إيه اهم حاجة اتأكد من حالتها أثناء الكشف على أوبل استرا gtc 2007 ؟؟

[5aled3li]

أنا قدامي عربية اوبل استرا gtc 2007 ستب-ترونيك .. العربية حالتها العامة كويسة ..
محتاجة بس تيش ميزان ومرايات جانبية .. و المساعدين الخلفي حالتهم تمشي بس مش 100% ..

إن شاء الله هروح اكشف عليها في مركز صيانة أوبل نفسه .. عايز أعرف بس إيه اهم حاجات مينفش اتهاون فيها لو حالتها فيها قلق و إيه ممكن يعدي ؟؟
و إيه أكتر عيب متكرر في العربية دي ؟؟

أنا قلت اسأل الخبراء هنا عشان أنا عمال اقرا المواضيع و منبهر بالناس هنا :) فيا ريت أي مساعدة هنا جزاكم الله خيرا :)

[احمد فهمى]

lاهلآ بيك مقدمآ
1 اتأكد ان ال 4 ايرباج شغالين وفى اماكنهم
2 ادخل بالكمبيوتر اقراء الكيلو متر بتاع العربيه من الكنترول نفسو مش من العداد
3 شوف ملف صيانتها واخر صيانه
4 راحتك النفسيه نفسها للعربيه وصاحبها
5 الشاسيه خارجى وداخلى
6 اركب العربيه واتآكد ان الكنترول بينقل فى وقتو ومفيش تعليق وخلى مختص الكشف يختبرو
7 جرب التكيف وجميع المخارج للهواء
الباقى اللى انت قولتو يتلم بسهوله وده طبيعى فعربيه مستعمله
■ والعربيه ملهاش عيوب هي نفسها الفيكترا والأسترا العاديه ومفيش مشاكل ممكن تعدى لأنها عربيه مانيوال اصلا يعنى اقصى حاجه هتغير اسطوانه وديسك ولو كنترولهم بيتصلح وده اسؤ فرض فى العربيه بشكل عام لا قدر الله ولو فيهم حاجه بتبان فى الكشف والعربيه دى تحفه لو سليمه اشتريها ﻷنها مش هتتكرر ونادره جدآ

[5aled3li]

اولا شكرا ليك جدا على الترحيب و الإهتمام ده فعلا :)
1- هي العربية easy-tronic .. مش عارف قصدك يعني إن الgearbox زي المانيوال فمشاكله حلها بسيط ؟؟
2- الراجل صاحبها كان صريح معايا في كذا عيب و هو اللي طلب لو قررت اخدها إني اكشف عليها عشان مفيش حد بياخد حاجة كده عمياني
3- أنا شفت التكييف في أول مرة كان كويس جدا و هو اصلا لسة مغير مروحة و سربنتينة و وراني القديمة عشان اتاكد إنها مش مخبوطة من قدام أو كده .
4- نفسيا أنا مرتحلها جدا جدا وبتمني ميكنش فيها عيوب صعبة عشان اخدها فعلا

لو في أي نصائح تانية كده جت في بالك قلهالي بقى جزاك الله كل خير :)
معلش أنا عارف إني طولت عليك بس ماصدقت حد فاهم يفيدني :D

[احمد فهمى]

ال easy tronic يا اخى الفاضل فتيس مانيوال عادى به اسطوانه وديسك وبليه زى اي عربيه مانيوال مع كنترول هو اللى بيدوس الدبرياج وبينقل بدل منك يعنى مش اوتوماتيك بنظام ضغط الزيت زى العربيات الاوتوماتيك ومميزاتو انو سهل الصيانه والتسارع اعلى وموفر فى البنزين جدآ
■ وسعر العربيه ال gtc فى المستعمل ارخص من قيمتها الفعليه عشان كوبيه وبانوراما مع ان ده ميزه بس السوق المصرى كده فهى فرصه جيده للى بيقهم واي حاجه تحتاجها اسآل واحنا معك

[5aled3li]

ربنا يخليك ولله على اهتمامك :)

أنا بس جديد في العربيات ودي أول عربية أجيبها في حياتي و طبعا كله عمال يقولي ياباني و كوري و صيانة و قطع غيار و كلام محفوظ كده و أنا مصمم على حاجة نضيفة زي الاوبل ... و اطمنت أكتر لما دخلت هنا و أعدت اقرا مواضيع الناس اللي بيفهمو فعلا و مدحهم فيها :)

عموما شكرا جدا تاني على اهتمامك و إن شاء الله أول بأول كده لو في أي حاجة كده في العربية هاخد رأيك فيها إن شاء الله "ده بعد اذنك طبعا" :d

[احمد فهمى]

ربنا يكرمك وتكون فيها الخير لك والكورى واليابانى اكيد محفوظه وملهاش مشاكل ولا بتحتاج صيانات كتيره بس مش ركوبه ولا امان زى الالمانى يعنى كل شئ بتمنه ..

[احمد فهمى]

وطبعآ العربيه دى سعرها فى الستينات لو سليمه عشان بس تبقى عارف يعنى 65 ل68 مثلآ وده مش عيب فيها لا عرض وطلب ولعلمك كانت اغلى من كل اﻷسترا العاديه زيرو

[ashourashour]

وطبعآ العربيه دى سعرها فى الستينات لو سليمه عشان بس تبقى عارف يعنى 65 ل68 مثلآ وده مش عيب فيها لا عرض وطلب ولعلمك كانت اغلى من كل اﻷسترا العاديه زيرو

مفيش الكلام دا ياحمد !

[احمد فهمى]

مفيش الكلام دا ياحمد !

طيب وضح اﻷسعار للراجل يا عشور عشان بيشترى

[5aled3li]

مفيش الكلام دا ياحمد !

طب هي اسعارها الطبيعية للموديل ده في حدود كام ؟؟

[Abdo Taha]

الموديل ده كان زيرو ايامها ب 175000 جنيه بس مكانش منتشر اوي زي الاسترا العادية

[احمد فهمى]

فى واحده على كونتاكت كارز عامله 87 الف كيلو تقريبآ وطالب صاحبها 68 الف كلمو وشوف

[5aled3li]

فى واحده على كونتاكت كارز عامله 87 الف كيلو تقريبآ وطالب صاحبها 68 الف كلمو وشوف

ما هو ده اللي أنا نزلت شفت عربيته :d

استفسار بسيط كده بقى ... أنا إن شاء الله هنزل بكرة نكشف عليها إن شاء الله .. إيه الاماكن الموثوق منها و الكشف بيكون في حدود مبلغ اد إيه ؟؟
أنا في مدينة نصر و سمعت عن مركز صيانة عند مسجد السلام عند بنزينة وطنية و عن مركز خدمة أوبل معتمد في بنزينة موبل في الحي الثامن ...

[ashourashour]

ال gtc كسر الزيرو بيتطلب فيها اكتر من الفكترا سي اول فئه

[5aled3li]

ال gtc كسر الزيرو بيتطلب فيها اكتر من الفكترا سي اول فئه

أنا ادركت ليه العربية معروضة بالسعر ده "68000" ...
النهاردة روحت كشفت عليها و لقيت حالتها سيئه جدا "رأي المهندس اللي شافها قال لي بالحرف : دي اكنها رقاصة عايز تجوزها لشيخ :D "

المهم أنا قلت أكتب التقرير بتاعها هنا عشان اكون عملت كل اللي عليَّ قبل مااخد أي قرار ..

1- تلاتة فرد كوتش
2- 2 مساعد خلفي
3- خبطة بالعكاز امامي شمال
4- اويل سيل كوبلن شمال
5- طنابير أمامية
6- مرمة فردة شاسيه شمال
7- مرمة بالدواسة امامية شمال
8- زجاج خلفي غير أصلي
9- بارومة بالقائم الايمن
10- نظام Airbag
11- اطمة دريكسيون

لو حضترك تعرف تديني نصيحة هكون شاكر ليك جدا :)
أنا بنسبة 95% صرفت نظر بس قلت اسال أهل الخبرة هنا :)