محتار جدا الرجاء افيدوني

[abadahenno]

السلام عليكم

انا محتار جدا عاوز اجيب عربية (اول عربية) و لما نويت الحمد لله من فترة قريت كتير في المنتدى واستفدت جدا بصراحة قبل كده مكنتش اعرف اي حاجة :(

المهم كلمت واحد صاحبي لسه جايب عربية دايو ١ موديل٢٠٠٠ من السوق (مكان الناس بتتجمع فيه يعني وبيبيعو عربياتهم)

فنصحني انزل السوق واشوف الاسعار

قولت كويس قوي اربط النظري (المعلومات اللي استفدتها من المنتدى ) مع العملي اللي هو اشوف العربيات في السوق

فكل يوم جمع اروح فعلا واستفدت كتير بصراحة ودا اللي زود حيرتي

انا حطيت رينج للعربية من ٢٥٠٠٠ الى ٣٠٠٠٠

وبالسعر دا عرفت اني ممكن اجيب العربيات دي بحالة كويسة بس اغلى حاجات بسيطة

في الهاتشباك بما اني مهتم بالنوع دا

كيا برايد و سكودا فليشيا و اوبل كورسا والماروتي ودايو ماتيز والسبرنزا a113

فبصراحة ميال جدا للكورسا خصوصا انها من وجهة نظري افضل منهم في الشكل والحالة

بس لقيت معظم اصحابي بيقولولي ابعد عنها قطع غيارها غالية :( ومش هتلاقيها الا في التوكيل ومش اي حد بيصلحها :(

فسؤالي لأهل الخبرة هل فعلا قطع غيارها غالية بالدرجة دي !

وهل بيكون فيها مشاكل او عيوب ؟؟ وهل هي تقيلة في البيع لو نويت ابيعها بعد كده ؟

عشان في عربية معروضة عليا وعاوز اخد رأيكم فيها

اوبل كورسا 98 دواخل شركة وسقف شركة الون زيتى

وايه اكتر حاجة اخد بالي منها في المعينة ؟؟

[mif]

لو نفسك تركب اوروبي لازم يبقى زيرو .... المستعمل بيبقى مقالب حتى لو صاحبها اخوك

خليك فى الكيا برايد

[pepo2011]

لو قارنت الكورسا بالباقي اللي معاك دا طبعا هي اغلي في قطع الغيار ولكنها موجود ة وليها اللي بيشتغل فيها مش اي حد طبعا لكنها عربية جميلة غير كده خليك في البرايد وبعدها الماتيز

[mwetsh]

عربيه فوق الممتازه و جرايه و جميله جدا بس هات الموديل ال 94 اللى المواتير بتاعتها 1200 سى سة و قطع غيارها موجوده و فى حاجات من الونوس تشتغل معاها توكل على الله بس دور على حاله نظيفه

[اوبل 2]

نصيحة طالما اول عربية تشتريها خليك فى الكورى الاول قطع غيارة متوفرة ولما تعرف طريق الميكانيكية والصنايعية وزاى تتعامل معاهم وابقى اشترى الاوبل

[abadahenno]

أشكركم على ردودكم

لكن اللي هيجبهالي ميكانيكي ثقة

اقصد يعني اللي عرضها عليا ميكانيكي عارض عليا كيا برايد العصفورة ٩٧ واوبل ٩٥ والاتنين تقريبا سعر واحد

فأنا محتار جدا

[ابوسفيان]

بص يا اخي انا كنت في نفس حيرتك تقريبا فكرت في كل الانواع الي انتى ذكرتها بالضبط والحمد لله استقريت على الكورسا ان شاء الله طبعا اينعم انا لسه مشترتش لاني منتظر الجمعية والحمد لله بس هقولك ملخص الاستقرار
الكورسا: اشيك الماني قطع غيار متوسطة الاسعار بس معمره بتلت اضعاف الكوري وده احسنلك ثبات قوة صاج نعومه.
الفيلشيا:نفس مميزات الكورسا بس اوسع وخشنة شوية والعيب الشهير السخونة دعبس في الموقع وهتعرف.
البرايد: بردوا لذيذه بس كوري قطع غيار رخيصه بس مش معمرة ثبات تعبان صاج ضعيف ومش اشيك من الكورسا.
الماروتي والماتز: نفس البرايد بس الماروتي هندي من باب العلم بالشئ
الاسبرانزا: صيني بس ثابت وجوده ويجي بعد مرتبت الكوري يعني بعد البرايد والماتز والماروتي كمان.
دي المعلومات الي جمعتها من المواقع ومن اصدقائي المجربين من الاخر الكورسا وانتا ونصيبك ياريس

[abadahenno]

أشكرك يا ابو سفيان

طيب حضرتك ناوي على كورسا موديل كام ؟؟

معروض عليا ٩٥ و ٩٨ والاتنين قريبين من السعر 32000 35000

وربنا يوفقنا يارب

[ابوسفيان]

بص يا صديقي من 94 الى 97 وقولك لي اولا الموتور 1200 سي سي اربعه سلندر ومش على حسسات كتير
من اول 98 موتور 1000 سي سي 3 سلندر وعلى حسسات كتير والحسسات دي غالية
وربنا يوفقك واياي للخير يارب

[ابوسفيان]

نسيت اقولك في ناس لما الموتور ال1000 سي سي بيقرفهم بيسقطوا 1400 سي سي بس انا افضل ان يكون موتور العربيه بتعها الاصلي يبقى الـ 1200 بردوا افضل ونشوف رأي باقي الاعضاء في موضوع الموتور 1400 ده.

[abadahenno]

يعني افهم من كده يفضل موديل 94 - 97 ؟

بس قلقان من حكاية مش اي ميكانيكي بيقدر يشوفها وقلقان من قطع الغيار :(

[ابوسفيان]

زي مقولت لحضرتك قطع الغيار متوسطة السعر يعني مش غالية ولا رخيصة بس معمرة جدا يعني تركب الحاجه وتنساها ده الماني يباشا وده كلام مكنيكيا (غالي عشان نضيف) وطبعا الغالي تمنه فيه ولا هيا غالية ليه
موضوع المكانيكي ده سهل تسأل على حد نضيف في طنطا واكيد هتلاقي يعني كل الي ركبين الماني وامريكي دول يعملوا ايه سبها على الله وان شاء الله ربنا يعطرك فمكانيكي تمام ان شاء الله

[abadahenno]

معلش تعبت حضرتك معايا

كنت بدور على ميكانيكي ابن حلال عشان يبقا ييجي معايا السوق

فلقيت الحمد لله ولسه بقوله عاوز عربية لقيته بيقوللي روح السوق خود فكرة عشان عندي كذا عربية

ومن ضمنهم الكورسا ٩٥

لكن محتار برضه المفترض الميكانيكي اللي هاخده معايا ويبقا في صفي عشان يشوف العربية هو نفس الشخص اللي هيجبهالي :(

بصراحة حاجة محيرة

هل هو هيكون في صفي ولا في صف البايع

[ابوسفيان]

خلي بالك جدا من النقطه دي حاول يكون حد منك يعني مهما حصل ميبعكش لصاحب العربيه مقابل نقود هتطلعلوا سمسرة بالله عليك احذر.

[احمد فهمى]

لو اول عربيه لك خليك فى البرايد