العربيه مش عايزه تنطق خالص

[Tiar]

هتلاقي المارش عبارة عن اسطوانتين لازقين في بعض ودي صورته

الاسطوانة الصغيرة دي هى الأوتوماتيك ( اللاقط)
ودي صورته

طبعا انت فاكك صمولة مسمار من الاتنين قبل كده وخالع منها الكابل في العربية
دلوقتي هتفك التانية وتفك المجدول النحاس اللي واصل لجوه المارش
هتلاقي مسمارين صغيرين هتفكهم
وتشتال الوش ده بحرص
وتاخد بالك كويس
هتلاقي وردة نحاس مكبرت وهتلاقي اسطوانة حديد وفيها مسمار وهتلاقي تحتها سوستة
هتمسك كل ده وتغسله كويس بالفرشاة والبنزين وتشيل الاوساخ اللي عليه
هكمل بعد العشاء لاني هروح شغلي دلوقتي
المعذرة

الله ينور بجد .... اقترح انك تعمل موضوع لوحده عن المارش علشان الكل يستفيد

جزاك الله كل خير






طيار

[medosalah]

يا باشا ده فبره الكونتكات... المشكله دي ظهرت عندي كزا مره.. يعني كنت انزل الصبح اجي ادور الاقي العربيه بتنور العددادات والتسجيل يشتغل ولاكن لا يوجد اي استجابه او حتي اي صوت مع تدوير المفتاح في الكونتكات... بس انا كنت باطلع المفتاح وادخله تاني واقعد احاول ادور مره واتنين وتلاته لحد ما ربك كان بيسهر والاقيها بتدور وسعات كانت بتدور حتي مع رجوع المفتاح يعني وانا بلفه عكس الاتجاه كاني بطفيها علشان الفه تاني مع الاتجاه علشان ادورها..

بس قريب ان شاء الله اغير الفبره لان الموضوع لو حصل معايا في سفر او مشوار مهم هتبقش مشكله كبيره

[سيد الجندي]

ماشاء الله يا سمطي ( مع حفظ الألقاب ) ربنا يبارك لك ويجزيك خير
وفعلا ياريت تعمل الرد بتاعك موضوع منفصل ويتثبت مع مواضيع الورشة علشان الاستفادة تبقى أكبر

ليا تعليق بسيط بعد إذن الاساتذة الكبار
الوقتى المشكلة محصورة فى سببين رئيسين بناء على ردودكم فبرة الكونتاكت أو المارش سواء كانت نسبة كل حل كبيرة ولا صغيرة يبقى المفروض قبل ما ابدأ شغل فى تغيير الفبرة أو فك المارش لازم أحسم هوه مين اللى فيه المشكلة
أسهل حاجة تنزل تفك المصفحة وقبل ما تفك المارش وصل عليه كهربا مباشر بأي سلك لو اشتغل ركب المصفحة تاني واطلع شوف الفبرة وتوصيلتها
طب لو المارش ماشتغلش.... ابدأ فى الخطوات الجميلة بتاعت السمطي

وبالتوفيق ان شاء الله

[فادى محمد]

-وصل للمارش من البطاريه وشوف هيتحرك ولا لا؟ لو لقط يبقي المشكله فبره الكونتاكت ولو مالقطش يبقي مارش..
-فبره الكونتاكت لما بتتبري وتبوش تلاحظ ان الكاسيت بيطفي ويشتغل لوحده في المطبات- العربيه ماتدورش من اول مره مع عدم سماع صوت المارش واحيانا ماتدورش الا اذا ضغطت ع المفتاح لجوه..جديده ب100ج
وممكن تجيبها استيراد في حدود 70ج

[hagagatc]

يا باشا ده فبره الكونتكات... المشكله دي ظهرت عندي كزا مره.. يعني كنت انزل الصبح اجي ادور الاقي العربيه بتنور العددادات والتسجيل يشتغل ولاكن لا يوجد اي استجابه او حتي اي صوت مع تدوير المفتاح في الكونتكات... بس انا كنت باطلع المفتاح وادخله تاني واقعد احاول ادور مره واتنين وتلاته لحد ما ربك كان بيسهر والاقيها بتدور وسعات كانت بتدور حتي مع رجوع المفتاح يعني وانا بلفه عكس الاتجاه كاني بطفيها علشان الفه تاني مع الاتجاه علشان ادورها..

بس قريب ان شاء الله اغير الفبره لان الموضوع لو حصل معايا في سفر او مشوار مهم هتبقش مشكله كبيره

بس انا الفبره عمرها معلقت معايا ومره واحده حصل الموضوع ده ولا اي محاوله نفعت ودارت العربيه وفي حاجه غريبه حصلت امبارح لما طلعت المفتاح لقيته سخن مش عارف ليه

[hagagatc]

عايز تحل الموضوع بنفسك؟؟؟؟
عادي بقا
الأول خد نفس عميق وتأكد أن عملك الذي ستقدم عليه له فوائد جمة
كفاية أوي عامل الخبرة المهم حيث سيكون لديك بعد ساعتين خبرة بأعطال المارش وكيفية علاجها
وهذا من أهم ما يكون فلربما صادفك شء من ذلك وأنت على طريق لا تجد فيه أحدا
وصدق إذ كنت يوما باولادي في المنصورة وبينما نحن عائدون والساعة حوالي 11 ليلا أبت السيارة أن تدور
ماذا افعل والوقت ليلا ومعي الأولاد وكانت نفس مشكلتك تماما قمت برفع السيارة وحل المارش ووجدت فعلا أن أحد اللحامات قد فك
أعمل إيه وإحن نص الليل
استلفت مفك رفيع من أحد محلات صيانة الموبايل وقمت بحشر ورق في داخل اللاقط ليحافظ على التوصيلة ودورت السيارة وروحت
الاوات المطلوبة ( مفتاح مقاش 13 جنب شرشر وجنب بلدي + مفتاح مقاس 8 جنب مشرشر وجنب بلدي + مكواة لحام كهربائي قدرة 120 وات أو أكبر + متر قصدير + لتر بنزين + فرشاة أسنان قديمة " لو مفيش قديمة هات جديدة وأمرك لله" + شحم)
طيب هنعمل إيه
هتلبس لبس شغل يعني أي ملابس قديمة "ولو مفيش قديمة البس أكتر طقم بتكرهه عادي يعني " بنص كم وحط القميص في البنطلون ( كلام سكتشف أهميته حين تتسخ يداك ولا تستطيع لمس جسمك ولا هدومك)
عرف حد من البيت إنك هتعمل شغل في العربية ( برده مهم جدا - لو إحتجت لشئ ضروري وناديت على حد يبقى عارف هيجيلك فين بدل ما يقعد يدور عليك وفيه أمور الثانية فيها بتعمل فرق كبير)
هتنزل ترفع العربية لأقصى مدى ممكن ( ترفع عجلة من قدام لآخر الكوريك وحط تحتها حاجة جامدة وثابتة وتروح ترفع العجلة اللي قدام التانية زيها وبدره تحط تحتها حاجة) ولا تعتمد على الكوريك في بقاء السيارة مرفوعة أبدا بل لا بد أن تعتمد على أجسام صلبة وثابتة ( قطعة خشب - حجر - طوب)
تشد فرامل اليد كويس وتدي العربية الباركينج لو أتو ماتيك أو الأول لو مانيوال
تحط طوب أمام وخلف العجل الخلفي
إشتال كابل البطارية
تجيب حاجة تفرشها تحت الاكصدام الأمامي
تنزل تفك المصفحة لو موجودة من قدام وتسيب مسمار واحد بس وا تهويه شوية
ودي المصفحة على جنب علشان تشوف شغلك
هتلاقي كابل جاي من البطارية واصل بمسمار نحاس بصمولة مقاس 13 فكه واشتال الكابل واربط الصمولة مكانها علشان مش تضيع
هتلاقي سلك واصل بكليبس هتشده (ده كان واصل لأتوماتيك المارش ( اللاقط)
الجسم اللي كان راكب فيه الكابل ده هوا المارش
هتلاقيه مربوط في جسم العربية بمسمارين أو 3 مقاس 13
هتفكهم
خد بالك أحيانا بيبقى المسمار له صمولة من ناحية الفتيس
هتمسك الصمولة بمفتاح وتفك بمفتاح
كده يبقى المارش معاك
خده وإجري بقى بعيد عن العربية واقعد في حتة نظيفة وظل وياريت تحت المروحة او في التكييف علشان تشتغل ببال رايق

سوال ليك لما العربيه عملتها معاك لما كنت تيجي تدور كنت بتسمع صوت تكه او اي صوت

[hilal]

بس انا الفبره عمرها معلقت معايا ومره واحده حصل الموضوع ده ولا اي محاوله نفعت ودارت العربيه وفي حاجه غريبه حصلت امبارح لما طلعت المفتاح لقيته سخن مش عارف ليه

كده تبقى فبرة كونتاكت

[hagagatc]

كده تبقى فبرة كونتاكت

فعلا طيب ايه حلها

[فادى محمد]

فبره يا ا عبد الرحمن.
هاتها جديده واي حد بتاع كوالين يفك القلب
هتلاقيها وراه علطول

[haisam ali]

فبره يا ا عبد الرحمن.
هاتها جديده واي حد بتاع كوالين يفك القلب
هتلاقيها وراه علطول

وسعات بيتعملها طريقه ...... تخشينه كده مابين الفبره والدراع الحديد بتاع الطبله ..... انا عملتها قبل كده فى كورسا ٩٧ بتاعت واحد صاحبى واشتغلت زى الفل .... هذا وبالله التوفيق

[samaty]

هقوللك على حاجة متعبة شوية بس إن شاء الله هتجيب فايدة
هتجيب حاجة تفرشها قدام العربية وتنام عليها وتبص على المارش
المفروض فيه سلك واصل ليه لو السلك مش واصل وصله
هوا سلك بكلبس كهربا بيوصل في ظهر المارس من طرف الاسطوانة الصغيرة ( أتوماتيك المارش)
لو واصل هتجيب حتة سلك توصلها بموجب البطارية وتوصلها مكان السلك ده لو دار المارش يبقى سليم والعيب في الكتاوت او الكونتاك
لو المارش ما نطقش أصلا يبقى العيب منه
وعايزك تتأكد إن المارش مربوط كويس مش سايب
لإن المارش بياخد الارضي بتاع تشغيله من جسم العربية
وإن شاء الله الخير هيكون

دا أول رد انا رديته وكان الغرض منه التأكد من سلامة المارش

[samaty]

لمبه التشيك بتفضل قيده عادي انا جربت كل الي انت بتقول عليه شيكت علي ٢ كتاوت الي فوق الابي اس
والفيوزات كلها تمام مش عارف العيب فين اتصلت بميكانيكي جالي جرب السليكتور سوتش مفيهوش حاجه
خبط شويه علي المرش العربيه عملت تكه واحده وبعدها سكتت وبعدها قلي ده مرش
هل يبوظ مره واحده يبوظ مره واحده

دا اللي خلاني أشك في المارش
التخبيط جاب نتيجة وذلك لأن المكونات السايبة اللي جواه بتتحرك
أتمنى أكون مخطئ

[kahk2008]

بس كانت مبتديش اي صوت لما تيجي تدور

مكنتش بتدى اى صوت ولا حتى العدادات والتابلوه كانوا بيتوروا . ..... كانت حالة وفاة تامة

[amr elsisi]

أشك في حالتين بعد الكلام الي فإن
احتمال من حساس أعلي الفيس مسؤل عن أما ن العربية علي وضعي p n
أو من ألفية أعلي الفيس المجمعة بموجب المارش

[hagagatc]

الحمد لله المشكله اتحلت فعلا كان المارش الي بايظ والغريبه انه مكنش ليه اي مقدمات خالص تغيب مثلا في الدواره
فكينا المارش النهارده لقيناه الشربون مفيش خالص بالاضافه ان الاطراف النحاس الي بيلف عليه الشربون متاكله تماما عملت تجويف في النص و اختبرنا الفبره قبل الشغل ولقينا تلقيطها تمام من تحت فيشه الفيبرا بتوصيل اطراف