اعتذار .. وطلب مشوره ..

[amraction]

السلام عليكم ..
ازيكم يا احلى عصابه ..

اولا .. بعتذر ليكو .. لانى من شهرين تقريبا كنت بدأت اجدد العربيه ولما لقينا ف المنتدى ان اسعار قطع الغيار ف المواضيع المثبته قديمه من 2008 ... قلتلكو انا هعمل تقرير مفصل بالاسعار الجديده عشان تنفع الناس .. وما عملتوش الى الان
للاسف .. دخلت ف دوامه مرض والدتى ثم وفاتها .. فمعملتش اى حاجه ف العربيه ...

دلوقتى العربيه حالتها كرب .. الموتور خشن جدا .. وزهقت من كتر ما بقالى سنه اعمله سيرفيس وبرضه خشن .. وبرضه بيرشح زيت ..
الفتيس ف الاول و التانى بيعض جامد ..
العفشه بدون مبالغه بقالها سنه ما شفتش تربيط حتى ..

فدلوقتى انا بفكر ف حاجتين ومحتاج رأيكو معايا .. خصوصا كبار العصابه ..

اسمع بنصيحه واحد صاحبى و اجيب نص فيكترا 1600 ايكوتيك اوتوماتيك واسقطه بفتيسه وضفيرته وعفشته وليلته كلها ..

ولا ابيع وازود واشتري حاجه تانيه.. المشكله انى لا عارف العربيه هتجيب كام .. ولا اقدر ازود كام ... بس ممكن نقول هيبقا معايا مثلا 70 الف بعد البيع والتزويد .. انا بفكر ف الميجان ..

بس برضه عايز رأيكم ونصيحتكم ..

[ashourashour]

بيع .. شوف استرا اتش

[ashourashour]

البقاء لله

[medo111]

البقاء لله ربنا يرحمها

[medo111]

من رائي خليك في الاوبل عربيه محترمه

[وائل البرنس]

البقاء لله، اللهم ارحمها رحمة واسعه

[Driver101]

لله ما أخذ ولله ما أعطى، فلتصبر ولتحتسب. الله يتغمدها برحتمه ويغفر لها.

الميجان عربية حكاية بس أعتقد هتكون متعبة أكثر من الأوبل، يمكنك الاستفادة من تجارب الناس اللي كان معاها ميجان وباعت وجابت أوبل زي دكتور هلال.

[amraction]

يعنى هيا الاوبل اللى ريحتنى .. انا بحب الاوبل جدا .. واصيله معايا .. وعربيه فوق الوصف .. وفى عز تعبها ده بتأدى وما بتقولش لا .. بس انا حابب اغير برضه .. بس محتار اغير مكنه وفتيس .. ولا اغير العربيه كلها .. ولو غيرت اغير لايه ..

[إبراهيم المصرى]

البقاء لله

[mido888]

البقاء والدوام لله وحده تغمد الله الفقيده برحمته وألهمكم الله الصبر والسلوان

[hagagatc]

الله يرحمها ويارب تكون اخر الاحزان
لو عربيتك مريحاك وحالتها عموما كويسه فبريكه وفرش وطابلوه كويسه الحاله العامه كويسه خليها واصرف عليها شويه
ولو متهانه ومش حتعرف ترجعها لحالتها بيعها وريح دماغك وموضوع نص فيكترا ايكوتك ١٦٠٠ صعب شويه او نادر تلاقي ١٦٠٠ ايكو تك استيراد الا اذا كان ادامك لان كل الي بيسقط بيسقط ٢٠٠٠ وده صعب في ظل الظروف الي احنا فيها دي وجهت نظري

[tananybasha]

سبحان من له الدوام

البقاء لله

و ربنا يرحمها

[ayman hamdy]

البقاء لله والله يرحم جميع موتانا وموتى المسلمين انا من رايي بيع وهات لك اوبل فيكترا موديل من 2000 الى 2003 2000 سي سي وحش بمعنى الكلمة بس نصحتى دور على حالة نظيفة لان اللى فى السوق كله تعبان ومتستعجلش فى شراء الاوبل بالذات فى التأنى السلامة تحياتى

[sherif moneer]

البقاء لله يا باشا و ربنا يجعلها اخر الاحزان ان شاء الله :)
بغض النظر عن حالة المكنه والعفشه
الحاله العامه لبقيت العربيه ايه؟؟ لو بويه كويسه وصالون مش متهان يبقى انصحك تسقط مكنه احسن
وياريت لو تجيب ال 1600 عشان ال 2000 عايزه محافظه شويه ومش عايزه اهمال و واضح ان حضرتك مش بتفضى للعربيه ده غير انك هتحتاج تجيب دواسات بنزين وفرامل وعصاية فتيس وحاجات من دي
هات نص قدام ايكو تيك 1600 هتلاقي موجود منه
وياريت كمان تجيب دنجل كامل ورا بالمقصات بالمساعدين وفرامل سكينه مش علب
الحكايه دي هتصرفلها حوالي 10000 جنيه
بس ده طبعا في حالة نضافة الصاج والصالون :)

[hilal]

البقاء لله والدوام لله
إذا كان أمامك نصف شبه زيرو ، هيكون أحسن وأوفر ، طبعا تحت إشراف صنايعي محترم ولازم تكون واقف على راسه
وإذا كان أمامك فرصة ممكن تبيع بسعر معقول بدون خسارة كبيرة يبقى التغيير أفضل زي الاستاذ أحمد عاشور ما قال
وفي كل الاحوال ، لا أنصحك بالميجان إلا إذا كان عندك وقت فراغ كبير وشوية فلوس مش محتاجهم ومستعد تتبرع بيهم للصنايعية وتجار قطع الغيار