باركولى

[pharohtemo]

قبل ما تباركولى انا حبيت أحكى تجربتى فى الشراء و أهو ممكن تفيد واحد عايز يشترى مستعمل و يلاقى فى الكلام ده نصيحة زى ما كنت محتاجها و أنا بدور
من ساعة ما بيعت الأبيزا العزيزة و أنا بدور ليل و نهار على عربية ، كان نفسى أركب نيسان تيدا أو تويوتا
ياريس و كل يوم ألاقى حاجة شكل !! مرة حالة ممتازة بس سعر عالى قوى و مرة سعر مناسب بس كيلومتر عالى قوى و يوم ما ألاقى العربية المظبوطة أتكلم و ألاقيها أتباعت
المهم بدات أوسع دائرة البحث علشان أنوع الإختيارات و بصيت على الإلنترا بس مفيش قبول (العربية ممكن تكون محترمة بس مش ماشية مع شخصيتى) و كمان اللى بيعملوا غبور من تنفيض الكماليات اللى فى العربية تعبنى نفسياً
طب منشوف الفورد فوكس !!! ممتازة بس كلام كتير عن التوكيل و عدم إنتشار قطع الغيار ...
هوندا سيفيك لقطة (80 ألف كيلو فابريقة بره و جوه و كان عايز 85 ألف) كانت مع واحد معرفة بس للأسف والده باعها لواحد صاحبه بعد ما كنت رسمت أحلامى على العربية دى ..
لحد ما فكرت أبص على الأسترا ... هى مع واحد زميلى و بيشكر فيها بس كان فى كلام كتير عن الفتيس و ده قلقنى جداً بس لما قريت المواضيع بتاعت عاشور و أحمد فهمى و طنانى حسيت أن فى حد فاهم و ان الفتيس ده مظلوم !!! و أتشجعت و أطمنت إن فى حد حيعبرنى لو حصل لى مشكلة و طلبت النصيحة
المهم دورت و لاقيت واحدة بنت حلال (44 ألف كيلو فابريقة بالكامل) و سبحان الله الموضوع مشى بسلاسة و يسر و صاحب العربية خلص معايا و أستلمت العربية و العقد و شهادة المخالفات النهاردة و لسه فاضله عندى 4000 جنيه بدون أى ضمانات :)
الخلاصة :
- وسع دائرة إختياراتك و متقفلش على نفسك فى ماركات محددة.
- لو ليك نصيب فى عربية حتركبها و أوعه تندم على عربية أتباعت (مين عارف إيه اللى ممكن يحصل لو كانت ليك).
- دائما أستعين برأى أهل الخبرة و أسأل مرة و أثنين و عشرة (دى عربية و فلوس كثير)
- أبعد عن العربيات الغريبة (توافر قطع الغيار و الصيانة و كمان سهولة إعادة البيع).

[pharohtemo]

كده نسيتونى أقول أنها astra h 2007 :))))

[hilal]

الف مبروك ، وربنا يعطيك خيرها ويكفيك شرها ان شاء الله تعالى

[haitham2011]

الف مبروك و ربنا يديك خيرها و يكفيك شرها

[hilal]

ياريت تقول لنا اشتريتها منين ، والسعر كام ، من باب العلم ليس أكثر ، وشكرا مقدما

[احمد فهمى]

اهلاً بك واطمن انت عملت الصالح لك و44 الف يعنى زيرو فغلاً لآوبل

[pharohtemo]

الف مبروك و ربنا يديك خيرها و يكفيك شرها

ربنا يبارك فيك :)

الف مبروك ، وربنا يعطيك خيرها ويكفيك شرها ان شاء الله تعالى

اللهم آمين ..

[pharohtemo]

ياريت تقول لنا اشتريتها منين ، والسعر كام ، من باب العلم ليس أكثر ، وشكرا مقدما

أشترتها من كونتكت و عامله 89 ألف جنيه

[pharohtemo]

اهلاً بك واطمن انت عملت الصالح لك و44 الف يعنى زيرو فغلاً لآوبل

أحمد بيه أنت أحد أسباب شرائى للعربية دى !!! ربنا يبارك لك و يكرمك على نصائحك و مساعدتك ...
أنا عملت الصالح يمكن بس قابل بقى الأسئلة و وجع الدماغ فى حاجات كتير عايز اعرفها بس أفوق من الفرحة و أعمل الرخصة :)

بس ممكن نسخن بسؤال كده لو ممكن ؟ صاحب العربية عملى عقد مسجل فى الشهر العقارى و أنا مش ماضى مشترى ، كده لازم أروح نفس الشهر العقارى علشان أوقع ؟ و لا ممكن أى شهر عقارى تانى ؟

[hilal]

ربنا يجعلها وش السعد عليك ويجعل قدمها خير باذنه تعالى

[pharohtemo]

ربنا يجعلها وش السعد عليك ويجعل قدمها خير باذنه تعالى

يا باشا متشكر لذوقك :)

[speed_magnum]

الف مبروووووك
ونورت القسم يا ريس

[pharohtemo]

الف مبروووووك
ونورت القسم يا ريس

الله يبارك فيك .. القسم منور برجالته :)

[tarekzein]

ربنا يديك خيرها ويكفيك شرها

ألف مبروك

[amr elsisi]

ربنا يباركلك فيها