ارجو المساعدة ضرورى جدااااااا

[Ahmed adel 23]

السلام عليكم
اولا العربيه فيكترا 1997 مانيوال
المشكله كالاتى
النهاردة الصبح كنت مسافر من القاهرة للاسكندريه مشيت من القاهرة حوالى 7 ونص الصبح ووصلت 11 المهم المشكله انى على الطريق ماشى 120 ومؤشر الحرارة نازل اوى غير الطبيعى بتاعو )الطبيعى انو كان بيبقى على 97 يعنى قبل ال100 بشويه دة مع الزحمه وفى الفاضى بيوصل لل 90 ويثبت(
المهم النهاردة كنت جايب 120 معظم الطريق ومع ذلك العربيه باردة جدا لدرجه ان الحرارة وصلت لل 0 زيرو يعنى كانت فى المؤشر الازرق ففضلت مركز معاها جدا واكتشفت انها لما بشيل رجلى من البنزين الحرارة بتزيد لل 80 او 90 ولما بدوس بنزين بتنزل تانى للازرق
فشغلت التكيف لان العربيه مع التكيف كانت بحالات سعات تسخن اوى وسعات تبقى طبيعيه فقولت جايز تسخن
لقيتها زى ما هى ? ارجوكو افيدونى لانى خايف ارجع بيها مصر الماتور يبوظ او اى حاجه تانيه

[Ahmed adel 23]

حاجه اضافيه انا امبارح بليل وانا بحط ايدى على فتحه التكيف لقيت فى هوا ساقع بيخرج بالذات وانا دايس بنزين وماشى
فكدبت نفسى قولت يمكن علشان بليل والجو ساقعه
ارجوكو ساعدونى

[هشام السيد]

ممكن تكون المروحه الكتاوت بتاعها معلق علس سرعه عاليه شغال طول الوقت وانت مش واخد بالك حصلت فيا قبل كده

[ghamry]

ممكن يكون ثرموستات الكوعه مش موجود

[sherif_m72]

عادى جدا يا استاذ\ احمد
الاوبل على الطريق فى السفر وخصوصا فى غير اوقات الظهر بتكون حرارتها منخفضه جدا وممكن تسافر مشوار طويل جدا من غير ما المروحه تشتغل اساسا

[هشام السيد]

لا بس المفروض الحراره ماتقلش عن ٨٠ او بتنزل سنه عنها صغيره دا لو بارده اوي اوي خاصه ان الجو حر اليومين دول

[haisam ali]

تقريبا كده ثرموثتات الكوعه باظ عند حضرتك

[sherif_m72]

لا الترموستات كده مش بايظه هي مش موجوده اساسا

[sherif_m72]

مدام نزلت على الازرق فى الطوالى يبقى مش موجوده لان كده بقت مساحة دورة الماية اكبر
انما طبيعى انها تقل جدا فى السفر فى الرطوبه حتى لو الترموستات راكبه بس اللى ينزلها للازرق عدم وجودها

[Ahmed adel 23]

طب نزولها للازرق دة خطر على الماتور ولا ايه
بس هى نزلت للزيرو يعنى كان العربيه ممشيتش اصلا هل دة فعلا بسبب ترموستات الكوعه
شكرا جدا للناس اللى ردت والحمد لله رضكو ريحنى شويه انها مش حاجه كبيرة اوى

[Ahmed adel 23]

بس سؤال معلش انا اسف
ايه علاقه ان العربيه تبرد بانى وانا دايس بنزين الحرارة تقل ولما اشيل بنزين الحرارة تزيد ليه?

[Ahmed adel 23]

محدش رد ?

[sherif_m72]

الموضوع بسيط
انت لما بتكون على طريق مفتوح والجو حرارته معقوله اندفاع العربيه مقابل الهوا بيساعد جدا على تبريد الموتور
فى اغلب الاوقات ممكن متشتغلش المروحه وده معناه ان العربيه موصلتش لدرجة الحراره المطلوبه
انما لو حضرتك زودت بنزين اكتر وعديت مثلا 5 ار بى ام وقتها الحراره هتزيد لكن مش هتزيد لدرجه تقلق متخافش
حضرتك بس زياده فى الحرص ممكن تتأكد ان مروحة التكييف بتشتغل مع الكونتاكت ولا لآ
لانها مش المفروض انها تشتغل مع الكونتاكت

[Ahmed adel 23]

هى مكانها فين حضرتك معلش انا اسف انا متعب شويه
وشكرا لرد حضرتك

[sherif_m72]

لا ابدا تحت امرك فى اى شيء
مكانها ورا الشبكه
وممكن تسمع الصوت مع فتح الكونتاكت لو معرفتش تبص كويس