Tweet
أول Inter View رسمى مع أوبل إنسيجنيا
سيـداتى ســادتى أعزائى متابعى منتـــ نايل موتورز ــدى فى كل مكان أهلا وسهلا بيكم معانا النهارده فى اول مقابله شخصيه مع معشوقه الجماهير واللى كانت غايبه عننا بقالها فتره كبيــــــــره ..كنا بنحاول فى الفتره دى إننا نسمع او نعرف عنها اى اخبار او نشوفلها ريفيوهات أو نعرف راى الناس فيها بعد متعاملوا معاها....
ضيفتنا وضيفتكوا النهارده هى نجمه سطعت فى سماء النجوم منذ فتره ليست بالقليله...وحتى هذه الفسوه مخدتش حقها نهائــــــى من اضواء الشهره والنجوميه اللتى تستحقها واللى ذاع صيتها وشهرتها بره فى بلاد الفرنجه واللى خلاها تحتل مرتبه محترمه جدا وسط مصاف النجوم بل وتناقسهم على مراكزهم كمان...وإستطاعت ان تحوز لقب نجمه العام لسنتين على التوازى..2008 و 2009 متفوقه على اعتى النجوم والاسامى بره.....حتسألنى طب إزاى عامله كل ده بره وعندنا هنا إسكت هس....أرد واقولك ده بسبب ........ اللى ماضى معاها عقد احتكار هنا فى مصر مش فاهم ومش عارف قيمتها ولا عارف انه لو لمعها سيكا واداها حقها حتاكله الشهد.. إنما نقول إيه..الغباء لا دين له
نتكلم عن قرب عن نجمتنا النهارده واللى بمجرد إنها تعدى من قدامك تجبرك انك تتنح لبرهه من الزمن عشان تدقق فى كل تفاصيلها الجذابه حته حته
بدايه بعيونها ورموشها الفتاكيــــــن مع مقدمه ولا اروع
مرورا بوسطها وجسمها الرشيق والكرباج فى نفس ذات الوقت
وانتهاءا باللى لامؤاخذه...المؤخره واللى هى تعتبر أجمد حته فيها اصلا
كله يرحب معانا النهارده بضيفتنا.............
صافينــــــــــــــــــــــــــــاز سورى سورى بهزر يا جماعه
ضيفتنا النهارده .... Opel Insignia Top Line 2014
أنا : ممكن تعرفينا عن نفسك شويه ؟
النجمه : انا سليله عائلات أدم أوبل...اتولدت فى المانيا سنه 2008 وبيقولوا عليا انى امتداد لاختى الاكبر اوبل فيكترا سى....مسقط راسى بوخوم..وعلى غير العاده..مطلعتش لفيت بره كتير..لا بولندا ولا المجر ولا الكلام ده..من ألمانيا على مصر على طول...والناس كلها بتقول عليا ..أقضل ما أنتجت أوبل...وده كفيل لوحده يعرفك ويعرف غيرك أنت بتتكلم عن مين
***********************************
أنا : بس فى سرى...ايه التناكه بتاعه اهلك دى....مع ابتسامه صفراء..طيب حضرتك ممكن تقوليلنا ايه اللى عملتيه خلاكى تحصلى على لقب سياره العام مرتين متفوقه على ماركات محترمه واقدم منك ؟
النجمه : زى منتا عارف ان بره بيهتموا جدا بعوامل الامن والامان وعوامل الاختبار بره بتبقى شديده جدا والحمد لله جبت الدرجه النهائيه فيها وتقدر تشوف ريفيوهات التصادم والثبات بتاعتى وانت تتأكد بنفسك...وطبعا مش انا لوحدى اللى جبت الدرجه دى زى منتا قولت الماركات اللى اقدم منى حصلوا عليها برده بس تفوقى عنهم كام فى انى جايه بباكيدج رفاهيه واوبشنز وامكانيات أعلى منهم مع الحفاظ على سعرى اللى نوعا ما يعتبر مش مبالغ فيه مقارنتاً بباقى الموديلات اللى فى سعرى..ودى نقطه تميزى..ضيف عليها بقى تصميمى الديناميكى المميز والمختلف واللى دايما بتنفرد بيه اوبل عن مثيلاتها
*********************************************
أنا : طيب ممكن تكلمينا عن فئاتك ومواصفاتك وإيه اللى بيميزك كأعلى فئه عن الباقى ؟
النجمه : إنت سفاف اوى وانا مش فاضيالك...ورايا معرض عاوزه الحق اجهز واروح....هممم طيب أمرى لله
إحنا 3 فئات...اول اخت لينا الاليجانس..ودى ب 245, الاخت الوسطانيه واسمها هاى لاين ودى ب 270....وفخامتى.. التوبلاين ب 290 ومش حتلاقى منى كتير أصلا فحتدفع 10000 اوفر برايس زياده عشان اوافق اجيلك
-بالنسبه لايه اللى بيميزنى عن الباقى...خد عندك :-
1-فتحه السقف ...ودى يا جماعه كنت متخيلها حاجه رفاهيه بزياده ملهاش لازمه إنما بعد مجربتها لقتها ممتعه جدا خصوصا فى الصيف اما تفتحها سنه خفيفه كده وتستمتع بنسمه الهوا اللى داخلالك من غير تراب لان فيه مصد للغبار والاتربه فيها بيتفتح اوتوماتك..وتستمتع بدفا الشمس
2- الزينون....وماذا أقول...وأى قول يقال بعد كل ما قيل....مش حقولك غير انك كل اللى محتاجه 10 ثوانى عشان الزينون يسخن وبعد كده حتطيــــــــر لان طريقك مفتووح مفتووح يا ولدى لان محدش حيستحمل يقف قدام نورك لانه يعمى..وده الواطى اما العالى فحدث ولا حرج مع العدسه المتحركه فى 360 درجه واللى بتكشفلك كل سم قدامك..وده طبعا مع اضاءه الDay Light الزينون برده واللى لوحدها كفايه ان تخلى أى حد قدامك يقف ويتنح إما لإنبهاره بيها..أو عشان يتريق عليك ويقولك النور بتاعك منور أسطى...بطاريتك حتخلص....شعب غريب !!!
3-نقلات المانيوال فى الطاره......وكنت معتقد انى مش ححتاجها وملهاش لازمه... بس بعد اول استخدام ليها امبارح..حسيت قد ايه ممتعه جدا انك تركب عربيه قويه زى دى وتتحكم كمان فى النقلات المانيوال اللى بتديك سحب جباار يخليك تقلق انك متعرفش تلمها وتوقفها تانى...انا مرضتش احرق اكتر من 120 لسه كبدايه بس إن شاء الله اول ما أبدا العب فى العالى حنزلكم الصور
4- Anti Theft System وده لوحده حكايه....انا ملمتش كل مميزاته بس اهم حاجه فيه جربتها..ان العربيه جواها سينسورز لو قفلت العربيه وسبت الشباك مفتوح وفعلت النظانم ده...اى حركه تحصل جوه العربيه او حتى محاوله ان حد يدخل جواها السارينه اوتوماتك بتشتغل وصوتها كارثى بصراحه..ووبتفصل فورا دوره تشغيل الموتور وطرمبه البنزين مع استحاله تشغيلها الا بالريموت الاصلى بتاعها...حاجه عنب يعنى
5- Wide Touch Screen قمه المتعه والدلع مع الشاشه دى اللى ما شاء الله وسعها واضائتها تحفه لدرجه انى اتضطريت انى اركب فيميه قدام كمان عشان اترحم من بحلقه الناس اللى رايحه واللى جايه عليها....تقدر تتنقل ما بين 2 USB و 1 Memory Card و 1 AUX و 1 CD player بالاضافه الى ال Blue tooth .... بس للاسف معرفتش لحد دلوقتى ازاى اشغل عليها افلام وفيديو مع العلم انها المفروض بتشغل ده
6- تكييف وسخانات فى الكراسى...من منطلق اننا اتفقنا ان المؤخره هى اقوى واهم حاجه فى الانسيجنيا..فهى لازم تهتم بمؤخره ركابها....تكيفهم فى عز الحر...وتدفيهم فى عز البرد...ممتعه بجد......وعلى فكره الكرسيين الاماميين...فيهم اوبشن تعديل لفقرات القطنيه ممتعه ومريحه جدا..استغليتها فأنى فهمت صحابى ان ده مساج والساعه ب 50 جنيه وظبطت سخان الكراسى على أعلى حاجه ...اكتر واحد استحمل كان ربع ساعه
.......شريــــــر أنا******************************************
أنا : ما شاء الله ..لا ده كلام جميـــل...بس كل اللى قولتيه 90% موجود منه فى باقى العربيات...انا كواحد ركيــب ايه اللى يشدنى ليكى مختلف عن الباقى عشان افكر أجيبك..أو بمعنى اصح ايه نفط الدلع اللى عندك واقدر استفيد بيها ؟
النجمه : بعد ما وشها جاب ألوان طبعاً
.........تطلع مين انت عشان اهتم بيك ولا اجرى وراك وكمان ادلعك....يابنى انا الناس بتطلبلى الرضا ارضى وبحاولوا يشتروا خاطرى باى تمن وبيهتموا بيا ويدلعونى جداً على أخر الزمن تيجى انت تتنطط عليا !!! طيـــــــــــــــــــــب خد عندك بقى-Rain Sensor اول ما الدنيا تبدا تندع المساحات تشتغل لوخدها وسرعتها بتتحدد اوتوماتك مع سرعه المطر
-Light Sensor وانت ماشى بالنهار لو دخلت نفق او مكان نظلم النور ينور اوتوماتك ويرجع يطفى تانى....وكمان وانت بتلف فى اى دوران..العدسات لوحدها بتنور نور جانبى كده يكشفلك الطريق عشان متتفجأش بأى حاجه وانت بتلف
-Sound Sensor بيقيس حجم وكميه الهواء فى كابينه السواق وبيظبط لوحده الصوت نسبه وتناسب
-بمجرد وقوفك..الكرسى اوتوماتك يرجع لوحده خالص عشان تقدر تنزل براحتك ومتتحشرش فى الدركسيون....حلوه اوى لأصحاب الكرووش
-تقدر تنور نور الصالون والفوانيس بالريموت على ما توصل للعربيه عشان متاخدش وقت ان الزينون يسخن..اركب ودوووووس
-تقدر تفتح وتقفل المرايات والزجاج وفتحه السقف بالريموت
-المرايات الجانبيه بمجرد ما تجيب ال R تنزل تدريجيا لوحدها لتحت عشان تكشفلك طريقك وانت راجع متخبطش فى حاجه
- 2 ميمورى لوضعيه الكراسى عشان متتخانقش انت ومراتك على بعد الكرسى وكده
- مرايات العربيه كلها ذاتيه التعتيم عشان تترحم من غباوة السواقين ونورهم العالى
-فتحه السقف لما تفتحها كلها..فيه زى مصد او ستاره كده بتتفتح لوحدها عشات تصر التراب والغبار وتمنع دخوله كابينه العربيه
- دواسات اصلى محترمه وشيك اوى عليها نقس العلامه اللى على الكراسى Recaro
النجمه : هاااااااااااااا كفايه عليك كده ولا اكمل ؟؟
أنا : اللى إداك يدينا يا ستى...لا حلو أوى كده
*****************************************
النجمه : قبل ما نختم الإنترفيو الممتع موووت ده مع حضرتك... عاوزه أسألك سؤال...ممكن ؟؟
أنا : أوى أوى إتفضلى يا روحى
النجمه : بصفتك أحد مالكى الإنسيجنيا....تقدر تقولنا ايه اهم ملاحظاتك بعد مرور تقريبا 15 يوم على تجربتك معاها وايه اللى مضايقك منها ؟
أنا : هيـــــــــــــــــــــــــــــــــح ....كنت مستنى السؤال ده....بصى يا ست الكل:-
أولا : العربيه بتاخد وقت شويه على ما بتسخن معايا..يعنى لمده متتعداش ال 4 دقايق مثلا..وبضطر امشى بيها سنه بسيطه عشان المؤشر يوصل لل 90..معرفش هل ده بسبب اننا فى الشتا دلوقتى...ولا لأنها لسه جديده..ولا ده اصلا العادى بتاع الالمانى
ثانيا : استهلاك البنزين حاسه عالى... انا فولت اول مجبتها 92 عشان مفيش 95 هنا...قعدت بالظبط معايا اسبوعين عشان افولها تانى..مع العلم انى مطلعتش بيها على طريق سريع لسه ومعظم مشاويرى جوه البلد وانا عامل 510 كم دلوقتى....ايه بقى هاا ...بطنك كبيره مبتشبعيش ولا ايه ؟؟
ثالثا : كان فيه سنه تأخير بسيطه لما بدوس على البنزين واستجابت العربيه وبعدها كانت بتطير..بس لما سالت عرفت ان ده فى الالمانى كله عشان العربيه متفركش منى
رابعا : مش عارف اشغل الفيديوهااااات وده مضايقنى جدااااااااا
خامسا: الفتيس نوعا ما بحسه تقيل شويه فى النقلات...مش عارف بس يعنى مثلا لما انقل من ال N - R لازم انقل جامد شويه...طبعا دى اول عربيه المانى اركبها فمعرفش ده عادى..ولا يمكن عشان انا تخيلت مثلا انها عشان عربيه قويه جدا فموتورها و 6 سرعات وكده فا اقدر انقل نقلات الفتيس بصباع واحد ولما ملقتش كده حسيت انه تقيل...مش عارف !!
سادسا : معتقدش ان الالمان عمالقه اوى لدرجه انهم يصمموا اقصى قرب للكرسى من الدركسيون مش مناسبنى..انا 170 سم اه بس برضوا طايل الدواسات على السيكا..مش اسلوب ده يا جماعه
طبعا...الكمال لله وحده..ومهما كانت العربيه دى محترمه وجباره فأكيد فيها عيوب..بس انا عشان لسه جديد معاها فأكيد مكتشفتش كل حاجه فيها..بس والله وبدون ادنى مجامله او تحيز...العربيه اقسم بالله مجرد ركوبك ليها وقعدتك جواها..واحساسك بكل حاجه فيها ينسيك اى عيوب ممكن تقابلك...يكفى شعورك بالفخامه والقوه والشياكه فى وقت واحد.....ربنا يباركلى ويبارك لكل واحد هنا فى عربيته ويحفظهاله يا رب
أنا : طيب وفى نهايه حديثنا الممتع ده..نحب نشكر حضرتك جدا على وقتك معانا..ونتمنالك انتشار موفق وناجح ان شاء الله
النجمه : انا اللى ميرسى انك اتحتلى الفرصه دى عشان نتعرف على بعض انا وجمهورى واحب اوجه رساله لاى حد متردد بينى وبين عربيه تانيه..إتوكل على الله صفقه رابحه عمرك متندم عليها...عربيه فيها كل اللى ممكن تحتاجه وأكثر....
ودى شويه صور دلع مع النجمه بعد اللقاء
وللحديث بقيه ما دام فى العمر بقيه....
Comment