إجراءات المرور و االنقل من مرور الى مرور اخر

[sameh_se]

السلام عليكم ورحمة الله وبركاته

يا شباب لو العربية منتهية الترخيص و عاييز ارخصها و انقلها مرور تانى اروح المرور بتاعى الاول ولا مرور العربية اجيب شهادة بينات للمرور بتاعى .
لو ممكن حد يقولى الاجراءات بالترتيب .
و شكرا ،،،،،،

[tameem2010]

تلاوح الاول تدفع مخلفاتها وتجيب شهادة بيانات للرخصة من المرور القديم وبعد كده تروح تكمل اجراءات في المرور الجديد

[سامح السيد]

السلام عليكم ورحمه الله وبركاته
اجراءات نقل الملكيه من مرور لمرور فى حاله انتهاء الرخصه وفى حاله عدم تسجيل السياره باسمك (بمعنى انك لسه ماشى بالتوكيل ويكون توكيل بيع لنفسك )
١-تتوجه للمرور التابع له العربيه(المرور القديم ) ويكون معاك الرخصه واصل التوكيل وتقوم باستخراج شهاده بيانات للشهر العقارى علشان تسجل لنفسك
واستخراج شهاده بيانات للسياره وفى حال مرور اكثر من شهر على انتهاء الرخصه حتدفع تلت الضريبه وحتدفع ضريبه سنه (مش حتدفعها تانى فى المرور اللى انت تابع له) وتطلب منهم ان الشهاده موجها للمرور اللى انت تابع له من خلال محل الاقامه
٢-تتوجه لنيابه المرور التابع له السياره وتقوم باستخراج شهاده مخالفات ويفضل تكون فى نيابه المرور قبل الساعه ١٢ظهرا
بعد الحصول على شهاده بيانات الشهر العقارى وشهاده البيانات وشهاده المخالفات
٣- تتوجه الى اى مكتب شهر عقارى ويكون معاك شهاده بيانات الشهر العقارى واصل التوكيل وتقوم بتسجيل السياره باسمك (صلاحيه عقد التسجيل شهر من بدايه يوم التسجيل)
٤-تتوجه المرور اللى انت تابع له ويكون معاك الرخصه واصل التوكيل وعقد التسجيل وشهاده البيانات والمخالفات
وتقوم بشراء ملف واوراق فحص
وفحص الطفايه وشراء شنطه اسعافات ومثلث
٥-تتوجه الى مهندس الفحص حيقوم برفع بصمه الشاسيه وبصمه الماتور وعمل استعلام امنى
وحيطلب منك مصابقه البصمه فى المرور القديم (ولايشترط انك تاخد معاك السياره )
٦-تتوجه الى المرور القديم ومعاك ورق الفحص وكل الاوراق المتعلقه بالسياره وتطلب منهم عمل مطابقه للبصمه وبعد الانتهاء من المطابقه تتوجه الى مكتب مباحث المرور لعمل استعلام امنى
٧-تتوجه الى مرورك وتذهب الى مهندس الفحص وتعطى له اوراق الفحص وبع الانتهاء من الفحص
تتوجه الى شباك الترخيص وتعطى له كل الاوراق
وحيسئلك ترخص كام سنه -لو حترخص سنه مش حتدفع ضريبه لانك دفعتها فى المرور القديم
حيطلب منك تدفع التامين الاجبارى وثمن اللوحات الجديده وطوابع شرطه
وبعد ذلك سيطلب منك تسليم اللوحات القديمه الى المخزن - واستلام اللوحات الجديده واستلام تصريح ٣شهور لحين وصول الملف من المرور القديم
وربنا يعينك ،،،،،،،،،واهم شى يكون عندك صبر ،،،،،،،،،،،،،،،،،واسف للاطاله

[سامح السيد]

فى حاله نقل الملكيه من مرور لمرور داخل نفس المحافظه غير مطالب بتسليم اللوحات القديمه وغير مطالب بدفع ثمن اللوحات الجديده
وكذلك الامر فى الطفايه غير مطالب بشراء طفايه جديده ولكن الصلاحيه ساريه المفعول (لم يمر على تاريخ الانتاج خمس سنوات ) اما لو من خارج المحافظه حيطلب منك شراء طفايه جديده

[batestota_62]

انا عايز افهم بس تكاليف كل ده يعمل كأم انا معايا فيكترا ٩٥ ٢٠٠٠ سى سى

[harphosh]

لو هترخص 3 سنين تعمل حسابك فى 1500 جنيه للترخيص بالمرور وحوالى 500 جنيه لنقل الملكية بالشهر العقارى
الأرقان تقريبية لأنها بتتحسب على الموديل والسعة اللترية ولكنها قريبة جداً من الفعلى فكل الموضوع فى حدود 2000 جنيه لو ترخيص لمدة 3 سنوات

[sameh_se]

الف شكر يا رجاله و دعواتكم معايا