مشكلة فى استهلاك البنزين كورسا 95 1200

[amr.mohamed85]

انا معايا كورسا 95 1200
من فترة فيها مشكلة فى استهلاك البنزين ورحت الصفا و الدخنة راحت بس العربية لسه بتاكل بنزين جااامد ولو فكرت انك تدوس على دواسة البنزين مرة واحدة للاخر حتى لو وهى واقفة تبرجل وممكن تبطل (زى ماتكون شرقت ) وكان فى الملفات الجامدة الطرمبة مبتسحبش بنزين ففتحت التنك امبارح وطلع فعلا ان الطرمبة مش راكبة مكانها كويس وعانيت اربع ساعات على مظبطها (على فكرة الطرمبة لقيت مكتوب عليها هيونداى ) بس نفس الطرمبة وكده وضغطها عالى
المهم ياباشا فى حساس لونه اسود على اليمين تحت العمة من الجنب داخل فيه فيشة ثلاثية الفيشة بتاعته كانت متهربدة غيرتها بالمرة بواحدة جديدة
الوضع الان : دخنة سودا بطريقة شديدة جدا
العربية مخنوقة جامد جدا مش عارف امشى بيها خطوتين لازم عشان امشى اطلع سنة سنة ولو تقلت رجلى على البنزين ولو حاجة بسيطة تتخنق ومتمشيش قولولى اعمل ايه

منتظر ردكم على احر من الجمر :(
ومتشكر لسعة صدركم

[Gelgel2004]

راجع الصفا لضبط الكمبيوتر

[virus459]

راجع ياباشا علي البوجيهات فك بوجيه لو لقيته اسود غير طقم البوجيهات وانشاء الله العمليه تظبط معاك

[lidosasa]

المشكلة بسيطة بإذن الله
واضح إنهم فى المركز لما رحت ليهم أول مرة ما أكتشفوش إن العيب من طربمة البنزين قاموا مزودين تدفق البنزين اللى داخل لغرف الأحتراق فى الموتور ودا السبب اللى بيخلى فيه دخان لونه اسود وريحته وحشة يخرج من الشكمان ( بنزين غير مكتمل الإحتراق ) إرجع ليهم تانى يظبطوا خليط الهوا والبنزين اللى داخل غرف الإحتراق .

[amr.mohamed85]

بس ياباشا الكورسا فيها حساسات بتظبط نفسها اوتوماتيك
واعتقد ان العيب في حساس من دول

[lidosasa]

بس ياباشا الكورسا فيها حساسات بتظبط نفسها اوتوماتيك
واعتقد ان العيب في حساس من دول

أنا أسف كنت فاكر العربية على كربراتير . بس المشكلة تظل فى إن الوقود مش بيتحرق بالكامل داخل غرف الإحتراق يبقى السبب حيكون حساس أو بوجيهات يعنى الحجات اللى ليها علاقة بإشعال الوقود أوكمية الوقود اللى داخلة غرف الإحتراق

[هيثم الدسوقى]

انت بتحطلها بوجيهات كم شمعة ونوعها ايه؟

وكمان يستحسن تقيس ضغط المحرك

[amr.mohamed85]

بحطلها بوجيهات ngk واحد شمعة لسه مغيرها من 3 ايام
وانا متأكد انها حساس بس منتظر مرور خبراء اوبل لمعرفة انهى حساس ولا رشاش ولا حاجة تانية :(

[TRABYA]

انا ماعرفش انت عندك حساس كولانت ولا لأ بس لو عندك احتمال كبير يكون هو والله اعلم

[فادى محمد]

تي بي اس سنسور او كولانت سنسور

[amr.mohamed85]

ياجماعة للعلم :
الحمد لله المشكلة اتحلت بفضل الاستاذيين العظيمين
فادى وطنانى باشا وكانت فرصة انى اقولكم ان طنانى باشا حيفتح المركز الجديد خلال ايام وربنا يسهل ونكون اول زائرينو :) بس يارب ميشغلوش عننا
وطلع فــــــــــــــــــــــــعـــــــــــــلا حـــــســـــاس كــــــولـــــــــنـــت
بجد ياجماعة الناس دى جدعة جدا