مشكلة في سنتر لوك فيكترا 95

[ahmedkasem]

عندي مشكلة في السنتر لوك بتاع الاوبل فيكترا 95
وهي اني لما بقفل السنتر بيفتح لوحده تاني بعد ثانية واحدة او ثانيتين
علما بان البساتم اللي راكبة بتاعتها الفابريقة
ووحدة الانذار والريموت spy 2 way

وغيرت البساتم وجيبتهم استيراد بتوعها الفابريقة ونفس المشكلة
وساعات جلنب بيشتغل الجنب الشمال مثلا والجنب التاني بيفصل لا بيفتح ولا يقفل
وساعات باب واحد بس اللي بيعلق بس
ياريت لو حد مر بالمشكلة دي او عنده خلفية عنها يفيدني

[ahmedkasem]

متابع

[loda80]

+11111111111111
كان عندى نفس المشكلة بس راحت لوحدها مش عارف ازاى وساعات تعلق

[ahmedkasem]

طيب عموما المشكلة اتحلت
وللافادة كان العيب في فيشتين مدورين موجودين في باب السواق
لما فكيت الفرش بتاع الباب عشان اراجع على سلوك السنتر لقيت واحدة فيهم مش راكبة
المهم قولت اركبها واجرب
وفعلا لما ركبتها السنتر اشتغل تمام
وعشان اتأكد قولت افصل الفيشة تاني واجرب وفعلا لما فصلتها المشكلة رجعت تاني
المهم انا ركبتها دلوقتي والسنتر كله الاربع ابواب والشنطة والتانك شغالين تمام

وعلى فكرة سبب فصل الفيشة دي هو مكنة الازاز الكهربة لأن السلك كان فالت من الكلبسات اللي بتثبته في الصاج بتاع الباب عشان كدة لما كانت مكنة الازاز بتنزل كان السلك بيتشد والفيشة بتفصل

عموما انا قولت اعرفكم حل المشكلة عشان الكل يستفاد

[haitham2011]

السلام عليكم

لسه شاري فيكترا و السنتر مش شغال و العربيه هتقطع بنزين و مش عارف افتح التنك
يا ريت تفيدوني بمكان الفيوز او الكتاوت لو تكرمتو

[ahmedkasem]

السلام عليكم

لسه شاري فيكترا و السنتر مش شغال و العربيه هتقطع بنزين و مش عارف افتح التنك
يا ريت تفيدوني بمكان الفيوز او الكتاوت لو تكرمتو

لو فيكترا a هتلاقي كتاوت السنتر جنب كتاوت البنزين والاتنين موجودين في الجنب اليمين تحت كارتة الكنترول وهتلاقي كتاوت السنتر اكبر واطول من كتاوت البنزين

وفي كمان فيوز للسنتر هتلاقيه في علبة الفيوزات اللي في الجنب الشمال ولو معرفتش انهي فيوز ممكن تكشف على الفيوزات كلها والفيوز اللي قاطع تغيره
وممكن تفك المسامير بتاعة قاعدة البستم بتاع سنتر البزين من جوة الشنطة وهتلاقي البستم بالقاعدة طلعو معاك وبكده تفتح تانك البنزين
وده حل مؤقت عشان تعرف تفول بنزين على ما تصلح السنتر لان المشكلة ممكن متطلعش فيوز او كتاوت وممكن تكون دايرة قاطعة او بساتم قافشة او معلقة

[Mr.Lawyer]

طيب عموما المشكلة اتحلت
وللافادة كان العيب في فيشتين مدورين موجودين في باب السواق
لما فكيت الفرش بتاع الباب عشان اراجع على سلوك السنتر لقيت واحدة فيهم مش راكبة
المهم قولت اركبها واجرب
وفعلا لما ركبتها السنتر اشتغل تمام
وعشان اتأكد قولت افصل الفيشة تاني واجرب وفعلا لما فصلتها المشكلة رجعت تاني
المهم انا ركبتها دلوقتي والسنتر كله الاربع ابواب والشنطة والتانك شغالين تمام

وعلى فكرة سبب فصل الفيشة دي هو مكنة الازاز الكهربة لأن السلك كان فالت من الكلبسات اللي بتثبته في الصاج بتاع الباب عشان كدة لما كانت مكنة الازاز بتنزل كان السلك بيتشد والفيشة بتفصل

عموما انا قولت اعرفكم حل المشكلة عشان الكل يستفاد

ممكن صوره لمكان الفيشه اللى حضرتك بتتكلم عليها دى ، لان عندى نفس المشكله ، رشيت Wd40 ، اتصلحت يومين ورجعت تانى والسنتر بيهيس

[ahmedkasem]

ممكن صوره لمكان الفيشه اللى حضرتك بتتكلم عليها دى ، لان عندى نفس المشكله ، رشيت wd40 ، اتصلحت يومين ورجعت تانى والسنتر بيهيس

هحاول افك فرش الباب واصورهالك بس سيبني يومين على ما الجو يتعدل شوية عشان الشتا عندنا في اسكندرية مش مبطل بقاله يومين