دعوة لملاك فيكترا سي بالمنصورة للتعارف؟؟

[Dr-Daly]

انا من اول ما إشتريت عربيتي الفيكترا سي ونزلت ألف بيها شويه في المنصورة وبدأت ألاحظ إن فيه عربيات كتير فيكترا سي في الشارع!!!؛ يعني مثلا فيه عربيتين بيركنوا ع المشايه واحده فوق عند طب أسنان تقريبا والتانيه من تحت بس مش فاكر المكان تحديداً، وفيه واحده سودا عند صيدليه محمد أمين تقريبا؛ ولقيت د.عمر خشبه أستاذ الطب راكب فيكترا سي حمرا إحترمته قوي ساعتها وعرفت إنه بيحب التميز والإختلاف وشوفت غيرهم بألوان مختلفه،
المهم انا قلت أعمل موضوع هنا جايز ألاقي حد من ملاك فيكترا سي من أهل المنصورة هنا علي الموقع وهم كتير بالمناسبه بحيث نتقابل نتعرف ونتبادل خبرات عن العربيات والصنايعيه والمشاكل اللي ممكن تقابلنا..،
نبدأ بمعلومات عامه عن العربيات بتاعتنا مثلاً إسم المالك ورقم الرخصه ومكان الإقامه كبداية
انا هبدأ بنفسي:
الأسم: د.محمد الدالي
ورقم عربيتي: د ل ط ٤٣٧٨ اللون بترولي - ساكن في ش قناة السويس عند كابتشينو كده

ياريت نعرف نجمع بعض وممكن نتقابل تبقي فرصه سعيده لينا كلنا
"نعمل ميني عصابه لأوبل فيكترا سي في المنصورة يعني "

[nagy wassef]

طب و احنا ؟ :(

[Dr-Daly]

يا ناجي بيه إنتا علي دماغي بس انا كنت عايز المنصوريه اصحاب فيكترا سي نتقابل ونتجمع سوا ولو وقتك يسمح نتشرف بيك وبكل عضو طبعاً

[nagy wassef]

ربنا يخليك يا دكتور دا من ذوقك الشرف ليا ....... بس موضوع ان الواحد يروح المنصورة دلوقتى اعتقد انه صعب قوى و كان نفسى نتجمع كلنا كل ملاك السى من الصعيد للاسكندرية فى مكان واحد و لو كل ملاك السى راحوا المنصورة اعتقد ان احنا هنعمل شلل مرورى هناك :) و الوضع مش مستحمل :) عامتا بالتوفيق فى هذا التجمع العملاق.

[sherif moneer]

طب والفيكترا بي :-d
هيا السي موجوده كتير فعلا ف المنصوره وبشوفها دايما

[Dr-Daly]

والله الفكرة إننا نتعرف ونستفيد من بعض كملاك لل سي
طبعا لا يغني عن التعارف مع الساده ملاك ال بي بردو تشرفوا طبعا طبعا

[sherif moneer]

طب مهيا لو اتعملت رابطة الاوبل عموما في المنصوره هتبقي حلوه

[Dr-Daly]

تمام
تبقي رابطه أوبل عموما في المنصورة عشان منحصرش نفسنا في موديل معين ولاتزعل نفسك ياعم شريف
بس إدعي إن يكون فيها وإلا تبقي عيبه في حق المنصوريه

[medo111]

يا ريت تبقي عصابه اوبل كلها في المنصوره متبقاش السي بس

[Dr-Daly]

يا ريت تبقي عصابه اوبل كلها في المنصوره متبقاش السي بس

يبقي متفقين بس فين المنصوراويه أساسا؟؟
بعدين قلنا نحط أرقام عربياتنا مع الأسم والموبايل(ممكن نأجل الموبايل لحد ميعاد التجمع عشان الخصوصيه) ويبقي مرجع لينا للتعارف إن شاء الله علي أمل عمل لقاء بيننا في أقرب فرصه بس نجمع عدد أول

[medo111]

طيب ممكن نستني شويه عشان نتاكد ان الاعضاء شافت الموضوع وياريت استاذ فادي يجي المنصوره دمياط مش بعيده

[sherif moneer]

انا معاكم اهو

[Dr-Daly]

طيب فين باقي الأخوه ملاك الفيكترا أو الأوبلاويه ؟؟