استرا 2004-05 وللا فيكترا 2003

[thedeviant_man]

السلام عليكم
بعد اذنكم كنت عاوز رايكم اجيب انهي عربيه فيهم استرا 2004 اوتوماتيك وللا فيكترا 2003 اوتوماتيك 1600

وكنت عاوز اعرف كمان كنبه الاسترا واسعه وللا لا عشان بس بيبقى معايا احجام حلوه ما شاء الله فلو 3 ورا قاعدين ورا هيبقوا عادي وللا هتبقى ضيقه عليهم

والمعدل العادي لو انا شاري عربيه حالتها كويسه .. متوسط مصاريف الصيانه الشهريه كام؟

والف شكر ليكم جميعا

[haisam ali]

نفس الموتور فى العربيتين واحد .... لكنه على الاسترا أكفأ لان حجمها اصغر ..... اما المصروف هيعتمد اعتماد كلى على حاله العربيه اللى انت هتجيبها ( ومن وجهه نظرى الضعيفه جداً مفيش عربيه اوبل مش متهانه لان معظم الناس مش بتقدرها ) ًبالنسبه لوسع الكنبه الخلفيه الاتنين تقريبا زى بعض ..... ولكن برضه من وجهه نظرى الضعيفه المحدودة جداً جداً قصاد الخبراء هنا ... انا بميل للفيكترا من حيث انها لها قطع غيار استيراد مغرقه السوق ودى ميزه عشان السعر .... اما الاسترا مالهاش غير جديد بس لانها برازيلي .... فتقريبا الفيكترا ابرك باذن الله ... وبرضه استنى آراء الكبار بتوعنا هنا فى المنتدى هيجيبولك من الاخر ..... هذا وبالله التوفيق

[MaaM]

متفق مع هيثم في مسألة قطع الغيار ، لأن فعلاً الأسترا البرازيلي منزلش منها أنصاص فبالتالي قطع غيارها الخارجية مافيش منها استيراد ، اما الداخلية فموجود عادي لأنها زي الأسترا الـ 1.2 بالظبط

وسع الكنبة الخلفية لصالح الأسترا ، لكن الفيكترا فضيقة وغير مريحة بالمرة
فالمقابل الفكيترا مابتهبطش بسهولة ، يعني مع 5 أشخاص وشنطة ماليانة العربية مش هاتحك في أي مطب
اما الأسترا مجرد أربع ركاب بوزن 80 كيلوا متوسط ، العربية هاتهبط على الأرض وهاتحك منك في بعض المطبات

الكماليات
الأسترا البرازيلي: كماليات كتيرة ماتلاقيهاش في عربيات في فئتها السعرية والاعلى منها كمان
الفيكترا: فقر لبعض الكماليات ، لكن لو عطرت في واحدة cdx بحالتها فاتشتريها وانت مغمض

العفشة
الأسترا البرازيلي: عفشة ناعمة جدا
الفيكترا: عفشة ناشفة

الثبات بعد الـ 160
لصالح الفيكترا

الصاج
لصالح الفيكترا

الشكل
لصالح الفيكترا

الصالون وتقفيله
لصالح الأسترا

الموتور
- الأسترا البرازيلي: نزل منها موتور واحد 1.6 بقوة 101 حصان
- الفيكترا بي1 و 2 : نزل منها 4 مواتير
1- 1.6l بقوة 75 حصان - فتيس مانيوال
2- 1.6l بقوة 100 حصان - فتيس اتوماتيك
3- 2.0l بقوة 115 حصان - فتيس اتوماتيك
4- 2.0l بقوة 136 حصان - فتيس اتوماتيك

[haisam ali]

حوده لخص الكلام كله وبسطهولك جداً جداً ..... وانت بقى عليك الاختيار فاعقلها وتوكل وصدقنى اللى ليه نصيب فى حاجه لازم يأخذها ..... هذا وبالله التوفيق

[thedeviant_man]

هو بالامانه وضحها جدا وزودني حيره فى نفس الوقت

[haisam ali]

طاب بس قول اللى محيرك ؟؟؟ واحنا معاك نحاول اهوه

[thedeviant_man]

بص ياباشا تقدر تقول ان دي اول عربيه ليا فموضوع الجري ده مش فى بالى قوي حاليا انا دلوقتى عاوز حاجه اقدر اصرف عليها ومتقرفنيش فى صيانتها وفي نفس الوقت تبقي واسعه عشان انا طويل واللى بيركبوا معايا نفس الوضع تقريبا

[haisam ali]

الحاله ياغالى هيا اللى هتتكلم عن كل اللى انت بتقوله ده .......! اهم حاجه الحاله .... وبالنسبه لموضوع الطول ده والله باذن الله الاتنين يريحوك جدا

[MaaM]

سهولة الصيانة والوسع الداخلي = تويوتا الدبة

[haisam ali]

معلش يعنى ايه تويوتا الدبه دى يامحمود .....؟ اللى هيا أنهوا يعنى ....؟

[MaaM]

الكورولا من أول 2003 لـ 2007 تقريباً
الدبة اللي هي انثى الدب :)

[thedeviant_man]

ولو ان يا قائد انا بسال على عربيات تانيه ... بس عموما ده رينج سعر مختلف خالص عن اللى معايا

[بيشوى_رمزى]

"رأى شخصى"
فيكتررااااااااااااااا

[wael_elbarkoky]

الاسترا مش وحشه بس الفيكترا احسن
انا معايا الفيكترا و مع واحد صحبي استرا ٢٠٠٤ و تقريبا العربيه معايا كل يوم
و قبل الاسترا صحبي كان معاه فيكترا ٢٠٠٢ 1.6 auto زي الي حضرتك بتسأل عنها بس هو بعها عشان كان في ظروف كده و بعدها جاب الاسترا عشان ملاقاش فيكترا

حقلك الفرق الي حسيته انا و صحبي بين الاتنين

اولا الفيكترا ا1.6 auto غيرلها كرته ليها و سمعت كزا واحد اشتكي من الموضوع ده عشان كارته مكنهاجنب الموتور فبتتأثر بالحراره
اناما في الاسترا شغاله لغايت دلوقتي مشتكاش من الكرته دي دي و قليل لما اسمع عن المشكله دي في الاسترا

1- الموتور في الاسترا اقوي عشان هي اخف و هو هو نفس الموتور في الفيكترا ال 1.6 auto
كا سرعه الاسترا اسرع عشان اخف من الفيكترا هما الاثنين 101 حصان

2- التكيف في الاتنين كويس جدا تقريبا مكنش فيه فرق

3-الثبات طبعا الفيكترا احسن بس الفرق مش كبير قوي يعني الاسترا مش وحشه بس الفيكترا اثبت منها شويه

4-الكماليات الاسترا فيه كام حاجه كده مش موجوده في الفيكترا زي
موسوجر الابواب بيقفل تلقائي عند 30km/h
في محدد سرعه بيعمل بيعمل صوت لما تعدي سرعه معيته انتا الي محددها و الشنطه بتتفتح من الداخل و من الريموت في الفيكترا الشنطه بتتفتح من الخارج فقط من الزرار بتاع الشنطه
و الاسترا بتنزل بلنسات في الفوانيس الاماميه و العربيتين جميع الكماليات بس الفيكتر ٢ ازاز امامي كهرباء فقط في الاسترا الاربعه كهرباء و العربيتين فيهم ديد لوك و امبولايزر مانع للسرقه مفتاح مشفر دول بيخلو العربيه ولا تفتح ولا تدور الا بمفتحها المشفر يعني لو قفلت العربيه بالمفتاح او الريموت انسي ان اي حد يقدر يفتحا او يدورها الا بالمفتاح بتعها و لو حتا قدر يدخل جوه العربيه لو كسر الازاز انسي انو يدورها

5-الامان العربيتين فيهم فرامل abs و الفرامل كويسه في الاتنين بس لو كانت مظبوطه بس الاسترا تزيد عن الفيكترا ان فيها اير باج
الفيكترا مفيهاش ايرباج الا في ال cdx
العربيتين فيهم ديد لوك و امبولايزر مانع للسرقه مفتاح مشفر دول بيخلو العربيه ولا تفتح ولا تدور الا بمفتحها المشفر يعني لو قفلت العربيه بالمفتاح او الريموت انسي ان اي حد يقدر يفتحا او يدورها الا بالمفتاح بتعها و لو حتا قدر يدخل جوه العربيه لو كسر الازاز انسي انو يدورها و فيهم قفل الابواب الخلفيه امان عشان لو في اطفال

6 -الوسع الفيكترا اوسع في الصالون بنسبه ملحوظه و في الشنطه كمان
كنبه الفيكترا اوسع من الاسترا انا لما بركب ورا في عرابيتي و اركب في عربيت زميلي ببقي حاسس اني مكتف
الكنبه بتاعت الاسترا كنزه شويه يعني بس تشيل 3 افراد متقلش لأ

7-التقفيل انا مش شايف فروق كبيره بينهم هما الاثنين كويسي الطبلوه جلد في الاتنين و البيبان قماش و قطيفه في الفيكترا و فرش الكراسي قطيفه بردو

8- الشكل انا عن نفسي ركوبه الفيكترا احلي من الاسترا و القعده فيها مريحه و التابلوه شكله احسن و تحس ان الفيكترا ليها وقار كده عن الاسترا و ملفته للنظر عنها دا في رأي يعني و الشكل و الكلام ده ازواق


رأي ان العربيتين كويسين بس لو الاتنين حالتهم كويسه اشتري الفيكترا
لو لقيت وحده حالتها احسن من التانيه اشتري الي حالتها كويسه و ربنا معاك
و اي استفسار انا موجود

[haisam ali]

تانى اهوه الاستاذ واءل قصرلك الكلام كله وبجد الله ينور عليه ..... فأنت بقى توكل على الله وشوف الحاله الأحسن وهاتها وصدقنى باذن الله طول مانت هنا فى المنتدى لا تقلق