اجيب أسترا ولا بلاش

[hopeless20]

السلام عليكم

انا كنت عامل موضوع هنا بجور علي عربيه في حدود ال 70 بالكتير اوي اوي

http://www.nilemotors.net/Nile/360354-70.html

وبعدين حمايا عمال بيزن عليا أجيب أوبل .. طبعا هو معاه الفيكترا ال 2002 وما شاء الله عليها
وبيحاول يقنعني ب الاسترا ال 2005 وانا بفكر في الياريس جدا

بس بصراحه حلم اني اركب الماني برضه ليه طعم تاني
بس انا خايف من قطع الغيار الغاليه جدا وكمان مش كل الناس بتشتغل فيها واعاده بيع في الارض

طلبي ان حد يفيدني وينصحني هل فعلا أدور علي الاسترا من ضمن الحاجات ؟!
وأني موديل الافضل ! وابعد عن البرازيلي اللي معرفش اصلا هو موديل كام ؟!


الموضوع بتاعي هنا لو مكسل تدخل علي اللينك
ياريت الناس تفيدني وتفهمني كمان الاسعار كام
انا لقيت علي كونتاكت كار العربيه دي ومعرفش السعر ده كويس ولا لا

اوبل استرا 2005 مرفوعة أربع سنوات اتوماتيك أول يد فول ابشن فابريكه من الداخل والخارج استعمال راقي جدا جدا
عامله 67000 كيلو
ومطلوب فيها 64000



السلام عليكم

بعد 5 سنين مع الأكسنت .. العربيه اللي حيلتي اتباعت ..
ودلوقتي بدات أدور علي عربيه تانيه في حدود 70 الف .. واكتشفت ان الزيرو بعيد المنال

وبدات المقارنات .. وكل واحد يقولي خد دي .. لا لا بلاش دي ..
فقولت افكر معاكوا وبراحه كده نتناقش
انا لما دورت كنت بدور علي عربيه اقعد بيها علي الاقل 5 سنين كمان
ولان عليا اقساط ومصاريف و بيت وقريبا ان شاء الله أولاد فمش عاوز حاجه تكلفني صيانه كتير يدوبك الصيانه الدوريه .. ومعنديش مشاكل اعملها في التوكيل كمان لو أضمن .. ومحتاجه حاجه موفره في البنزين جدا .. لاني بمشي كل يوم مش أقل من 60 كيلو .. وبسافر الساحل كتير .. وطبعا يوم ما أفكر ابيع مخسرش كتير (اعرف ناس خسرت اوي في بيع الميجان والاسترا والسويارو)

وبمأني بسوق 60 كيلو وبروح في ساعتين .. يبقي أوتوماتيك أكيد .. ولاني الجو بقه جميل والشمس بقت بتطلع هي وعيالها .. يبقي التكييف لازم يبقي كويس ..


طيب هقولكم فكرت في ايه وتقولولي ايه رايكم
المهم عندي البنزين وقطع الغيار واعاده البيع وتكون ماشيه قليل وعاليه شويه عن الارض .. ومش كل شويه اروح بيها لميكانيكي او يعطل فيها حاجه .. وتكون جديده معديه ال 2005 علي الاقل .. وفبريكه جوه وبره .. ومش لانوس ولا فيرنا


الأوبترا أوتوماتيك

نيسان تيدا أوتوماتيك

ياريس أوتوماتيك بس خايف من موضوع ال 1300

اللوجان أوتوماتيك وداخله دماغي مع ان كل واحد مش معاه يقولي وحشه وكل واحد معاه يقولي ممتازه والتوكيل بيشكروا فيه

الانسر أوتوماتيك 1600 عشان برضه بيخوفوني من ال 1300 .. انا اصلا مبحبهاش وبحس انها غاليه اوي أوي أوي بسبب اعاده البيع وانها مطلوبه

الأسترا أوتوماتيك ,, بس مش فاهم ليه سعرها قليل .. وسمعت ان قطع الغيار في البتنجان وغاليه والغلطه بجون

النيو أكسنت أوتوماتيك .. معرفش عنها حاجه بس بحبها لانها أكسنت زي اللي كانت معايا 1999

نيسان صني .. بس شكلها وحش اوي وبيقولوا بنزين بالعبيط

جولف 4 .. بس اعتقد معديه ال 70000


بلاش سوبارو .. او ميجان .. او بيجو .. وطبعا ممنوع الفيرنا واللانوس

معلش انا عارف ان الموضوع كبير .. بس انا زهقت
وخايف أوي أوي من المستعمل لاني خبرتي قليله جدا وسهل يضحك عليا في العربيه ومش هفهم ..
لدرجه اني فكرت أجيب صيني جديد .. بس خايف متكملش 5 سنين والاقي سعرها بقه في الارض ومشاكلها كترت وقطع غيار في التوكيل وبس وهتبقي حوسه

ايه رايكم ؟!

[esam_ayad]

بص ياباشا
أولا الأسترا مع واحد صاحب أبويا ومره اسطوانة الفرامل الخلفيه باظت وراح التوكيل وغيرها علي كلامه بخمس الاف جنيه.بس في النهاية عربيه جامده وتكنولوجي حلو.
اللوجان جميله بس عايزه المحافظة علي الصيانه الدوريه بتاعتها
اللي أنا أرشحهولك هو الاكسنت موديل حديث من بعد2005 ودي مع ابن عمتي وممرمطها شغل معاه وشغاله وزي العسل بسم الله ماشاء الله.
اليارس بصراحه حاسس انها غاليه علي تمنها ومش بحبها خالص والهوا بيلعببيها علي سرعات بعد الـ100

[أحمد جودة]

بالتفويق ومتابع معاك

واليارس مع واحد صاحبي ماشاء الله بيشكر فيها

[4fun14]

انا نفسى فى اوبل زيك بس بحس انها عربيه حلوه لواحد مش فارقه معاه الفلوس
هيشترى العربيه رخيصه شوية(لو استعمال) بس الحساسات الكتير هتخليه يدفع كتير كل شوية ولما يبيعها هيخسر فها اوى وهيتعب فى بيعها ووقتها يكون الزيرو غلى تانى وعربيته مجبتلهوش حاجه تذكر.
ده غير انى قلقان من سواقه الايزى ترونيك حاسس انى مش هنسجم معاها.
الياريس مع والدتى وبصراحه مش قادر احبها..الكنبه ضيقه جدا والعربيه عزمها ضعيف لدرجه انها ممكن تتزحلق لورا فى المطالع الجامده شوية"العربيه اوتوماتيك" .
التيدا هاتشباك تقريبا شفت إجماع انها عربيه ممتازه

[ashourashour]

اولا الاسترا 2005 هي البرازيلي

ثانيا مش هتلاقي نضيف فى السوق !

[medo111]

اه هي عربيه حلوه وتمام التمام وفلوسها كتير وهي اتوماتيك عادي مش ايزي ترونيك بس احسنلك شوف تيدا لو انت مش عايز وجع دماغ الاوبل لازم تجيبها حاله صح وتوصل للناس الي بتشتغل فيها بسرعه عشان متخسرش لو عندك طولت بال دور علي حاله كويسه اوي وضقق في كل حاجه اوي

[sherif moneer]

طب ما حضرتك ممكن تجيب فيكترا 2002 زي ال مع حماك وبالفلوس دي تقدر تجيب حاجه زيرو واحلى من الاسترا وتكييفها احسن وبتعمل من 190 ل 220 كيلو ف الصفيحه

[hopeless20]

اه هي عربيه حلوه وتمام التمام وفلوسها كتير وهي اتوماتيك عادي مش ايزي ترونيك بس احسنلك شوف تيدا لو انت مش عايز وجع دماغ الاوبل لازم تجيبها حاله صح وتوصل للناس الي بتشتغل فيها بسرعه عشان متخسرش لو عندك طولت بال دور علي حاله كويسه اوي وضقق في كل حاجه اوي

عندك حق التيدا عجباني جدا جدا جدا بس مش لاقيها بتتباع بسعر كويس
يعني دايما اغلي من اللي معايا
بس فعلا لو لاقيتها هتبقي صفقه كويسه
الياريس برضه من ضمن الحاجات اللي بدور عليها

[hopeless20]

طب ما حضرتك ممكن تجيب فيكترا 2002 زي ال مع حماك وبالفلوس دي تقدر تجيب حاجه زيرو واحلى من الاسترا وتكييفها احسن وبتعمل من 190 ل 220 كيلو ف الصفيحه

انا فعلا دورت علي فيكترا 2002 بس ال 1600 مش ال 2000 سي سي وملقتش
واللي لقيته عامل فوق ال 250 الف كيلو وده رقم فظيع
ولو لا قدر الله طلع فيها حاجه هدوخ علي قطع الغيار
بس لو لقيت فعلا الفيكتر ال 2002 حاله كويسه هجيبها


موضوع زيرو للاسف مفيش عربيه أقل من 90 الف
ومش هتبقي عائليه ولا اوتوماتيك

الزيرو غالي جدا جدا جدا ... أقل عربيه ال بي واي دي

حضرتك شايف ممكن اجيب ايه ؟

[nagy wassef]

انا رأى طالما وراك اقساط و مصاريف خليك فى حاجة زيرو ( بس مش صينى طبعا) و طالما انكم لسة عائلة من فردين فقط ، فا ممكن تجيب هاتش باك المهم انها جديدة و بعد كام سنة لما يبقى فى اولاد و تكبر شوية و تحس ان العربية بقت ضيقة عليك ابقى غيرها يمكن ربنا يكون فرجها.

انا قصدى سواء سيدان او هاتش باك ياريت جديدة او بالكتيير كسر زيرو عشان متتعبكش.

المانى كورى يابانى المهم الحالة.

ممكن بروتون ساجا كسر زيرو

[hopeless20]

انا رأى طالما وراك اقساط و مصاريف خليك فى حاجة زيرو ( بس مش صينى طبعا) و طالما انكم لسة عائلة من فردين فقط ، فا ممكن تجيب هاتش باك المهم انها جديدة و بعد كام سنة لما يبقى فى اولاد و تكبر شوية و تحس ان العربية بقت ضيقة عليك ابقى غيرها يمكن ربنا يكون فرجها.

انا قصدى سواء سيدان او هاتش باك ياريت جديدة او بالكتيير كسر زيرو عشان متتعبكش.

المانى كورى يابانى المهم الحالة.

ممكن بروتون ساجا كسر زيرو

المشكله ان أقل حاجه زيرو ب 92000
وانا معيش المبلغ ده
ومش هينفع أقسط
يعني الهيواندي i10 او البيكانتو معدين ال 90 الف ..
فكره انها تكون جديده اوكسر زيرو هي اول حاجه فكرت فيها .. لكني ملقتش حاجه في حدود ال 60-70

[nagy wassef]

شيفروليه سبارك اوتوماتيك 75 الف 1200 سى سى (السعر جبته من كونتاكت كارز)

صغيرة صغيرة ايه المشكلة بس جديدة

او بروتون ساجا كسر زيرو و اسمها سيدان

[sherif moneer]

دور علي فيكترا تكون مكنتها بايظه ومشيعه خالص واشتريها بفلوس اقل من تمنها وغيرلها مكنه وشد مكنه وعفشه علي ايدك ف خلاص اسبوع او 10 ايام يكون موضوع التظبيطات ده خلص
بس ف المقابل هتركب العربيه تمتعك ف السواقه بجد

[mohammed dodda]

رأيى الشخصى والله أعلم أن المناسب لحالتك المادية وظروفك الاجتماعية عربيتين بس من اللى انت قولتهم :اللانسر 1600 اتوماتيك-النيواكسنت 1600 اوتوماتيك..والعربيتين تنطبق عليهم كل الشروط اللى انت حاططها...اللانسر اوسع -يابانى - اعتمادية وحمارة شغل -منتشرة اكتر- ومحرك وفتيس ممتاز وتكييف قوى-صيانة قليلة وسهلة-بيع افضل......ومع ذلك واضح انك ميال للنيو اكسنت..وربنا يوفقك للى فيه الخير