مشكله غريبه فيكترا 96

[احمد الصعيدي]

السلام عليكم مشكله في العربيه فيكترا 96 اوتوماتيك 2000 سي سي
اول مادور العربيه تطول في الدواره ولمبه اعطال الفتيس تنور ابطلها وادورها تاني تدور عادي خالص وكأن مافيش حاجه الموضوع ده بيتكرر بس مش في كل مره ادور فيها العربيه احيانا بتدور طبيعي خالص للعلم من فتره عملت شغل كتير في العربيه وكانت ماشيه تمام يعني غيرت حساس الكولنت وحساس الماف والسيلكتور سويتش والبطاريه وطرمبه البنزين وكمان ركبت رشاشات استيراد وطبعا البوجيهات والسلوك وكنت عملتلها طقم سرفيس كامل ياتري ممكن يكون ايه السبب

[ahmedkasem]

لمبة اعطال الفتيس ليها اكتر من سبب
1- فيوز
2- فيشه من فيش حساسات الجيربوكس مهزوزة او مش راكبة كويس او عايزة تتنضف
3- حساس من حساسات الفتيس فيه مشكلة
4- زيت الفتيس حفيف او محروق وعايز يتغير
5- السيلكتور سويتش فيه مشكلة او فيشته مش راكبة كويس وبتتهز

[احمد الصعيدي]

السؤال لازم اسكانر ولا ايه الحل

[احمد الصعيدي]

سؤال تاني واسف علي الازعاج هل الكشف بالكمبيوتر هيحدد المشكله بالظبط لاني قبل كده كشفت علي العربيه وحسيت ان اللي عملي الكشف بيخمن من دماغه

[ahmedkasem]

ابدأ بالكشف اليدوي الاول
يعني شوف الفيوزات واتأكد ان فيش حساسات الجيربوكس وفيشة السيلكتور سويتش راكبين كويس ولا لأ وممكن تنضف الفيش باسبراي التنضيف
بعد كده تكشف على الزيت وتشوف لونه ولزوجته وريحته ومقاسه
وتجرب العربية
لو اتحلت المشكلة يبقى خير وبركة خصوصا ان الحاجات دي سهلة وممكن تعملها بنفسك
ولو لاقدر الله متحلش يبقى تكشف اسكانر

[احمد الصعيدي]

والله اللي قدرت اعمله اني اكشف علي زيت الفتيس ولقيته كويس اما موضوع حساسات الجيربوكس وفيشه السليكتور سويتش فدول معرفش هما فين اساسا

[ahmedkasem]

بص يا غالي
الموضوع اسهل مما تتخيل
انت هتفتح الكبوت وتبص على الجيربوكس من فوق هتلاقي فيه اتنين حساس وكل حساس فيهم طالع منه سلكتين وفي اخر السلكتين هتلاقي فيشة
كل اللي هتعمله انك هتفك الفيش دي وتنضفها باسبراي التنضيف وتستني 5 دقايق لحد ما الاسبراي ينشف وتركبهم تاني ولو كلبسات الفيش مكسورة او مش كويسة ممكن تربطهم بالافيز البلاستك اللي بيتربط بيه طاسات العربية
وبالنسبة لفيشة السيلكتور سويتش لو مش عارف مكانها يبقى هتمشي مع السلك اللي طالع من السيلكتور سويتش لحد ما توصل للفيشة وهتعمل نفس اللي عملته مع فيش الجيربوكس



سؤالي بقى انت جبت الماف بكام ومنين ؟

[احمد الصعيدي]

حساس الماف ركبهولي محب الكهربائي ده عندنا في اسيوط وعلي ما اتذكر سعره كان 300 جنيه بس هو مش بتاع اوبل اعتقد بتاع كيا انا الذاكره بتاعتي سيئه شويه لان الموضوع ده من اكتر من شهر بس تقريبا هو ده السعر

[احمد الصعيدي]

عملت موضوع تنضيف الفيش ده بس المشكله زي ما هيا

[tananybasha]

لازم اسكانر
بلاش تخمين

[احمد الصعيدي]

اخيرا النهارده تم حل مشكله العربيه بعد رحله من الكفاح للبحث عن سبب المشكله مابين كشف بالكمبيوتر مرتين ومابين الكهربائيه والميكانيكيه النهارده واحد منهم توصل الي ان سلك حساس الكولنت فيه طرف مقطوع والخرطوم الواصل من حساس الماف للبوابه ايضا مقطوع فمش مظبط معدل دخول الهوا سبحان الله اعطال لم تخطر ببالي اوببال اي حد رحت عنده واحد من اللي كشفوا علي العربيه بالكمبيوتر قاللي حساسات فتيس حسيت انه مش فاهم حاجه رحت لواحد تاني فالي حساس كولنت وحساس ماف وكنت لسه مغيرهم من فتره قريبه واخيرا الميكانيكي الاخير قاللي هنحاول نشوف ايه المشكله وسبحان الله معرفش ازاي توصل للسلك المقطوع وللخرطوم مع انه كان مقطوع من تحت ومش باين خالص

[tananybasha]

الحمد لله
سلكه تفرق كتير يا باشا

[احمد الصعيدي]

والله ده توفيق الحمد لله انا كنت حاسس ان مافيش امل والموضوع برضه جه صدفه لان السلك مقطوع بعيد عن الفيشه وطرف واحد بس وشكرا علي مجهوداتكم معانا

[tananybasha]

الشكر لله وحده
و احنا دماغ واحده بتكمل بعض
اصل انا كنت فى مشكله شبيهه لمشكلتك
و برضوا ربنا كرمنى و حلتها بعد ما احتار فيها من يسمون نفسهم استاذة الأوبل

[احمد الصعيدي]

ياباشا انا متابع للمنتدي من زمان وعارف انك كنج الاوبل في مصر وياما استفدت من خبراتك