غلطه من صنايعى كانت هاتكلفنى كتييييييير

[Hesham.H]

إخوانى الأعزاء
النهارده أنا حابب أنقل لكم موضوع حصل معايا من يومين ... تذكره لكم وليا من قبلكم
الموضوع ببساطه خاص بتغيير الزيت وبالأخص ...... فلتر الزيت
أنا متعود أغير الفلتر مع كل غيار زيت ... وبالفعل غيرتهم من أسبوعين ... ولله الحمد أنا مشيى بالعربيه مش كتير
المهم من يومين بالظبط كنت بظبط ضغط الكاوتش عند واحد عجلاتى ... وكان واقف عنده واحد الله يباركله هو اللى نبهنى
قاللى شوف يا أستاذ عربيتك بتنقط ميه من تحت
نزلت بصيت .... لقيته زيت مش ميه !!!!!!
ومنظر العربيه من تحت وهو غرقان زيت يوحى للى يشوفه انها خلاص خربت
من فضل ربنا إن كان بينى وبين الراجل اللى بغير عنده حوالى ٥٠٠ متر ... أخدت العربيه وجرى عليه ... وطبعا ال ٥٠٠ متر دول كأنهم ٥٠٠ كيلو هههههههههه
وعينى على أمبير الحراره اللى الحمد لله مازادتش ... ولمبه الزيت مانورتش .... وصوت العربيه ماعليش
روحت قلتله شوف يا عم اللى انت عملته ... العربيه بتجيب زيت ... دخلت على البياره ودور يا باشا ... دورنا لقينا التسريب من الفلتر
الباشا ما ربطش الفلتر كويس آخر مره وتقريبا هو فك مع نفسه كمان شويه لانه لما ربط عليه جاب حوالى ٤ لفات
الحمد لله ربطنا الفلتر وزودنا الزيت لغايه أما وصلنا للعلامه على مقاس الزيت .... أخدت حوالى كيلو ونص
المفروض طبعا انى ماكنتش احاسبه على الزيت ده ... بس أنا حاسبته لانى كنت ناوى أقطع معامله معاه
أنا بنقل التجربه دى عشان نتذكر كلنا إننا مش لازم نسلم كده لأى صنايعى ... أو بمعنى أصح


لازم نتابع أى شغل بيتعمل فى العربيه كأننا إحنا اللى بنعمله
تحياتى

[Mo.Kareem]

ربك كبير ، وبيبعت ناس ولاد حلال علشان تقف جنبنا

[mohammed dodda]

الحمد لله انك لحقتها...كلامك مظبوط جدا وربنا يسترها معانا ومعاك

[Hesham.H]

ربك كبير ، وبيبعت ناس ولاد حلال علشان تقف جنبنا

فعلا .. ربنا يباركله الراجل اللى نبهنى

[Hesham.H]

الحمد لله انك لحقتها...كلامك مظبوط جدا وربنا يسترها معانا ومعاك

آاااامين يا رب

[tananybasha]

ستر ربنا بس
انا اللى يشوفنى واقف فى ورشة باعمل عربيتى ميرضاش يسلم عليا او يفتكرنى صنايعى فى الورشة

[iaibrahim]

حصل ذلك مع ابنى فى النوبيرا وكان زيت موبل 1(يعنى غالى ) ووقع كله على الارض لدرجه اننا اضطرينا نزقها ولن ندورها لاننا اكتشفنا ذلك عند البيت والنصيحه ان الواحد بعد تغير الزيت ويروح يبص تحت العربيه ويتأكد انها لا تنقط مع تحياتى

[sno7y]

الحمد لله ربنا ستر بس لو كنت خلته دفع تمن الزيت كان خد باله مش شغله بعد كده بدل ما يعمل نفس الغلطه مع حد تانى

[lanos2004]

انا بغير الفلتر مع كل غيار زيت
مرة مركزتش مع العامل الى بيغير تانى يوم الصبح لقيت الفلتر القديم لسه راكب-ومركبش الجديد وكمان اخدة
بس قلت انا الى غلطان علشان متابعتوش وهوة شغال

[Hesham.H]

ستر ربنا بس
انا اللى يشوفنى واقف فى ورشة باعمل عربيتى ميرضاش يسلم عليا او يفتكرنى صنايعى فى الورشة

هو ده الصح

[chahutpartout]

الحمد لله جت سليمة
حصلت مع احد معارفي بس كانت طبة الزيت هي اللي مربطهاش كويس

[Hesham.H]

الحمد لله ربنا ستر بس لو كنت خلته دفع تمن الزيت كان خد باله مش شغله بعد كده بدل ما يعمل نفس الغلطه مع حد تانى

هو المفروض ماكنتش حاسبته ... بس قلت خليها عليا طالما اخر مره هاروحله ان شاء الله

[Hesham.H]

الحمد لله جت سليمة
حصلت مع احد معارفي بس كانت طبة الزيت هي اللي مربطهاش كويس

الحمد لله ... دا من ستر ربنا والله

[mamdouhsh1973]

حصلت معايا على الطريق الصحراوى بس الحمد للة كام معايا جركن زيت فضلت ازود منة لحد ما رجعت للبنزينة اللى انا غيرت عندها اتضح ان الصنايعى حط فلتر اصغر من الاصلى الحمد للة لحنا العربية قبل الماتور ما يقفش

[ahmedelfeky]

الحمد لله ربنا ستر