التكييف راكبه عفريت والله أعلم

[Hesham.H]

الإخوه الأعزاء
التكييف الحمد لله من سنتين اول ما اشتريت العربيه وهو زى الساعه .. الشحن تمام ومافيش تسريب وشغال كويس
اليومين دول ومع دخول الحر فى الجد وبدأ التهييس
اشغل الكمبروسر ومافيش تبريد ... نقيس الشحن مظبوط ... زود الفريون شويه اشتغل ... بعدها التبريد يقف تانى
فور الشحنه وشحنها من جديد ... اشتغل يومين وبعدين التبريد وقف
قاس الشحن لقاه مظبوط ... زود الشحنه شويه اشتغل وبعدها بيومين فصل
ايه رأيكو فى الكلام ده ؟؟
حاجه لاحظتها ان ماسوره الفريون اللى داخله على العربيه بتبقى سخنه جدا

[فادى محمد]

في ماسورتين ماشيين جنب بعض تحت فلتر الهوا.
المفروض واحده بتبقي ساخنه جدا والتانيه بارده.ده قصدك يا هشام؟

[alameer81]

كان عندى مشكلة شبه كده وطلع بلف على الكباس
اتغير وشحن من جديد ب 350 جنيه

[Hesham.H]

في ماسورتين ماشيين جنب بعض تحت فلتر الهوا.
المفروض واحده بتبقي ساخنه جدا والتانيه بارده.ده قصدك يا هشام؟

لا يا باشا .. ماسورتين داخلين صدر العربيه جنب خراطيم الساخن اللى داخلين على داخل العربيه ... فنى التكييف قاللى المفروض الماسوره دى ماتبقاش سخنه اوى كده

[jos116eph]

اعتقد والله اعلم انك عندك سدد فى الدورة ممكن تعمل نضافة للدورة بمادة اسمها تترا دى بتتباع عند بتوع الكيماويات فى وسط البلد فى مصر وبعدها غير الفلتر والاكسبنشن لان الفريون بيعمل مادة زيتية وبيسد مجارى السربنتينة الامامية او التلاجة الداخلية

[فادى محمد]

يبقي الاكسبنشن فالف مابيضغطش الغاز كويس علشان يحوله من سخن لبارد

[samaty]

يبقي الاكسبنشن فالف مابيضغطش الغاز كويس علشان يحوله من سخن لبارد

تمام كلام فادي
وللتأكد من ذلك يمكنك قياس ضغط الفريون والتكيف لا يعمل ستجد ان العدادين يعطون قراءة واحدة ثم قم بتشغيل التكييف المفروض أن تقل قراءة أحد العدادين ( ماسورة البارد) وتزيد قراءة الآخر (ماسورة السخن)
اما إذا ظلت القراءة كما هي فتكون المشكلة في الكمبريسور (في الغالب بلف الضغط --- الاكسينشن فالف)

[Hesham.H]

فى ملاحظه عاوز اقول لكو عليها قبل ما نحكم ... بمجرد ما الكمبروسر يشتغل بسمع صوت جاى من ناحيه التلاجه ( زى صوت تنفيس ) بس هو طبعا مش تنفيس ... زى صوت جريان الغاز داخل سربنتينه التلاجه ... الصوت ده ما كانش بيبقى موجود قبل كده .. بدأ يظهر مع بدايه ضعف التكييف ودلوقتى زاد
أعتقد ممكن يفيدنا فى التشخيص
تحياتى

[فادى محمد]

صوت ( فسسسسس) ده معناه فريون ناقص او فريون زياده.
كنت قولت انك زودت فريون مرتين ؟ يبقي ممكن يبقي نتيجه فريون زياده
شوف الضغط كام؟ المفروض 28 بار

[Hesham.H]

صوت ( فسسسسس) ده معناه فريون ناقص او فريون زياده.
كنت قولت انك زودت فريون مرتين ؟ يبقي ممكن يبقي نتيجه فريون زياده
شوف الضغط كام؟ المفروض 28 بار

فعلا يا فادى باشا زودنا الشحنه من كام يوم شويه صغيرين ... اشتغل شويه وبعدها بطل تبريد تانى

[cayman69300]

90 % بلف الضغوط
او كنترول الفتيس
تمنه 100 جنية و الدنيا هتبقى زى الفل

[Hesham.H]

90 % بلف الضغوط
او كنترول الفتيس
تمنه 100 جنية و الدنيا هتبقى زى الفل

حضرتك تقصد الاكسبنشن فالف ولا بلف الضغوط ده حاجه تانيه .. كمان انا عندى الفتيس مانيوال هل ممكن الكنترول بتاعه يأثر على التكييف ؟؟
واحد صاحبى قاللى النهارده ان الفريون طالما بيكون ضغطه مظبوط بس ما بيردش يبقى هو بيتحرق لمشكله ما فى الحراره أو السربنتينه مش بتبرده كويس .. مع ان الحراره عندى مظبوطه

[ghamry]

أكيد فى هواء فى دوره الفريون وده علاجه عمل vacuum كويس أى تفريغ ثم يشحن بالفريون وده طبعا بعد التأكد من عدم وجود تهريب (ضغط الدوره كلها بالهواء بنفس ضغط الفريون ويتم متابعته لمده ساعتين بعداد الضغط ولو لم يقل الضغط يبقى تمام يعمل تفريغ كويس ويشحن الفريون وشكرا)

[فادى محمد]

أكيد فى هواء فى دوره الفريون وده علاجه عمل vacuum كويس أى تفريغ ثم يشحن بالفريون وده طبعا بعد التأكد من عدم وجود تهريب (ضغط الدوره كلها بالهواء بنفس ضغط الفريون ويتم متابعته لمده ساعتين بعداد الضغط ولو لم يقل الضغط يبقى تمام يعمل تفريغ كويس ويشحن الفريون وشكرا)

لو في هوا في دوره الفريون التكييف هيشتغل ويبرد عادي جدا بس...
-هتلاحظ في ايام الحر ان في دخان (بخار ماء) خارج من الهوايات , ده نتيجه ان الهواء اللي متساب في الدوره وماتعملوش فاكيوم كويس تجمد علي الكويلر علي شكل تلج. وبيطلع علي شكل بخار ميه
مع مروحه البلاور..

[samaty]

لو في هوا في دوره الفريون التكييف هيشتغل ويبرد عادي جدا بس...
-هتلاحظ في ايام الحر ان في دخان (بخار ماء) خارج من الهوايات , ده نتيجه ان الهواء اللي متساب في الدوره وماتعملوش فاكيوم كويس تجمد علي الكويلر علي شكل تلج. وبيطلع علي شكل بخار ميه
مع مروحه البلاور..

أولا : منور يا فادي ..... عايز أكلمك وخايف تزهق مني
ثانيا : لو الدورة فيها هوا كفائة التكييف هتقل على حسب الهوا ..... طيب ليه؟
نعرف الأول إزاي التكييف بيبرد
البداية إن الفريون درجة غليانه ( تحوله من سائل إلى غاز) بتكون 29 درجة مئوية تحت الضغط الجوي
طبعا لو زاد الضغط هتزيد درجة الغليان ( قانون الغازات المثالية) لان الحجم ثابت وهو سعة مواسير التكييف
طيب دلوقتي انا هشغل التكييف
الكومبريسور ( الكباس) هيضغط الفريون ولما يزيد ضغط الفريون هيتحول لسائل علشان الضغط الواقع عليه وعلشان يتحول لسائل يبقى لازم طاقته الداخلية تقل فبتزيد حرارته بزيادة الضغط ( يبقى طارد للحرارة) لما بيمر جوا السربنتينة بيفقد الطاقة الداخلية بتاعته عن طريق تبريده بالهوا وبعدين بيروح على حاجة اسمها بلف الضغط دا وظيفته يحافظ على الضغط اللي قبل منه عالي واللي بعد منه منخفض وبعده التلاجة اللي بيدخلها الفريون درجة حرارته عادية لكنه سائل ولإن الكباس بيسحب منه علشان يضغط فالضغط جوا التلاجة بيقل وبالتالي الفريون بتقل درجة غليانه جدا وبيكون عايز يتحول لغاز علشان الضغط قل عليه فبيحتاج حرارة علشان طاقته الداخلية تزيد ويتحول لغاز فيبدأ يمتص حرارة من المحيط اللي بيمشي فيه وهوا مواسير التلاجة والهوا اللي ماشي فيها وهكذا دواليك يعني اللي بيعمله الفريون إنه بينقل الحرارة من التلاجة إلى السربنتينة
---------------
طيب تخيل بقى لو شغلنا التكييف بالهوا .... إيه اللي هيحصل
الهوا عبارة عن 80 % نتروجين بيغلي عندي درجة 196 تحت الصفر وحوالي 18 % أكسجين بيغلي عند درجة 183 تحت الصفر
يبقى علشان يتم تحويله لسائل لازم الضغط المنخفض يكون ربع الضغط الجوي ( أيوة صح ) وخد بالك إن الضغط العالي هيكون حوالي ثلث الضغط الجوي ودرجة حرارة السربنتينة اللي الفروض الهوا يبرده هتكون حوالي 150 درجة تحت الصفر والمفروض الهوا يبردها ل170 درجة تحت الصفر علشان تقدر تاخد حرارة من التلاجة اللي هتكون حرارتها 200 درجة تحت الصفر
طبعا دا شئ مش معقول ابدا
إحنا بنختار سائل التكييف على أساس إن درجة غليانه تكون فوق الدرجة المطلوبه بحوالي 25 درجة على الأكثر
وعلى ذلك لو يوم ما لقيتش فريون اشحن التكييف نشادر عليه شوية زيت وهيشتغل بس درجة الحرارة هترتفع بمقدار 4 درجات وده هيتعوض في كفائة السربنتينة
أو لو شحنت تكييفك بفلوريد الهيدروجين ( درجة غليان 19 درجة مئويه ) ممكن تتجمد في العربية
ثالثا : بخار المياه اللي بيطلع لو الدروة فيها هوا
دا لان الكومبريسور بيكون شغال على طول علشان يحافظ على الضغط بيتجمد بخار المياه اللي في الهوا وبيكون على شكل دخان ابيض --- كمان الموضوع ده بيحصل لو ترموستات التلاجة باظ أو اتلغى