شكر واجب وتقدير واحترام يستحق

[ayman_aboramy]

السلام عليكم ورحمة الله وبركاته
اولا انا ايمن من الاسكندرية
كان عندي كورس تبع الشغل في القاهرة
سافرت بالليل صحراوي ولبست كمية مطبات
حسيت بعدها العربية بقيت بتشخلل من تحت
بعد الكورس كلمت الاستاذ محمد طناني علي التليفون
علشان اعرف اوصله ازاي
(معرفش حاجه خالص في مصر)
فبالتالي كل دوران كل تقاطع كل اشارة بكلمه علشان اوصل
يعني بدون مبالغة مش اقل من 20 مرة
والحمد لله وصلت
قابلني مقابلة كاننا نعرف بعض من زمن
بمجرد وصولي خد العربية جربها بنفسه وشاف ايه هي مشاكلي
خد العربية علي المركز وكشف علي الاتي
العفشه
اعطال كمبيوتر
الفرامل
الدبرياج
بص علي الزيت لقاه محروق رايح في داهيه
(طبعا كتر الحرق اللي انا بعملله)
فلتر التكييف
وقاللي بمنتهي الصراحه ايه اللي في عربيتي حاجات اصلي وحاجات مضروبة
زي مثلا طقم الدبرياج والموبينة والبوجيهات
وكل حاجه محتاجينها يا يبعت حد من المركز يجيبهالك يا يمشي معاك بنفسه
ويسال علي السعر (دا انا اكتشفت اني ابن خالته في محل قطع الغيار)
ولما لقي التاجر ضارب السعر في الهوا قاله متشكرين ليك فرصة سعيدة
وانا واقف بتفرج بس عليه
وقاللي معلش بقي المرة اللي جاية لو جيت القاهرة ابقي اكلمه قبلها وهو يجهزها
لاني وصلت عنده متاخر الساعه 8 تقريبا
نيجي بقي للجميل والمعروف اللي عملهولي
وانا حبيت اني اقوله في الاخر
انا كنت خبطت العربية قبل العيد الكبير
واتكسرت وصله من الخرطوم اللي واصل في القربة المياه للمساحات
وانا لفيت اسكندريه علشان حد يعملهاللي علشان الشتا
ومحدش عرف يعملها اللي يقوللي هاته استيراد الوصله كلها
وما لقينهاش حتي
المهم انا وريتهاله بالصدفه
لقيته دخل جوه وجابلي وصلة خرطوم وعمالهالي احسن من الوصلة نفسها
وسلكللي البخاخات ومليت القربه وجربتها مع المساحات تمام
وانا مروح مش عايز اقولك انا دعيتلك دعا اد ايه
انا السكة من نصها تقريبا شتا والمساحات شغاله باستمرار
وتخيلت نفسي مكنتش القربة واصلة زي الاول
كنت حمشي بالعربية علي جنب وكل شوية انزل امسح الازاز واكمل مشي
بجد ربنا يباركلك ويرزقك من وسع و يوقفلك ولاد الحلال اللي زيك
انا حبيت اقول تجربتي لانها بجد ما شوفتهاش في مركز قبل كده
عربيتك واقفه بتتصلح وبتتجاب حاجتك وعلي الاقل الاستاذ طناني عارف الاصلي والمضروب
و لاحظت انه مع صاحب العربيه مش مع التاجر
يعني كل ده وفي الاخر اساله علي الحساب يقولي 100 جنيه!!!!!!!
اقوله مصنعيه ولا كشف اعطال ولا هوا فرامل ولا هوا دبرياج ولا حل وتركيب فلتر تكييف ولا الوصلة بتاعت مساحات العربية ولا مشي معايا في الشارع نجيب قطع الغيار
انا مش عارف اقولك ايه بصراحه ؟؟؟؟؟؟؟؟؟
انا كان لازم اكتب الكلام ده وزي ما قولت في العنوان
ده اقل شكر واجب ليك يا استاذ محمد وزيادة احترام فعلا تستحق كل تقدير واحترام

[a7mad_mo7amad6]

ربنا يباركله

[m7nsh]

والله العظيم الراجل دا انا باحترمه احترام غير عادى .. عاوز اعدى عليه فى مره بقا بس الشغل كل مره بيعمل الجلاشه معايا ..

و مبروك عليك ياباشا .. اكيد طنانى يستاهل انك تجيله من اسوان مش بس اسكندريه..
الى الامام يا طنانى

[medosalah]

يا رب يا استازطناني يباركلك في نفسك واهلك ومالك ويباركلك في المركز ويبقي ان شاء الله توكيل كبييييييييييييييير

انا لما كنت بنوي اروح اصلح العربيه او اركب حاجه كنت بشيل هم الدنيا بس لما بقيت اتعامل مع مركز استاز طناني بقي افرح لمجرد اني اني هروح اشوفه بس

[cayman69300]

تصحيح : الحساب 105 جنية و ليس 100 جنية
ايضا دة الطبيعى عمله مع اى حد غريب لازم يتعمل معاه الواجب و دة الطبيعى جدا

[sunsonson]

الي ربنا يحبوا يحبب فيه خلقه. وفيه اجماع علي محمد طناني بكده وبصراحه هو يستحق مع اني محتكتش بيه شخصيا بس استفادت منو كتير هنا وكمان رائ الناس فيه خلاني ابقي عاوز اتعرف عليه بجد .الناس الكويسه ده متتعوضش . ممكن عنوان المركز بتاعه تفصيلا عشان انا معرفش حاجه في المعادي خالص و العربيه تعبانه علي الاخر وزي ما احد الأعضاء قال انا شايل هم التصليح والصنيعيه جدا لدرجه قولت خلاص مش عامل حاجه وأمشي بيها كده.

[medosalah]

عنوان مركز اوتو ماستر . 27 شارع 105 المعادي

رغم اني لا افقه شيء عن المعادي بس كنت بكتب العنوان كده زي ماهو علي الجي بي اس وامشي زي ما بيقولي لغايه ما الاقي نفسي امام المركز ... بجد ال جي بي اس ده اخترااااااااااااااااااااااع رغم ان ثمنه لا يساوي قيمته الفعليه

[sunsonson]

متشكر ليك جدا وربنا يباركلك في الجي بي اس بس ياريت حد يوصفلنا بالبلدي كده. جمب ايه علي نصيته مش عارف ايه تاني يمين بعد مش عارف مين كده يعني .

[ebrahim abdou]

ربنا يبارك فيه

[cayman69300]

متشكر ليك جدا وربنا يباركلك في الجي بي اس بس ياريت حد يوصفلنا بالبلدي كده. جمب ايه علي نصيته مش عارف ايه تاني يمين بعد مش عارف مين كده يعني .

ش . 105 مشهور جدا و فية عمر افندى سابقا ( بقى دلوقتى سوبر ماركت الراية ) و بعديها بحوالى 100 متر هتلاقى المطافى و المركز بعد المطافى بحوالى 200 م على الشارع الرئيسى اللى هو 105
هتلاقى اليافطة الضوئية بتاعه المركز واضحة جدا
و الله الموفق

[cayman69300]

اه قبل ما انسى لو مستعجل تعالى قبل الساعه 2 علشان يكون طنانى مش موجود
لانه لو موجود هيقعد يحسوك و يبسوك فى العربية و هتلاقى عايز يعمل شغل الخواجة و الحاجة بتاعه النص ساعه يعملها فى ساعتين - طوله بال بقة هنقول اية