وبدات مشاكل العربية تظهر ارجو المساعدة

[Mamoud salah H]

السلام عليكم
انا عندي مشكلتين في العربية ومش عايز اروح لحد يعمل عليا افلام
1-العربية بتفصل ني وانا ماشي لوحدها بدون اي مقدمات وبدور تاني مجرد ما ادورها عادي الكلام دة كله وانا ماشي عادي جدا ومكن تحصل كذا مرة في وقت قصير في نفس المشوار

المشكلة التانية
ان من ساعت ما حصلت المشكلة الاولي وموشر السرعة نزل علي الصفر وحالف مايتحرك من مكانوا خالص مش عارف بقي المشكلتين دول ليهم علاقة ببعض ولا ايه
ارجو المساعدة
السيارة فيكترا بي استيراد تقفيل اوروبي 1600 ايكوتك مانيوال

[meika]

المشكلة الاولة ممكن طرمبة بنزين بتعلق
المشكلة التانية دى ملهاش علاقة بلاولة ولاكن واير العداد اتقطع على ما اظن

[hilal]

ابحث عن الاسهل أولا
1- شوف وصلات الكهرباء وتأكد أنها سليمة
2- تأكد ان السلوك الخاصة بحساس الكرنك سليمة ومش مقطوعة ، وفكه ونظفه كويس
3- تأكد أن طلمبة البنزين شغالة وفلتر البنزين نظيف
4- بعد كده شوف البوبينة وتأكد أنها سليمة

[aboomar22]

ممكن كمان تبدء بالحاجات البسيطة شوف فلتر البنزين والهواء واتاكد من نظافتهم واتاكد ان الارضى مربوط كويس

[tananybasha]

مشكله كهربا
و هتلاقى فيش الحساسات مملحه
و خاصة حساس الكرنك
و عداد السرعه مرتبط بالعجله اليمين او الشمال مش فاكر
و غالباً هتلاقى لمبة الأيه بى اس منوره

[Mamoud salah H]

لمبة الاي بي اس بتنور علي فترات
فلتر البنزين ممكن يكون اتسد عشان متغيرش من سنة بالظبط
والكهرباء كلها لسة مراجع عليها تمام ومنضف الارضي تمام
كدة زي منا قلت بالنسبة للمشكلة الاولي انا بردوا حسرتها في فلتر البنزين او الطرمبة
المشكلة التانية معرفش بصراحة وهراجع علي فيش الحساسات وانضفها وربنا يسهل

[فادى محمد]

المشكله التانيه عندك بسبب تلف حساس الايه بي اس الشمال
اللي قدام الطاره..وده المسؤل عن عداد السرعه

[sherif moneer]

بص يا باشا كان عندي ال اي بي اس مش متوصل ف كان عداد السرعه مش شغال وكانت العربيه ع الطريق السريع بتفصل ع السلانسيه لكن جوا البلد مش بتفصل
لما وصلت ال اي بي اس وظبطه كل المشاكل دي اتحلت وعداد السرعه اشتغل تاني والعرببه معدتش بتفصل

[ehabahmed0]

حساس السرعه قدام شمال شوفه هاتلاقيه هو اللي فاصل عداد السرعه

[Mamoud salah H]

انا حاليا عند الميكانيكي اهو ولسة بيفك ونشوف حساس الكرنك وربنا يسهل وشكرا علي المسةعدة بجد

[tananybasha]

ايه الأخبار

[Mamoud salah H]

انا لسة راجع من عند الميكانيكي من شوية كدة والعربية كانت بايتة عنده من امبارح العصر كدة وما روحتلوا النهاردة قالي انا جيت علي كل الحساسات ونضفتها وكلها تمام مفيش عيب منها وقالي كدة مفيش غير احتمالين بس مش حيجي جنبهم الا لما اروح لكهربائي ينضف لضفيرة ويظبط السلوك عشان كتيير منها مشعر وعريان ومش مظبوطة وبعد كدة قالي ارجعله تاني عشان يشوف الاحتمالين الي هما(الاي بي اس -طرمبة البنزين)عشان الموضوع ممكن يتحل عند الكهربائي بعد تظبيط السلوك الخاصة والواصلة بحساس الاي بي اس
المهم اني لسة هاروح بكرة للكهربائي بي وربنا يسهل وعلي الفكر الميكانيكي ماخدش مني فلوس خالص

[ashourashour]

بص يا باشا كان عندي ال اي بي اس مش متوصل ف كان عداد السرعه مش شغال وكانت العربيه ع الطريق السريع بتفصل ع السلانسيه لكن جوا البلد مش بتفصل
لما وصلت ال اي بي اس وظبطه كل المشاكل دي اتحلت وعداد السرعه اشتغل تاني والعرببه معدتش بتفصل

فعلا الكلام ده حقيقي

سيبك من كل حاجه

شغل ال كم ان شاء الله العربيه مش هتبطل

[Mamoud salah H]

تم التوصل ان المشكلة في وحدة االاي بي اس الله يرحمها جابت جاز
عايز اجيب وحدة جديدة استيراد اكيد وانا عربيتي اورروبي وسمعت ان الاي بي اس بتعها مختلف ارجو النصيحة

[sherif moneer]

هتجيب وحده من عند حد من بتوع الاستيراد
مكانك فين يا باشا؟