أوبل أسترا 2014 و توكيل منصور

[Omar Gamal]

هو توكيل منصور سيء و حرامي أوي كده يا جماعة؟ أنا كنت رايح أحجز العربية، بس قريت شوية تجارب و تعليقات للأعضاء هنا كارثية خلتني أعيد التفكير مرة أخرى. قد كده منصور سيء؟ حد من الأعضاء اللي ممكن يكون اتعامل معاه قبل كده - خاصة في الأسترا - ممكن يفيدني؟

و شكرا جزيلا ليكم، حيرتي والله رهيبة بسبب منصور الزفت ده.

[Mohyeldin1974]

الموضوع مش بالسوء ده ، تقريبا كل التوكيلات فى مصر نفس المستوى وكلهم بيدورا على المكسب السريع
منصور اتعاملت معاه فى شيفروليه وكان كويس وبتعامل معاه حاليا فى الاسترا وعلى قد الصيانات الدويه معقول مشفتش حاجه تقلق وربنا يستر ومنروحلوش فى حاجه غير الصينات الروتينيه

[hossam_elwani]

معاملته معايا فى موقف فى التوكيل كانو فى كامل التعاون والتجاوب

كل توكيل فيه وفيه وحسب الفرع كمان

[Astra Lovers]

منصور اتحسن كتير عن زمان خصوصا بعد التجديدات اللي عملها فالصحراوي بس نصيخه لا تعامل نهائيا مع فرع الطيران
ضايعيييييييييييييييييييييييييييييييييين

[Omar Gamal]

اتحسن والله؟ اتحسن من ناحية إيه بالتحديد لو في عند حضرتك فكرة؟

أنا مقبل جدا عالعربية، بس دي طبعا عربية هتبقى أغلب إن مكانتش كل حاجة فيها هتتعمل في التوكيل.

معاملة منصور للأعضاء اللي معاهم الأسترا الجديدة بالأخص، و في الصيانات الدورية بيبقى عامل إزاي؟ و هل في فرع معين يفضل التعامل معاه؟

العربية ما شاء الله، بس أنا خايف أصرف نظر عشان خوفي من منصور ده عالمدى البعيد.

[Astra Lovers]

مفيش قلق لان مستوي خدمة العملا فتحسن والهمجر الجديد افضل

[Astra Lovers]

مشكله التوكلات فمصر كلها قلة الخبره بمعني معندهم خبرا اجانب او متمرسين قدامي فمشاكل السيارات الغريبه

[Astra Lovers]

بس العربيه طول ملنت محافظ علي الصيانه الدوريه فمفيش قلق

[Mohyeldin1974]

لكل الناس اللى بتسال عن منصور
فرع جسر السويس ممتاز والناس محترمه جدا والمهندس بيتاعبك وبيبعتولك رسايل تفكرك بمواعيد الصيانه ورسايل تنبيه وتأكيد على الميعاد المحجوز
محدش يقلق من العربيه لانها بسم الله ما شاء الله تحفه ولا من التوكيل لانه اتحسن كتير عن زمان

[medo111]

اتعاملت معاه في شيفروليه فعلا مشفتش انو وحش بس فعلا هي فروع فروع

[Ahmed TRAVCO]

عايز رأيي؟ كل التوكيلات في مصر -بدرجة أو بأخرى- شوية نصابين وبعضهم يرتقي لدرجة الحرامية!!!

فلو هتحط الموضوع في دماغك وتخوف نفسك أوي كده يبقى مش هتشتري حاجة!!

توكل على الله طالما العربية عاجباك كده... هي عربية ممتازة وتابلوهها هو الأشيك في رأيي في الفئة دي... وان شاء الله ما تحتاجش الوكيل غير في الصيانات الدورية...

وأنا عن نفسي لو كنت فكرت بالشكل ده عمري ما كنت هشتري عربيتي دي بالذات من كتر ما سمعت عن جهل الوكيل والصنايعية برة فيها ومن كتر ما سمعت عن "السرقة العلنية" في قطع الغيار بتاعتها من الوكيل...

مبروك مقدما وربنا يرزقك خيرها!!

[Omar Gamal]

شكرا لكل الردود الجميلة يا جماعة. عندي بس شوية أسئلة لو تقدروا تجاوبوني عليها يبقى كتر ألف خيركوا:

1. هي فئة الكوزمو فيها ebd؟ ولا مجرد abs بس كنظام فرامل؟ و العربية أدائها في الفرامل عموما عامل إزاي؟

2. الأسترا اللي في مصر مفيهاش حساسات مطر؟

3. هل في فرع محبذ لمنصور تنصحوني اتعامل معاه؟ أقربلي فرع الطيران، بس بسمع كلام كتير عنه سيء.

و شكرا ليكوا مرة تانية يا جماعة.

[Omar Gamal]

معلش سؤال أخير: هي العربية دي فيها كروز كنترول ولا مثبت سرعة بس؟

[Abdo Taha]

شكرا لكل الردود الجميلة يا جماعة. عندي بس شوية أسئلة لو تقدروا تجاوبوني عليها يبقى كتر ألف خيركوا:

1. هي فئة الكوزمو فيها ebd؟ ولا مجرد abs بس كنظام فرامل؟ و العربية أدائها في الفرامل عموما عامل إزاي؟

2. الأسترا اللي في مصر مفيهاش حساسات مطر؟

3. هل في فرع محبذ لمنصور تنصحوني اتعامل معاه؟ أقربلي فرع الطيران، بس بسمع كلام كتير عنه سيء.

و شكرا ليكوا مرة تانية يا جماعة.

الاسترا فيها abs و ebd و esp طالما راكب الماني مهما كانت عربية صغيرة يبقى الامان رقم 1 في العربية و مفيش قلق منها الاسترا بتهيألي فيها حساس مطر بس مش متأكد ممكن حد من ملاكها يفيدك و من ناحية الفروع فرع الهرم كويش و مركز الديب معتمد من منصور في المعادي و المقطم و اخوان مقار دول الافضل سيبك من فرع الطيران خالص دول ضايعين بسأل بتاع المبيعات عن موتور الانسجنيا يقلي هو بتاع الاسترا بس تربو طبعا ده كلام غلط ده موتور جديد تمامل و يقلي موتور الاسترا j هو نفس موتور الفكترا سي بصراحة مرضتش احرجه و سبته من سكات .

[Astra Lovers]

طبعا فيها حساس مطر وابعد عن الطيران نهاءي ولا حتي تروح تتفرج