طلب واتمنى سرعة الرد كورسا موديل 1999

[fanckoosh]

اولا كل سنة وانتم طيبين ثانيا انا محتار جدا وخايف لانى عايز اشترى عربية ومعروض علية كورسا 1999 1000 سى سى فبريكا برة وجوة وتكييف وسنتر وباور بس مش متجنطة والمعرض بيقولى 36000 وهوه هياخد 500
محتاج رأيكم بجد لانى فى حيرة من امرى لانى عندى 127 توب مش عارف ابيعها ومش عايز اندم تانى وربنا اعلم انى الفلوس دى انا جايبها ازاى
شكرا مقدما على الردود اللى انا متأكد انها هتفيدنى جدا فى اتخاذ القرار

[fanckoosh]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[Ahmad Allawy]

معلش انا اولا باتأسف علي اني ماخدتش بالي من مشاركة سعاتك..
معلش المواعيد في رمضان ملخبطة شوية.. و ف الشغل مش بادخل كتير علي المنتدي.. بتبقي تاخطيف كده..
المهم.. نصيحة لوجه الله تعالي.. لو عايز كورسا.. يبقي تبعد عن ال1000 سي سي دي خالص..
لأكتر من سبب.. انها 3 سلندر بس.. و موتورها معقد شويتين.. و فيها حساسات كتير.. و مشاكل الحساسات دي انها صعبة محدش بيفهم فيها كتير.. و مكلفة شوية في صياناتها و سعرها..
الافضل منها بكتير لو انت عايز كورسا.. يبقي موديل 94 او 95 او 97.. دول 1200 سي سي..
4 سلندر..موتور بسيط جدا و مفيهوش عك كتير..
العربية دي مش باور.. و بتنزل من برة مش مكيفة.. لو فيها تكييف بيبقي متركب هنا في مصر..
السعر هيكون بيلعب بين 35 و 40 الف.. و ممكن تزيد عن 40 كمان.. حسب الحالة..
لو انت عايز تركب الماني.. عندك البدائل المتاحة.. الكورسا 1200 او ابيزا 1300 موديل 94.
هتبقي في نفس حدود السعر تقريبا.. و مكونات كلها الماني.. و برضه نفس النظام.. زجاج كهربا امامي بس.. و مرايات كهربا تقريبا مش متأكد من دي.. و مش باور و مش تكييف..
العربيتين سعر قطع غيارهم معقول جدا.. و ممكن تاخد لفة كده في الزكن بتاعنا هنا..
و تشوف اهم الموضوعات المتعلقة بالكورسا.. هتلاقي في اسعار قطع غيار هناك..
الابيزا في حاجات ارخص من الكورسا و في حاجات اغلي.. بس الفروق صغيرة قوي..
فكر و قرر انت عايز ايه.. و ان شاء الله هنقدر نفيدك و كلنا جنبك..
لو كورسا انا تحت امرك.. ولو ابيزا عندنا هنا النجم محمد ابيزا هيظبطك في اي حاجة فيها ان شاء الله.. و ربنا يوفقك ان شاء الله..
و انا اسف مرة تانية لو كنت اتأخرت شوية عليك ف الرد..

[fanckoosh]

ربنا يخليك يا احمد بيه ولا يهمك وبشكرك جدا جدا جدا على ذوقك وردك علية
انا كنت هشترى كورسا مو94 بس فى يوم ما هشتريها صاحبها سحب كلامه وقاللى انا هديها لاخوية عموما ربنا يبارك للجميع
وانا هحط كلامك قدام عنية وربنا يوفقنى ويسهل حالنا جميعا ويوفقنا لما يحبه ويرضاه

[Ahmad Allawy]

في ايه يا باشا..؟؟
شكر علي ايه بس..؟؟ ده واجب علينا..
عموما كل شيء نصيب.. و خيرها في غيرها ان شاء الله..
و ان شاء الله يكون نصيبك في حاجة احسن من اللي راحت ان شاء الله..
ممكن تبص بصة كده كان في عربيتين كورسا للبيع هنا قريب في قسم البيع و الشراء..
شوف كده و لو حبيت ابيزا.. خلي محمد ابيزا يشوفلك حاجة كويسة..
و ربنا يوفقك ان شاء الله..

[fanckoosh]

اتمنى كده انا ممكن ادفع لحد 35000
أيا كانت اوبل او ايبيزا ولو ان انا حبيت الاوبل قوى ومعشعشة فى دماغى جدااااا

[Ahmad Allawy]

كده ممكن تلاقي كورسا..
بس احب انبهك ان حالتها ممكن تكون مش فد كده..
يعني ممكن تكون محتاجة شغل.. و ممكن تصرف عليها بحيث تعدي معاك ال37 و ممكن تعدي ال40 كمان لو مبهدلة..
عشان الالماني مش بتاع شغل اي كلام..
محتاج تصرف شوية عليها و مش تسترخص فيها..
تجيب الحاجات الاصلي.. و تتعامل مع حد فاهم فيها..
تعيش معاك و تعيشك ملك معاها.. و تمشي زي الساعة..
عموما.. خلينا ندور و بلاش نسبق الاحداث..
يعني ممكن نلاقي حاجة الشغل اللي فيها خارجي او شكلي و كده نبقي وصلنا لحل وسط..
عموما.. ربنا يوفق و يرزق ان شاء الله..

[fanckoosh]

ربنا يخليك لية يا حبيب قلبى ويدوم بينا المعروف وانا اتشرفت فعلا بمعرفتك

[moh2015]

انا ببيع عربيتي ااكورسا 1000 سي سي
لو عايز تشوفها انا تحت امرك
و مش هانختلف فى السعر ان شاء الله

[fanckoosh]

انا ببيع عربيتي ااكورسا 1000 سي سي
لو عايز تشوفها انا تحت امرك
و مش هانختلف فى السعر ان شاء الله

شكرااا يا جميل بس اعتقد انك قريت الكلام بتاع احمد بيه علاوى وعموما ربنا يكرمك وتبيعها

[dodo8499]

بعد الاوبل ماتفكرش

[fanckoosh]

بعد الاوبل ماتفكرش

شكرااااا يا جميل