مشكلة قربة الميه ... عقلى هيطير منى

[asa3eed]

السلام عليكم يا جماعه الاوبل
انا عندى مشكله مش لاقى لها حل وعقلى هيطير منى بجد ... انا معايا إوبل فيكتر 94 إتوماتيك فجأة كنت راجع من القاهرة وقدام البيت العربيه جالها تبول لا إرادى الميه كلها وقعت منها مرة واحده طبعا فصلت الماتور وفتحت الكبوت ولاقيت صوت تسريب مقدرتش أحدده منين بالضبط لان الدنيا ضلمة ... المهم رحت للميكانيكى كبس ولا اى حاجة باينه خااالص اقوله إزاى يا عم انا جاى لك والقربه مهويه من المشوار ... من هنا لهنا لاقى كوعه الميه الالمونيوم بتنقط غيرناها وغيرنا الطرمبة بالمرة بس انا بقول له مش النقط دى إللى تخلى الميه تفضى مرة واحده اكيد ف حاجة تانيه يقول ليه مش باين حاجة ف الضغط .. روحت من عنده البيت تانى يوم الصبح بفتخ القربه نفس الموضوع هواااااا .. قحط ولا اى حاجة مليت ميه وكلمت الباشا ورحت له طبعا هوه ف القاهرة ولازم اسافر له وانا ف الطريق عملت نفس الموضوع لاقيت وصله بين الخرطومين تحت البوابه مليت ميه ورحت له كبس مبنش اى حاجة برضوا بس قلت له الوصله بترشح ومسكتها لاقت تحتها ميه .. غيرناها ... رجعت نزلت بعدها بساعتين بمد إيدى تانى ف القربه برضوا هواااا
الخلاصة العيب ده مبيظهرش إلا ف المسافات الطويلة ... تفتكروا يكون عيب إيه لانى بجد تعبت ومش عارف اعمل إيه ... يعنى لو كبس والعربيه برده ميبنش طيب اعمل إيه .. ابعها واخلص ولا ارميها

[alameer81]

ممكن غطا القربة

[MaaM]

ممكن تفهمنا ازاي كبس ؟ يعني عمل ايه بالظبط وعرف ان مافيش تسريب
وازاي بيقول مافيش وهي عمالة تنقط من عند الكوعة !!

لو المية مش ملونة حط فيها لون ودور العربية وانت واقف قدام بيتك أو عند الميكانيكي يفضل ، وتكون رافعها بكوريك مثلا ، وشوف المية بتقع منين
حاجة تانية لو التسريب جدا وانت مش قادر تصبر
افرش ورق جرايد تحت المكنة وتعالى شوف الورق مبلول فين بالظبط

وبعد اما الحوار دا يخلص اغسل الدورة بتاعتك وحط مية تكييف مع ابرو

[elpasha1]

اية الابرو دا وبيجي منين

[MaaM]

من أي بنزينة أو أي حد بتاع قطع غيار ، وظيفته منع تكون الصدا ، وبيساعد على منع غليان المية
العبوة بـ 11 جنيه ، هاتحط علبتين على مية تكييف أو مية مقطرة أو مية خضراء/حمراء/زرقاء

[medo111]

شوف كل حاجه الطبب الي في المتور شوف الشجره شوف الخراطيم وحاول تحدد الميه تحت العربيه من انهي مكان وانت واقف قدام الكبوت

[asa3eed]

ممكن تفهمنا ازاي كبس ؟ يعني عمل ايه بالظبط وعرف ان مافيش تسريب
وازاي بيقول مافيش وهي عمالة تنقط من عند الكوعة !!

لو المية مش ملونة حط فيها لون ودور العربية وانت واقف قدام بيتك أو عند الميكانيكي يفضل ، وتكون رافعها بكوريك مثلا ، وشوف المية بتقع منين
حاجة تانية لو التسريب جدا وانت مش قادر تصبر
افرش ورق جرايد تحت المكنة وتعالى شوف الورق مبلول فين بالظبط

وبعد اما الحوار دا يخلص اغسل الدورة بتاعتك وحط مية تكييف مع ابرو

بيكبس بحاجة كده عاملة زى منفاخ العجل من قربة الميه وبيقولى الضغط ثااابت ... وبعدين الكوعه كانت نفطة بسيطة وظهرت بعد 5 دقايق من الكبس ... الغريب يا جماعه إن الموضوع ده مبيظهرش إلا بعد ما اسافر مشوار طويل لكن لو جوه البلد مشوار خمس دقايق 10 دقايق مثلا ولا اى حاجة خاااالص ... والصبح بمسح تحت العربيه ومش لاقى ميه خااالص زى ما يكون إتبخرت مع إن الجراج بتاعى رطب فلو ف ميه هتسقط صعب إنها تلحق تنشف وخصوصا ف الجو ده ... والله الف شكر لك يا باشا ع موضوع الابرو ده ... بس مفيش اى حلول تانية

[m_kamal]

السلام عليكم يا باشا
المشكلة دى حصلت معايا حاجة شبهها من فترة و كانت كالتالى :
العربية امشى بيها شوية الاقى بخار طالع من تحت الغطا و بعدين المية كلها تفور و تنزل من العربية
طبعا كل الناس قالت ان سبب اللى بيحصل ده ان المية بتنقص و انا ماشى و نتيجة لكدة بيحصل الفوران ...
غيرت غطا الردياتير ... نفس المشكلة
غيرت ترموستات الكوعة و كل وصلات المية .. نفس المشكلة
غيرت طرمبة المية .. نفس المشكلة

فى الاخر غيرت حساس الحرارة و من وقتها اتحلت المشكلة الحمد لله

الفكرة بقى ان ماكنش فيه تهريب مية ولا حاجة ... المشكلة ان حساس الحرارة بايظ فلما المية بتسخن مابيديش امر للمراوح بتاعت العربية انها تشتغل فى الوقت المناسب فالمية بتغلى و تفور

حبيت اشارك المشكلة لعلها تفيدك فى حل المشكلة اللى عندك .. و ربنا معاك

[asa3eed]

السلام عليكم يا باشا
المشكلة دى حصلت معايا حاجة شبهها من فترة و كانت كالتالى :
العربية امشى بيها شوية الاقى بخار طالع من تحت الغطا و بعدين المية كلها تفور و تنزل من العربية
طبعا كل الناس قالت ان سبب اللى بيحصل ده ان المية بتنقص و انا ماشى و نتيجة لكدة بيحصل الفوران ...
غيرت غطا الردياتير ... نفس المشكلة
غيرت ترموستات الكوعة و كل وصلات المية .. نفس المشكلة
غيرت طرمبة المية .. نفس المشكلة

فى الاخر غيرت حساس الحرارة و من وقتها اتحلت المشكلة الحمد لله

الفكرة بقى ان ماكنش فيه تهريب مية ولا حاجة ... المشكلة ان حساس الحرارة بايظ فلما المية بتسخن مابيديش امر للمراوح بتاعت العربية انها تشتغل فى الوقت المناسب فالمية بتغلى و تفور

حبيت اشارك المشكلة لعلها تفيدك فى حل المشكلة اللى عندك .. و ربنا معاك

الاول الف شكر يا كيمو ع كلامك ... بس انا عندى مروحة الرادياتير بتشتغل عااادى جدا وجربت وانا واقف ادور العربية واستنيت حوالى 5 دقايق عشان اجرب المروجة لاقيتها فعلا دااارت ... انا بيتيهيألى إللى بيحصل ده تبخير مش تنقيط لانه كان هيظهر ف الضغط مع الملاحظة إنه الحوار ده بيحصل مع المشواير الطويلة بدون توقف لكن مشوار صغير 10 دقايق او ربع ساعه ميحصلش لانه بدور واقف بدور واقف ... ممكن يكون غطا القربه مثلا ولا إيه لارأيك :(

[m_kamal]

الاول الف شكر يا كيمو ع كلامك ... بس انا عندى مروحة الرادياتير بتشتغل عااادى جدا وجربت وانا واقف ادور العربية واستنيت حوالى 5 دقايق عشان اجرب المروجة لاقيتها فعلا دااارت ... انا بيتيهيألى إللى بيحصل ده تبخير مش تنقيط لانه كان هيظهر ف الضغط مع الملاحظة إنه الحوار ده بيحصل مع المشواير الطويلة بدون توقف لكن مشوار صغير 10 دقايق او ربع ساعه ميحصلش لانه بدور واقف بدور واقف ... ممكن يكون غطا القربه مثلا ولا إيه لارأيك :(

عفوا يا باشا على ايه بس ...
بص يا باشا انا بردو المروحة كانت بتشتغل عندى بس بتشتغل متأخر .. و انا واقف عند الميكانيكى برده و شغل العربية و مستنى المروحة تشتغل اشتغلت .. و عشان كدة ماشكيتش فى سنسور الحرارة من الاول ... بس اتضح فى الاخر ان المشكلة فيه

و عموما المشكلة دى بدات تظهر لما الشتا دخل و بطلت اشغل التكييف .. لأن سنسور الحرارة كان مهيس من فترة .. بس مروحة التكييف كانت بتقوم بالواجب و تبرد الموتور

و الجدير بالذكر برده .. ان الفوران اللى كان عندى ده كان بيحصل من غير ما الحرارة تزيد عندى فى التابلوه .. فا كدة اكيد السنسور اللى كان بايظ لانه كان بيدى قراءة غلط لكمبيوتر العربية فا تظهر فى التابلوه ان العربية حرارتها عادية و كذلك القراءة دى بتروح للمراوح ..

فا شوف لو الحرارة بتزيد عندك فى التابلوة جوة مع الفوران .. يبقى السنسور سليم و اعمل تشيك كامل على دورة المية شوف التبخير او التهريب حاصل منين

اما لو الحرارة فى التابلوة مابتعلاش عن العادى يبقى المشكلة اكيد فى سنسور الحرارة

و ربنا معاك يا باشا ..

[asa3eed]

فا شوف لو الحرارة بتزيد عندك فى التابلوة جوة مع الفوران .. يبقى السنسور سليم و اعمل تشيك كامل على دورة المية شوف التبخير او التهريب حاصل منين

اما لو الحرارة فى التابلوة مابتعلاش عن العادى يبقى المشكلة اكيد فى سنسور الحرارة

و ربنا معاك يا باشا ..

فعلا يل كيمو الحرارة بتزيد ف التابلوه بتوصل ل 100 مرة واحده بعد ما اقطع مشوار يبقى كده السنسور سليم .. صح ... طيب لو عاوز اعمل تشيك للدورة ف اى طريقه غير الكبس هوا دى لان اللى بيحصل ده لما العربية تقطع مشوار طويل لانه لما كبس بالطريقة العادية العربيه بارده والميه بردوا برده ولا اى حاجة خااالص ... اسف لان بوجع دماغك معلش هتعبك معايا ... ممكن يكون من غطا القربه مثلا ولا افتح الكبوت واقعد فيه وامشى مشوار طويل واحط الإيدى ع التنفيس مش عارف والله اعمل إيه :(

[asa3eed]

5- حساس الحرارة
و دة وظيفتة تحديد درجة حرارة مياه التبريد
و من خلالة الكمبيوتر بيحدد اذا كانت العربية باردة ولا لا و هل محتاج يشغل مراوح التبريد ولا لا
مكانة فى وش السلندر تحت البوبينة
اعراض التلف: ممكن المراوح تشتغل بدون توقف او العربية تبقى مبرجلة فى السلانسية وتاكل بنزين .... حد عاااارف الحساس ده بكاااام

[m_kamal]

الحساس ارخص حاجة فى الموضوع كله ... انا جبته بما يوازى حوالى 70 جنيه مصرى بعد ما دفعت حوالى 1500 جنيه عالحاجات اللى قبله ... المهم غالبا المشكلة عندك كدة غالبا مش الحساس

و اسهل طريقة لمعرفة التنفيس .. املأ دورة المياة بمية خضراء او حمراء .. اللى هى سائل التبريد الاصلي بتاع العربية .. عشان مكان التنفيس يبقى واضح بلون المية اللى انت حطيتها

و فيه ناس على ما اعتقد بيحطو حاجة لونها فسفورى فى دورة المية لنفس السبب

[Astra Lovers]

شوف غطا القربه ممكن يكون هوه بنسبه كبيييييييييره

[asa3eed]

ف حد قالى إنه ده جوان وش سلندر ... رأيكم إيه ف الكلام ده يا ناااااااس