعمل معايا 400 كيلو تقريبا.
2- قطع الغيار بتاعتها مليانة في السوق استعمال وجديدة سعرها عالي شوية بس بصراحة مفيش حاجة غيرتها مرتين. كمان بصراحة قطع الغيار الاصلية في اي عربية لازم يبقى سعرها غالي. المشكلة ان الناس بتقارن قطع الغيار الصيني في عربية وري بقطع غيار اصلي في الماني!!!!!
3- العربية دي كذا فئة: الاولى من غير سنتر ولا زجاج كهرباء الثانية: سنتر وزجاج كهرباء امامي فقط والثالثة: سنتر وزجاج كهرباء واوتوماتيك وفتحة سقف. كل فئة ليها سعرها. الاولى حوالي 42000 لو سليمة والتانية 45000 والتالتة حوالي 47000 لو سليمة
4- التكييف لو مش شغال بلاش منها لانه حاجته غالية في العربية دي (الكباس يعمل حوالي 700 جنيه والمروحة حوالي 450
5- الفوانيس اللي قدام ده مؤشر على اهتمام صاحب العربية بيها. الفانوس الواحد يعمل حوالي 350 جنيه مستعمل خارج نضيف والي ورا حوالي 200 جنيه
6- عداد العربية مهم العداد المناسب ليها من 180 الى 200 الف على اساس مشيها 12 سنة تقريبا. بس بصراحة موتورها ممكن يعمر لحد 400 الف

اكشف عليها كويس ويفضل في التوكيل

[zizo50001]

بص اولا الموتور دة كويس لو حالتة نظيفة و متلعبش فيه يعنى متفكش قبل كدة هتلاقى العربية دى معاك ممتازة جدا
تكيف العربية دى احسن من اى تكيف عربية يابانى او كورى ممتاز جدا جدا
وسعرها حلو على فكرة لو على الشغل اللى انت بتقول علية
حاجتها موجودة استيراد عادى و مش غالية اوى بس معمرة جدا
وعلى فكرة هى حاجة و اللانوس حاجة تانية تانية
بس نصيحةاشتريها لو ماتور 1200 تجيبه نظيف علشان متتعبش معاه

[nab!l]

العربية معايا من 3 سنين. ملاحظاتي كما يلي:
1- بالنسبة للموتور مش حتحس بانها 1200 ابدا (طبعا لو الموتور سليم). حساساته كتيرة شوية بس لو محافظ عليها مفيش مشكلة. البنزين اقتصادية جدا يعني الصفيحة تعمل 200 كيلو جوة البلد. انا التفويله تعمل معايا 400 كيلو تقريبا.
2- قطع الغيار بتاعتها مليانة في السوق استعمال وجديدة سعرها عالي شوية بس بصراحة مفيش حاجة غيرتها مرتين. كمان بصراحة قطع الغيار الاصلية في اي عربية لازم يبقى سعرها غالي. المشكلة ان الناس بتقارن قطع الغيار الصيني في عربية وري بقطع غيار اصلي في الماني!!!!!
3- العربية دي كذا فئة: الاولى من غير سنتر ولا زجاج كهرباء الثانية: سنتر وزجاج كهرباء امامي فقط والثالثة: سنتر وزجاج كهرباء واوتوماتيك وفتحة سقف. كل فئة ليها سعرها. الاولى حوالي 42000 لو سليمة والتانية 45000 والتالتة حوالي 47000 لو سليمة
4- التكييف لو مش شغال بلاش منها لانه حاجته غالية في العربية دي (الكباس يعمل حوالي 700 جنيه والمروحة حوالي 450
5- الفوانيس اللي قدام ده مؤشر على اهتمام صاحب العربية بيها. الفانوس الواحد يعمل حوالي 350 جنيه مستعمل خارج نضيف والي ورا حوالي 200 جنيه
6- عداد العربية مهم العداد المناسب ليها من 180 الى 200 الف على اساس مشيها 12 سنة تقريبا. بس بصراحة موتورها ممكن يعمر لحد 400 الف

اكشف عليها كويس ويفضل في التوكيل

الفانوس الامامى الاتنين سعرهم 350 استيراد مش الفانوس الواحد والفوانيس مش مؤشر على اهتمام صاحب العربيه
الموديل ده مفيش منه اوتوماتيك خالص :)
وشكرا