اشتري اوبل ولا فيرنا

[mohammedrady]

سؤال لاهل الخبره ... انا كان معايا مرسيدس 200 معدله وبعتها علشان مصاريف التشغيل مرتفعه
من قطع غيار وخلافه
المهم انا عاوز اجيب عربيه في حدود 45 الف تنفع للسفر وتستحمل طريق اسكندريه الزراعي
محتار ما بين الفيرنا اللي قطع غيارها ببلاش بس مفيش امان و بين الاوبل اللي مش اي حد بيعرف يشتغل فيها
انا من سكان الهرم
اظن قلتلكو على كل حاجه ... مستني اراءكم

[hugan]

هاكون ميال للفيرنا
خاصه انك بعت مرسيدس لمصاريف التشغيل

[ramy_shousha]

والله أنا اتحطيت فى الموقف ده بالظبط
فيرنا 2009 gl
أوبل كورسا 2006 وبتاع واحد زميلى مدمن أوبل
واخترنا الفيرنا مش علشان هى الأحسن - لأ طبعاً
بس علشان عملية فى الصيانة وقطع الغيار وسهلة الصيانة مش محتاجة حوارت كتير غير الأوبل اللى عاوزه صنايعى محترم جداً وغالباً بتاع أوبل بس
قطع الغيار السعر طبعاً مفيش مقارنة - بس برضه الكفاءة والإعتمادية للأوبل أقوى ولو كانت أغلى
الفيرنا إعادة بيعها أسهل بكتير من الأوبل
علشان كده جبت الفيرنا - مع إنى بحب الأوبل وخاصة الكورسا

[bluemail]

طالما بعت المرسيديس علشان مصاريفها عاليه يبقي انت محتاج فيرنا او لانوس

[m7nsh]

فى رأيى كل واحده تتلخص فى التالى عن سواقه طويله للاتنين :
الفيرنا : تكيف تلاجه .. سحب ممتاز من الثبات ..قطع غيار رخيصه الى حد كبير .. اى بواب بيفهم فيها .. اعتماديه اعلى من الفيكترا و لكن مش فرق خزعبلى
و لكن : لايوجد ثبات .. ماتوصلوش لحاجه اسمها فرامل او عزل .. خامات تعبانه و صاج لو دوست عليه بصابعك بيتطبق ..
الفيكترا :ثبات فلكي رغم انها عاليه جدا " فى مره كنا راكبين 6 و باطلع المطب وش فى وش عادى ".. صاج غشيم جدا ,,عزل ممتاز .. اوسع و شنطه اكبر .. فرامل حدث ولا حرج .. اوبشن اعلى ..خامات محترمه جدا ..قطع غيار بردو مش غاليه ولكنها اغلى شويتين من الفيرنا و لكن بتفضل سنين مهما هرست فيها " الفيكترا بي اكاد اجزم انها ارخص قطع غيار عربيه المانى فى مصر "
و لكن : تكييف مش قد كدا .. سحب سيئ من الثبات بيتحسن مع الجري ..عاوزه متخصصين و عدوها الصنايعي اللى مش فاهم او بيجرب .. الباور بتاعها اتقل شويه صغيرين من الفيرنا " الاتنين باورهم مش ناعم " .. مشاكل حراره لو العربيه فيها لعب انما لو دوره الميه مظبوطه تنساها و عن تجارب مكانتش بتسخن رغم ان الدوره كانت ناقصه اكتر من لتر " هى كلها 7 لتر تقريبا " القصد ان مشاكل الحراره بتظهر بسبب ان عندك مشاكل جوهريه فى دوره الميه مش زى مالناس متصوره انها بتسخن لو حد نفخ فى الكبوت ..

فى النهايه ارشحلك الفيكترا بقوه شنيعه .. و بالمناسبه انا رايح جاى بيها ع الزراعى و فاهم متطلباتك .. مطبات الهوا و الاسفلت اللى مش منتظم دا مش هتعرف تجري بالفيرنا عليه ..

[Omar Mahmoud]

لو بتتكلم عن الفيكترا او حتي الكورسا بي هاتشباك لا يقارنوا بالفيرنا من اي حتة
معتقدش إنك هتعرف تركب الفيرنا بعد المرسيدس...
بس للحق الفيرنا احسن في التكييف و قطع غيار منتشرة اكتر و ارخص بس الاوبل معظرة اكتر بشوية و طلعة اسرع من الاوبل
بس الاوبل تتفوق في
-الثبات
-الفرامل
-الخامات
-قوة الصاج
-الامان
-الوسع سواء من جوة او الشنطة

[sherif moneer]

بسيطه خالص
هات فيرنا عشان تتأكد ان الألماني ملوش مثيل و تقوم بايعها بسهوله وعن اقتناع ﻷنها عربيه خفيفه وملهاش ف الثبات والفرامل
تقوم بايعها وجايب فيكترا بي موديل من96 ل 99 بتمن الفيرنا وتجيلنا هنا تقولنا ده انا كنت راكب حماره عارجه
وتقولنا الالماني ده نعمه وماشاء الله علي العربيه الفيكترا دي
اقولك :-d هات فيكترا احسن م الاول :-d

[memo2000soft]

والله يا جماعة انا مش فاهم ازاي اقارن الاوبل حتي لو كان تقفيلها برازيلي زي الكورسا بالفيرنا.
حد يقولي اية هي اساسيات المقارنة بينهم اعتقد ان المقارنة هتظلم الفيرنا مع احترامي ليها ولكل ملاكها.

[احمد احمد]

عن تجربه
توكل علي الله وهات اوبل فيكترا من 96 الي 99
عربيه بسم الله ماشاء الله جميله جدا
وهتنفعك في سفرك الطويل
توكل علي الله
بس اهم حاجه حاله العربيه

[Hosamashour]

طبعا مفيش مقارنه اساسا بين الفرنا و الفكترا بس لو عاوز تركب عربيه صيانه بسيطه و قطع غيار رخيصه و من اصل المانى اركب لانوس اساسها و شاسيها و عفشتها اوبل استرا 95 بس الصاج كورى و المحرك متشابه و كله من جنرال موتور التكلونوجيا متشابهه بس الثبات مش زى الاوبل طبعا