كالون باب أسترا h

[pharohtemo]

يا جماعة أخوكم مزنوق فى كالون أسترا h الباب الأمامى شمال (باب السائق) ...
الكالون باظ و اتحبست فى العربية .. فيه جزء منه مكسور .الراجل صلحه جزئياً و بفتح من جوه بس

[pharohtemo]

النهاردة كنت فى الحرفيين علشان أدور على الكالون و بعد عناء لقيته عند هانى العايدى و بالعافيه فصلته بـ 350 جنيه و روحت مصر الجديدة علشان أركبه عند واحد أعرفه و هنا كانت المفاجأه !! الكالون مختلف فى جزء بسيط .. طيب نحاول نوفق جزء على جزء و نمشى الأمور ؟ لأ أصل الكالون كمان طلع باب يمين علشان العربية اللى أتفك منها دركسيون يمين !! مع ان المليجى أكد لى كذا مرة أن الكالون شمال !!
رجعت من مصر الجديدة للحرفيين و أقنعتهم ان الكالون طلع يمين بس أنا عايز كالون شمال (لا مؤاخذة) و أنطلق الشباب بكل همة و نشاط يدوروا على الكالون الشمال و النتيجة اننا أكتشفنا إن كل العربيات الأسترا المتقطعة جاية من إنجلترا و دركسيون يمين :(
طبعاً كل ده و أنا طالع نازل من الباب اليمين علشان الشمال مش بيفتح ..
طبعاً من الواضح إنى بدور على حاجة مستحيلة و الدليل أن مفيش حد كتب كلمة و لا حتى قاللى ربنا يوفقك و تلاقيه :) بس حأعمل إيه ؟ أرمى العربية ؟ أكيد حأدعى و أحاول أدور تانى يمكن أعرف أجيبه ...
المهم أنا بدأت أحس أن العربية مش عربيتى و مش مبسوط و أنا راكبها .. الحمد لله على كل شىء بس لو الزمن رجع أربع شهور كنت أشتريت يابانى و ريحت نفسى .. قطع غيار متوفرة و صيانة أسهل و حتى العربية نفسها بسيطة و مش معقدة زى الأوبل .
الكالون بتاع الباب بايظ و الشنطة مش عايزة تفتح ! صلحتها و باظت تانى !! ده غير إن العربية مش على طول ماشية كويس و فى الزحمة و الحر بتترج و ترعش فى طلعة الأول و أنا عارف إن الموضوع محتاج أسطوانة و ديسك بس برضه بدرى على عربية عاملة 50ألف كيلو !!!
نفسى أروح مكان يمسك العربية و يراجع عليها من الألف إلى الياء و يكون عنده قطع غيار و يسلمهالى عربية شغالة ...