صوت من ناحية الكاتينة وطلمبة لباور

[MaaM]

عندي صوت جاي من ناحية الكاتينة وطرمبة الباور
الصوت ده بيجي بعد اما العربية تسخن ويكون مشوار كدا بتاع نص ساعة
ولو دورت العربية بعد ربع ساعة بعد اما ابطلها ، الصوت يختفي مع انها بتكون لس سخنة
وبيظهر تاني بعد شوية ، يعني اما امشي على الغيارات

صوت المكنة من غير صوت الونة
no voice

صوت المكنة بـ صوت الونة
with voice

[فادى محمد]

ده غالبا يا محمود صوت احتكاك او خشونه بليه ..
المنطقه دي فيها بليه الكاتينه وبليه شداد سير الدينامو
لازم تفك السيور علشان تعرف..

[MITSUKERO]

فك سير ثم جرب و التالي ثم جرب و هكذا لحد ما تلاقي مصدر الصوت

[EGYPTIANDR]

ده غالبا يا محمود صوت احتكاك او خشونه بليه ..
المنطقه دي فيها بليه الكاتينه وبليه شداد سير الدينامو
لازم تفك السيور علشان تعرف..

كلام استاذ/فادى سليم انا كان عندى نفس الطقطقة دى فى نفس المكان وطلعت من بلية شداد سير الدينامو والميكانيكى فكها وزيتها وبقت تمام...

[Hesham.H]

خلى بااااالك لان ده اللى حصل معايا ... وطلعت بليه شداد الدينامو
المنطقه دو اللى ممكن يطلع الصوت ده منها
بليه شداد دينامو أو كتينه .. بليه دينامو خشنه بس انا استبعد دى من الصوت اللى سمعته
طرمبه ميه وطرمبه باور ... اكشف عليهم بس عند صنايعى وياريت تستخدم الطريقه العظيمه بتاعه فادى
مفتاح حديد طويل وتدور العربيه وتبدأ تحط ناحيه من المفتاح على الحته اللى عاوز تكشف عليها والناحيه التانيه على ودنك ( بالظبط كأنك بتكشف عليها )
جرب كده وقولنا عملت ايه

[أحمد جودة]

راجع على بلية الدينامو او الشداد

تحياتي

[saddam]

صديقي المواطن
بلية الشداد أو بلية البور وأحيانا.بيطلع الصوت لو.نقص زيت الباور وأحيانا يكون السير هو السبب بس غالبا الصوت هو صوت بلي
ودمتم للنضال

[lancerevolution]

حصل معايا وكانت شداد دينامو و الميكانيكى و قالى طرمبة باور و العفشجى أكد بس طلعت شداد دينامو و قفشت منى :(
انا جبت البلية لوحدها صينى بس مكتوب عليها تركى كانت عاملة 75 جنية

[MaaM]

متشكر جدا عاى اهتمامكم وفي اقرب فرصة هابص عليها وابلغكم بالاخبار

[MaaM]

كنت في مدينة نصر النهاردة وقولت اعدي على صابر بالمرة اشوف الصوت ده سببه ايه
وكالمعتاد ندهت على أحمد عجورة (صنايعي ممتاز) وفك سير الدينامو وقالي الصوت ده جاي من طرمبة الباور
طبعا ما اقتنعتش قومت جايبله بلية كاتينة وبلية شداد الدينامو وطرمبة مية وقولتله غير وكان معايا سير دينامو كان محمد طناني اشترهولي خليته يغيره بالمرة

والنتيجة باردوا الصوت لسا موجود وأحمد قالي مانا قولتلك طرمبة باور !

الملاحظات
طرمبة المية ، أحمد فكها من غير مايدق عليها بس طلع عينه في المسمار الأخير وغيرهولي بواحد تاني عشان هو دق عليه شوية
طرمبة المية اللي كانت راكبة كانت DOLZ أسباني والريش بتاعتها حديد زهر وكانت بحالتها

بلية الكاتينة القديمة كندي والبلية نوعها كوري وبحالتها ، وعجورة قالي ركب الجديدة طالما فتحنا

بلية شداد الدينامو مرضاش يغيرها وقالي كويسة ومافيهاش أي صوت ، وانا احتفظت بالجديدة معايا

طرمبة المية الجديدة اللي اشترتها اسمها Geba ألماني ، تقفليها مقارنة بالـ DOLZ تعبانة جدا لكن أتقل من الـ DOLZ والجديد بقى ان الريش بتاعتها حديد صلب وده اللي خلاني أشتريها

بلية الكاتينة اللي اشترتها كندي باردوا بس البلية بتاعتها NTN ، البائع قالي ان البلية ديه ياباني ، بس انا دخلت على النت النهاردة وعرفت ان الـ NTN ديه شركة ليها مصنع في اليابان وفرنسا وأمريكا والصين ، بتاعتي من عند انهو بلد بقى معرفش

الأسعار
- طرمبة مية Geba ألماني 275 جنيه ، ريش حديد صلب
- طرمبة مية GGK أسباني بـ 225 جنيه ، ريش حديد ظهر
- بلية كاتينة كندي 275 جنيه
- بلية شداد الدينامو 90 جنيه

بالمناسبة الأسعار ممكن تكون أغلى 25 جنيه أو اكتر شوية وده بسبب إن الحاجات ديه من محل الوطنية اللي مدينة نصر
الراجل اللي هناك دايما متعنطظ على بضاعته وان مافيش زيها
بالرغم من احتمالية عدم دقة كلامه إلا إن فعلا عنده بضاعة ممكن ماتلاقيهاش عند ناس تانية

---------

انا عايز اجرب حوار الحديدة دا يا هشام ، احط طرف الحديدة فين بالظبط في طرمبة الباور ؟
في خزنة الزيت ولا جسم الطرمبة ولا بلية السير بتاعتها ؟

[Hesham.H]

انا عايز اجرب حوار الحديدة دا يا هشام ، احط طرف الحديدة فين بالظبط في طرمبة الباور ؟
في خزنة الزيت ولا جسم الطرمبة ولا بلية السير بتاعتها ؟

الفكره دى بتاعه فادى ولما روحت لحسام اوبل فى طنطا لقيته عاملها بسماعه دكتور .. خلانى اجربها وكانت ممتازه جداا
جرب بس خلى بالك من السير وقولنا عملت ايه

[MaaM]

الصورة ديه من عربيتك يا هشام ؟

[Hesham.H]

الصورة ديه من عربيتك يا هشام ؟

ايوه من عربيتى يا باشا ... معلش الموتور عليه تراب شويه عشان من فتره ما اتغسلش

[MaaM]

لا مش موضوع تراب. اصل مواسير التكييف عندك عاملة منحنى زي اللي عندي بالظبظ واحمد عجورة عملي فيلم على الموضوع ده وان المواسير مش اصلي ووراني مواسير في عربية تانية وكانت ماشية مستقيم
الفكرة في ايه بقى ! ان المواسير عندنا قريبة جدا من بكرة طرمبة الباور ولو لمستها وهي بتلف هاتتشرخ عالطول

المواسير الي كانت متشية مستقيم كانت بعيدة عن بكرة طرمبة الباور

[Hesham.H]

لا مش موضوع تراب. اصل مواسير التكييف عندك عاملة منحنى زي اللي عندي بالظبظ واحمد عجورة عملي فيلم على الموضوع ده وان المواسير مش اصلي ووراني مواسير في عربية تانية وكانت ماشية مستقيم
الفكرة في ايه بقى ! ان المواسير عندنا قريبة جدا من بكرة طرمبة الباور ولو لمستها وهي بتلف هاتتشرخ عالطول

المواسير الي كانت متشية مستقيم كانت بعيدة عن بكرة طرمبة الباور

يا عم العربيه الحمد لله على وضع بلادها وممكن هو بيتكلم عن البى ١ ... وكمان ايه اللى هايخليها تلمس الطنبوره من اساسه