استلام أوبل أسترا 2014

[toni4toni]

الحمدلله تعاقدت انهارده على استرا 2014 ب 196000 سوداء و الاستلام ان شاء الله كمان يومين
كنت عاوز أعرف ايه اللى ابص عليه كويس و أنا بستلم العربية و ايه اللى أركز عليه

[M I D O]

الف مبروك وربنا يباركلك فيها وياريت تبص علي العربية كلها و الدهان كويس ميكونش حتت اللون مختلف عن حتت وتبص تحت العربية وتراجع علي العدة كويس وتجرب كل حاجة في العربية من انوار و كاسيت و ازاز وسنتر

[Omar Gamal]

ألف مليون مبروك يا ريس، ربنا يحفظهالك و يكفيك شرها.

يا ريت بعد الإستلام تقولنا إيه أبرز التغييرات في ال 2014، سمعت إنهم صلحوا موضوع البلوتوث و في شوية كماليات إضافية تبرر زيادتها في السعر.

[pilotahmed1]

الف مبروك ربنا يعطيك خيرها ويكفيك شرها

[toni4toni]

هو أنا أتأكد ازاى ان البلوتوث شغال كويس؟

[pilotahmed1]

استخدم الموبايل لو تعرف على البلوتوث يبقى موجود

[a_samir2011]

هو أنا أتأكد ازاى ان البلوتوث شغال كويس؟

انا هكلمك على الاندرويد:
1- شغل العربيه من الكونتاكت.
2- افتح البلوتوث بتاعك وخليه visible ومهمه اوي الحته دي علشان هو بيبقي فيه time down counter بيعد حوالي دقيقه و 60 ثانيه ابقي خليه مركز معاه يعني.
3- دوس على زرار السماعه اللى على ايدك اليمين فى الطاره (هتلاقي الزرار فى الجزء الخاص بتاع البلوتوث فوق).

4- على الصوت بتاع الكاسيت علشان تسمع ال recorded voice order من العربيه.
5- هتستني لحد متقولك pair.
6- هتقول pair.
7- هتقولك دخل 1234 فى ال device بتاعك.
8- هتدخل على موبايلك وتعمل scan device هيظهرلك اسم البلوتوث بتاع العربيه اللى هو غالبا شبه ال mac address اللى هو بيكون فى الشكل ده 11:CB:19.
9- هتدوس عليه من الموبايل وتدخل الكود اللى هو 1234.
10- وتقولو pair.
11- هتلاقي الشاشه بتقولك ?(would you like to sync with (your mobile name. لو بالعربي هيقولك تود الاقتران مع الموبايل (اسم موبايلك)
12- هتمسك البكره الكبيره اللى تحت بكره الصوت فى الكونسول وتلفها شمال علشان تقف على yes او نعم.
13- هتضغط على البكره دي برده بس لجوه علشان تأكد اختيارك.
14 هيعمل هو synchronization مع نفسه خالص وان طبعا استناه هياخد ثواني يعني مش هيطول.
وبعدين هيقولك خلاص تمت العمليه بنجاج وهتلاقي علامه بلوتوث ظهرت فى العربيه فى الشاشه اللى فى النص وعلامه بلوتوث غريبه كده ظهرت فى موبايلك وموبايلك هيسألك ان فى device عايز شويه permissions كده مني اوافق ولا لاء.. طبعا انت هتوافق.

نيجي بقي للفايده:
انت سايق مثلا وحد اتصل عليك من على نفس زرار سماعه الرد بتاعه الطاره هتدوس عليها وتتكلم مع اللى بيكلمك ولازم تكون لوحدك علشان الصوت بيتنقل للسماعات وممكن الناس اللى فى الشارع تسمعكو. طيب مش حابب كده افتح الموبايل بتاعك ودوس على headset button علشان تتكلم من الموبايل عادي والاغاني تشتغل فى العربيه تاني ولا فى اي حاجه حصلت.

طيب انت حابب تتصل: هتدوس على نفس الزرار فى الطاره وهتلاقيها بتقولك dial number طبعا انت لو حافظ الرقم قولوا على طول وهيا هتعمل voice recognition لارقام وهتتصل على طول وانت حاطت الموبايل فى جيبك.

طيب لو انت مش حافظ الرقم ومسجل الرقم باسم هتعمل ايه؟؟؟ لحد دلوقتي معرفش ياباشا وحاولت اظبطها بس الراجل بتاع المعرض كان زهق مني الصراحه وقولت امشي بدل ميحدفني بحاجه :) :) :)

[mastr_n]

الف مبروك ربنا يديك خيرها ويكفيك شرها
راجع على كل حاجة قيل الاستلام

[toni4toni]

مكلم التوكيل الساعة 4 قالى احنا على معادنا بليل الساعة 8
اروح بليل الساعة 8 الاقى العربية موصلتش.ايه القرف ده
بداية مقرفة أستغفر الله العظيم

[a_samir2011]

معلش كل تأخيره وفيها خيره

[toni4toni]

الحمدلله استلمت امبارح بليل
العربية سوداء كوزمو , فوجات+4 اير باج+فوجات أمامية و خلفية+ speed limiter + بلوتوث + جنوط 17 + سينسورز خلفية+ تكييف dual zone

و الاستبن 16 ًأصغر من كاوتش العربية
العربية ماشاء الله جملية جدا و مبهرة , كل تفصيلة فيها تشدك ليها

العيب الوحيد من وجهة نظرى حتى الان ضيق الكنبة الخلفية
و هصورها و أنزلكم الصور قريب ان شاء الله

[toni4toni]

ألف مليون مبروك يا ريس، ربنا يحفظهالك و يكفيك شرها.

يا ريت بعد الإستلام تقولنا إيه أبرز التغييرات في ال 2014، سمعت إنهم صلحوا موضوع البلوتوث و في شوية كماليات إضافية تبرر زيادتها في السعر.

أبرز التغييرات فى 2014 هو البلوتوث و لون مقابض هو هو لون العربية فى الكوزمو

[Mzeid]

الف مبروك العربية :) و ربنا يبارك لك فيها و يحفظها يعطيك خيرها و يكفيك شرها :)

Sent from my GT-I9505 using Forum Runner

[toni4toni]

الف مبروك العربية :) و ربنا يبارك لك فيها و يحفظها يعطيك خيرها و يكفيك شرها :)

sent from my gt-i9505 using forum runner

ربنا يخليك يا باشا

[Need for speed]

ربنا يخليك يا باشا

السلام عليكم،
ألف مبروك يا باشا علي العربية

أنا حجزتها و مستني استلم في خلال أسبوع و كنت نفسي أسمع من حد فاهم رايه في العربية بعد سنة من الاستعمال خصوصا بالنسبة لاداء الفتيس و هل بينتش بطريقة معيبة ولا احساس النقلات العادي.

كمان الموتور عامل ايه و هل فيه كركرة فيه و حضرتك بتستعمل بنزين 92 ولا 95.

أكون شاكر لو حضرتك تقدر تساعدني لاني حيران بينها و بين الكورولا.

شكرا