إستفسار ﻷهالى الزقازيق

[ashrooof]

انا عاوز ميكانيكى وكهربائي بيفهموا فى الاوبل علشان عندى شوية شغل وعاوز اعرف كمان فين اقدر اضغط دورة التبريد لمعرفة مكان التسريب علشان المية بتنقص ومش باين حاجة.انا كنت بعمل شغل الميكانيكا عند مدحت قورة بس الباشا بقالة سنتين مابشتغلش الا في اليابانى والكوري علشان سهل وبيرفض يشتغل فى الاوبل وبعدين بقيت اروح لعصام اللى ادام السمباوي بتاع الاستيراد امتداد شارع وادى النيل ولكن البيه برضه قلل الشغل فى الاوبا وشغال جديد بس يظهر عربياتنا قدمت وراحت عليها، انا معايا فيكترا 95 2000 اوتوماتيك.

[mhopa2440]

حضرتك في ميكانيكي كويس جدا جدا وامين ف شغله قوي انا بتعامل معاه وانا واصحابي

انا كنت سألته قبل كدا على الاوبل قالي انه شغال فيهم عشان كنت بفكر اشتري اوبل

عموما ممكن تجربه وانت اللي تحكم مش انا لو شغله عجبك يبقى تمام لو في حاجة يبقى حصل خير واتمنى انه يكون خير ليك

هو قدام بنزينة وطنية اللي عند المرور في الجهة التانية من الطريق قدامها بالظبط تقف الناحية التانية بالعربية كانك رايح بلبيس لما تكون البنزينة على الشمال بص يمين هتلاقي محل اسمه العمده على ناصية شارع ادخل الشارع دا اول محل على اليمين مباشرة تقريبا في نفس بيت محل العمده اسمه محمد هو ولد شباب بس شاطر ما شاء الله عليه

لو رحت ليه او محتاج اي شئ تواصل معايا وربنا يوفقك ان شاء الله

[ashrooof]

شكرا ياباشمهندس وان شاء الله هروحله وابلغ حضرتك بالنتيجة. ماتعرفش كمان كهربائي وبتاع رادياتير؟

[mhopa2440]

بس ضروري لما تروح ليه تعرفني النتيجة سواء كانت ايجاب او سلب عشان لو حد سالني اقدر افيده قدر المستطاع

اما بالنسبة للكهربائي اسئله محمد الميكانيكي دا على كهربائي ف واحد ف اول العصلوجي بس راجل محترم جدا وشغله كويس هو قال لي صديق لي عليه وعمل شغل عنده وكان تمام

بس لما تروح للميكانيكي عرفه انك صاحبي قوله انا معرفة محمد صاحب النوبيرا النبيتي وصديق احمد ومحمد اللي عندهم مازدا (حتى هو كان شغال ف عربية صاحبي مازدا 3 كانت طالعه من حادثة والمفروض اني هروح ليه بكرة استلم العربية دي من عنده)

[ashrooof]

شكرا ياباشمهندس وان شاء الله لو خلصت المستشفي بكرة بدري هروحله علشان عاوزه يبصلي علي دورة المية لان مية القربة دايما بتنقص ومش عاوز العربية تسخن وطبعا لازم ابلغك كفاية ذوق حضرتك.

[mhopa2440]

معرفش هتلحق تقرأ الرسالة ولا أيه

بس انا هكون عنده انهاردة الساعة 2:00 إلى 2:30 ظهرا هاخد عربية صاحبي من عنده

وربنا يوفقك ويكرمك ان شاء الله ويكتب لك الخير

[ashrooof]

انا للاسف ملحقتش اقرا رسالتك ومكنتش فاضى خالص علشان اروحله بس بكرة ان شاء الله ناوى اخلع بدري من الشغل واعدى عليه بس على الله يكون موجود وفاضى ويخلص لان البلد النهاردة كانت زحمة موت بسبب المدارس وكل ينة وحضرتك طيب.
بالمناسبة عربية زميلك عملت ايه؟ خلصت واتصلحت كويس؟

[mhopa2440]

اها الحمد لله اتظبطت تمام

هي اصلا مازادا 3 كان عامل بيها حادثة وموالها موال كبير كل شوية تطلع بحوار بس الحمد لله تقريبا خلصت

وانا قلت ليه انه في واحد صاحبي هيعدي عليه معاه فيكترا 1996 تقريبا وربنا يكرمك ان شاء الله

[ashrooof]

شكرا ياباشمهندس انارحت لمحمد امبارح بس طبعا فى الاول تهت ومشيت لحد بردين وبعدين رجعت تانى لحد ماوصلت عند العمدة ولقيت الورشة. وطلع فعلا ذوق جدا وقلت له انى من طرفك وعنده صبر لانه فك جنب العربية كله لحد مالقي العيب من طرمبة المية والكوعة الألمونيوم الطويلة فغيرنا الاتنين وبالمرة سير الكتينة والدينامو وبلية الشداد بالمرة لان كل حاجة كانت مفكوكة وفرصة..بس دخلت في حسبة كبيرة اوى حوالى 1300 جنيه وهو طلب 180 جنيه مصنعية وانا مفاصلتش معاه مع انى شايف المبلغ زيادة شويتين ولسة هروح له تانى علشان يظبط قواعد الموتور وينضف الرشاشات. هو باين عليه فاهم ومؤدب جدا وشكرا ليك جدا ياباشمهندس.

[mhopa2440]

الحمد لله تمام انك وصلت ليه
انا فعلا مش بفاصل معاه ف اي سعر لاني كدا كدا بروح ليه مش هتفرق عشرة ولا عشرين جنيه زيادة وانا فعلا كتير بشوف ان مصنعيته غالية شوية ساعات بنزل معاه وساعات لآ
المهم هو المصنعية مش عشان توفر خمسين جنيه واحد يسيب لك ديل ف الشغل يكلفك قد كدا فلوس المهم انه يكون شغله تمام معاك وظبط لك الأمور دي اهم حاجة حوار الفلوس دا انت وشطارتك معاه

لما يخلص شغل خالص عرفني رأيك بكل صراحه فيه عشان لو في حاجة اقدر استفيد انا كمان واوجه اي حد يسألني لانه والله قلت ليك عليه وانا خايف يكون مش تمام قوي مع اني مقتنع انه كويس وامين وفاهم شغله ولو في حاجة برجع ليه مرة واثنين وعشرة لعند ما تبقى تمام وميه ميه

وربنا يكرمك ويوفقك ان شاء الله

[bebo12]

ان شاء الله هعدي عليه انا كمان....لاني عاوز انظف الايدل كونترول...
شكرا لكم على الموضوع ده :)
.................................................. .
بس في محل محترم بالزقازيق لبيع قطع غيار الاوبل باسعار معقوله؟؟؟

[ashrooof]

عدى عليه وقول له انك من طرف د.اشرف وهيعمل الواجب معاك ولو عاوز محل قطع غيار جديد عندك سمير شعبان قبل مزلقان الزراعة تحت الكوبرى وهتلاقى هناك هانى أو شريف أو وليد وقول لهم انا من طرف د.اشرف صاحب الفيكترا الفضى.

[bebo12]

عدى عليه وقول له انك من طرف د.اشرف وهيعمل الواجب معاك ولو عاوز محل قطع غيار جديد عندك سمير شعبان قبل مزلقان الزراعة تحت الكوبرى وهتلاقى هناك هانى أو شريف أو وليد وقول لهم انا من طرف د.اشرف صاحب الفيكترا الفضى.

ان شاء الله هعدي عليه بعد بكره..وهبلغك بالنتائج...

شكرا جزيلا ... :)

جزاكم الله كل خير..