اتفرجت علي اوبل وليا كام سؤال وكام ملحوظة

[al_manara]

السلام عليكم

عيد سعيد . كل عيد وانتم بخير

اتفرجت علي اوبل b1
ليا كام ملحوظة عاوز اعرف دة عيب فيها ولا الاوبل كدة

-التكيف تعبان (بقارن بهيونداي اكسيل)
-الباور تقيل (بقارن بهيونداي اكسيل)
-صوت الموتور مسموع وانت قافل الزجاج (العزل)
-زرار التكيف لو قفلت المروحة بيكون شغال والكباس شغال . عكس باقي العربيات اما اطفي المروحة الكباس يفصل
-فتحت درج الطابلوة لقيت زرار في اخرة دة بتاع اية ؟

طبعا فيها حاجات تانية عجبتني
-الصالون مريح
-صاج واضح انة حديد (فولاز بالمقارنة بالكوري)
-الموتور قوي
-شنطة جميلة جدا

الي شفتها برة وجوة موديل 98 ومطلوب 50 الف 1600 مانيوال .
وفي واحدة تانية موديل 98 ب 45 رشة برة بس 2000 مانيوال .


هل ينفع اخد ال 2000 واخليها اوتوماتيك ؟ هاتكلفني كام واية الحاجات الي هاحتاج اعملها ؟

[o0Hanafi0o]

لا طبعا هو من ناحيه المنطق هينفع بس هتدفعلك ما لا يقل عن عشر الاف ومش هتباه زى الاوتوماتيك الفبريكه وعلى فكره فى ال b1 معروف ان المانوال اغلى من الاوتوماتيك فدورلك على واحده اوتوماتيك احسن لو عايز انا شايف ان سعر العربيتين ممتاز بالنسبه لحالتهم مع العلم ان سعر العربيات رفع نسبيا بعد موضوع البنزين وانا مستغرب الموضوع داه المفروض ينزل مش يعلى بس عموما متفرحش اوى ان اى عربيه شركه برا وجوا ولازم ترفعها وتلف على كل حاجتها وشوف دواسه الدبرياج حاسس ان طقم الدبرياج حالته معقوله ولا لا ودور وامشى بيها مشوار واحرق على الغيارات وشوف صوت الموتور عامل ازاى ولو بتسوق كويس حاول تطلع على طريق مفتوح وتحاول تجيب اخرها امسك مساعد مساعد وافتح الكبوت والشنطه واطلع وانزل بالعربيه من نحيته شوفه بيشفط حلو ولا لا وطلعته ونزلته سليمه ولا خفيفه اوى والكوتش جديد ولا لا ديه الحاجات الى فاكرها دلوقتى فى الحاجات الاساسيه لان الحاجات ديه غاليه ووجودها فى اى عربيه بيفرق مبالغ لانك مثلا لو هتاخد عربيه كاوتشها هلكان هتغيرلها كوتش ما لايقل عن 2000 جنيه لو هتركب حاجه معقوله وهكذا وبالتوفيق ان شاء الله

[o0Hanafi0o]

ااه نسيت اقولك خد بالك من حاجه ان الاوبل من العربيات الى محدش بيفرط فيها لو العربيه سليمه لانها لما بتباه مش فاتحه بقها وحالتها حلوه احسن من الزيرو واحسن من حاجات اعلى من فئتها بكتييييير فداه بيخلى معظم الى عارضين عربيات زهقانين منها وطالعه عينها فركز كويس وانت بتفحص وشوف كل حاجه حالتها عامله ازاى وطمنا عملت ايه

[abohanafy27]

والله الاخ hanafi قالك علي المفيييييييييييييييييييييييييييييييييييييييييييييي د ونصيحه من اخ ابعد عن الاوبل عربيات فاشله وكل عام وانتم بخير

[احمد فهمى]

العربيه واضح ان فيها مصاريف وتكيفها اعتبرو عطلام ﻷن مفيش حل وسط فى تكيف الاوبل وصوت الاوبل كلو عالى عن الكورى ده طبيعى والزرار اللى فى الطابلوه ده بيحول الطابلو تلاجه لو معاك حاجه عايز تسقعها والباور اكيد اتقل من الكوري ﻷنها عربيه تقيله لو ناوي وكشفت خليك فى ال1600 مانيوال وانسى قصة الاوتوماتيك والتعديل واعمل حسابك هتصرف رقم فى البدايه ولا ينصح بأوبل متبهدله واعمل حسابك فى تكيف او 50% من مكوماته هتتغير

[Abdo Taha]

دور كويس و اصبر عشان لو اوبل حالتها وحشة هتكره العربية و هتكره الاوبل خااااالص ، اما لو حالتها كويسة مش هتقدر تركب غيرها الا بقى لفئات اعلى و هتحب العربية دي جدا .

[Omar Mahmoud]

العربية دي اخر حاجة تبص عليها إذا كانت رشة برة و لا لأ
التكييف اداءه اقل من الكوري بس لو التكييف نفسه مش شغال هيبقي مشكلة إنك هتصلحه و هيتكلف
السخونة تركز جامد إن العربية حرارتها كويسة لإنها لو بتسخن هتدوخك و طبعا ده غير فتي الصنايعية
غير إن العربية ككل تكون حالتها ممتازة لإن غير كدة هتكره العربية.

[Salamas]

دور كويس و اصبر عشان لو اوبل حالتها وحشة هتكره العربية و هتكره الاوبل خااااالص ، اما لو حالتها كويسة مش هتقدر تركب غيرها الا بقى لفئات اعلى و هتحب العربية دي جدا .

+ 10

فعلا اهم عندى من انها تبقى فبريكه بره او لا .. حالتها كويسه ولا لا

لان الاوبل لو كويسه مش هتغيرها غير بزيرو .. لو تعبانه ممكن تبيعك البيت او ترميها فى البحر :d

[o0Hanafi0o]

اباه طمنا عملت ايه ؟؟

[subzero772]

حاجة صغيرة بس مفيش 2000 مانوال

[al_manara]

-زرار التكيف لو قفلت المروحة بيكون شغال والكباس شغال . عكس باقي العربيات اما اطفي المروحة الكباس يفصل

الي شفتها برة وجوة موديل 98 ومطلوب 50 الف 1600 مانيوال .
وفي واحدة تانية موديل 98 ب 45 رشة برة بس 2000 مانيوال .

شكرا جزيلا ياشباب علي مشاركتكم

لو سمحتم محتاج رد علي النقط السابقة
انتوا اجبتم علي الباقي

[haisam ali]

شكرا جزيلا ياشباب علي مشاركتكم

لو سمحتم محتاج رد علي النقط السابقة
انتوا اجبتم علي الباقي

ده مظبوط جدا كده ياغالى الاوبل فيكترا b كده اول ماتشغل الكمبروسر التكييف يشتغل والمراوح بتلف خفيف جدا

[al_manara]

ده مظبوط جدا كده ياغالى الاوبل فيكترا b كده اول ماتشغل الكمبروسر التكييف يشتغل والمراوح بتلف خفيف جدا

انا اقصد
الكمبريسور بيكون شغال واللمبة بتاعتة منورة وانا قافل المروحة (مفتاح المروحة علي off)

هل دة صح

والحاجة التانية السعر بتاع العربية ؟

[haisam ali]

بإذن الله كده التكييف مظبوط .... والسعر ده مظبوط لكن حسب الحاله طبعا