هل استرا 2013 تعتبر اقتصاديه؟

[memo85]

انا كنت خلاص حجيب الانترا 2013 gls اللي ب 168000

وبعدين شفت الاموره الاسترا ولقيتها تقريبا بنفس السعر ولكن مع فارق الفخامه والقوه والامكانيات الزياده عن الالنترا

بس في مشكله واحده فقط هل الاسترا تعتبر اقتصاديه مقارنه بالالنترا يعني في الصيانات الدوريه وقطع الغيار من التوكيل حيكون الوضع عامل ازاي؟

انا سألت في منصور عن صيانه الاسترا H (اقرب حاجه للموديل الجديد) وكانت كالاتي:
5000:700
15000:780
30000:1100
60000:4000
والاسعار ديه شامله زيت موبيل وان

سعر تيل امامي 760

انا محتار جدا يا جماعه وخايف اجيب الاسترا ومعرفش اكفي مصاريفها وفي نفس الوقت مش عايز اصرف نفس المبلغ في كوري(في نظري خساره)وحاسس ان الالانترا الجديده ممكن تكون اسعار صيانتها متقاربه مع الاسترا؟؟؟

رجاء المساعده من خبراء الاسترا

[amr-osama]

معلش انا مفهمتش الارقام دي ترمز لايه ؟؟
قصدك كنسبه وتناسب بين العربيتين ؟؟

[memo85]

لا ديه صيانات الاسترا
المسافه بالكيلومتر علي الشمال والتكلفه علي اليمين

[احمد فهمى]

طبعاً مفيش مقارنه الاوبل افضل 1000 مره ولعلمك شوف صيانات الهيونداى هتلاقيها قريبه جداً ولا تقلق الصيانات فى اوبل بترخص مع الوقت وغير كده في ناس بتعمل صيانه بره وتمام

[Dr-Daly]

بما إني منضم لعصابة أوبل جديد (جبت فيكترا 2008 ايزيترونيك) انا شايف إنك تتوكل علي الله وتشوف الأسترا الجديده 2013 أو شوف فنتازيا أول فئه( غالبا فانتازيا هتغير شكلها السنه دي 2013 فبلاش هتزعل علي الفلوس) أو جيتا المهم أوروبي عموماً وألماني خصوصاً وأبعد عن الكوري؛ أصل مش معقول تبقي بتحط 170,000جنيه في عربيه كوري مهما كانت الكماليات!!
وزي ما أ/أحمدفهمي قالك الصيانات بترخص مع الوقت الخوف فقط من سعر إعادة البيع لو إنتا ناوي تغير العربيه كل سنتين مثلاً أو بتغير علطول كده هقولك هات كوري مش هتخسر في إعادة البيع إنما طالما جايب عربيه تقتنيها ليك وللعيله وتفضل معاك يبقي طبعاً ألماني (أوبل يليها فولكس جيتا)
ده رأيي وبالتوفيق

[omskmaher]

الاسترا وش

[memo85]

طيب حد عنده فكره عن قطع غيار وصيانه الانترا؟؟

[dede_dodo88]

الأسترا أكثر أقتصادية لو بتتكلم على أسعار الصيانات و قطع الغيار.. لكنها غير أقتصادية لو بتتكلم على أستهلاك البنزين..

[ashrofa72]

الأسترا أكثر أقتصادية لو بتتكلم على أسعار الصيانات و قطع الغيار.. لكنها غير أقتصادية لو بتتكلم على أستهلاك البنزين..

ليه هيا الاسترا استهلاكها حوالى كام ليتر فى 100 كيلو

[ashourashour]

170 الف في الينترا !!!!!!!!!!!!!!!!!!!!!!!!!!

لييييييييييييييييييييييييه (شوبير ستايل)

دا توبها 120 بالكتير

[gebreel]

استرا اكيد و انا سقتها و ابصملك بالعشرة عربية من الاخر فعلا

[dede_dodo88]

ليه هيا الاسترا استهلاكها حوالى كام ليتر فى 100 كيلو

11.6 في المتوسط على حسب كمبيوتر عربيتي..

[Formulator]

هو فعلا العربية بعد فترة مصاريف صياناتها بتقل!
لأن قطع الغيار بتتوفر برا التوكيل .. وحتى لو فـ التوكيل:

- لو قارنت أسعار غبو مع منصور.. هتلاقى الأسعار almost متقاربة.. الإلنترا الجديدة مثلا،
دا غير فرق الـquality والعمر الإفتراضى فـ القطعة نفسها! أساسى للأسترا :)

بالنسبة لإستهلاك البنزين:
حتى لو الصفيحة بتعمل من 180-200 كم فـ المدينة.. still رقم كويس بالنسبة لوزن العربية الثقيل!!
(الأسترا أثقل بفرق -شاسيه وصاج- من الإلنترا طبعا، دا غير الفتيس الأوتو فـ الأوبل بيستهلك بنزين أكثر شوية من فتيس الهيونداى)..

- دا لو هنتكلم عـ الحاجتين دول بالتحديد (مصاريف الصيانة والبنزين)..
غير كده مفيش مقارنة بين العربيتين فـ أى حاجة؛ الأسترا تتفوق. عدا الإلنترا جراية سيكا عنها.. فقط!

Rgds،

[memo85]

170 الف في الينترا !!!!!!!!!!!!!!!!!!!!!!!!!!

لييييييييييييييييييييييييه (شوبير ستايل)

دا توبها 120 بالكتير

ده بسبب زياده الدولار بس طبعا الزياده اللي حصلت اكتر بكتير من زياده الدولار

[medo111]

استرا طبعا مفيش مقارنه والصيانات متقاربه

والالنترا غاليه في الفاضي