تسريب مياه ساخنه فى الدواسة الفيكترا c

[mishmishy]

السادة أعضاء فيكترا الكرام . حصل معايا موقف غريب الصبح . ركبت سيارتى فيكترا c شميت فيها رائحة مياه فظننت ان ماء تسرب اليها من الغسيل صباحا . وحين وصلت للعمل وجدت بخار ماء يخرج من فتحات التكييف واثر ماء داخل الفتحات ووجدت دواسة الكرسى الأيمن الأمامى تحتها ماء ساخن كتير . فتحت غطاء الموتور فلم اجد اى شىء سوا نقص بسيط فى قربة الماء. رجاء من الاخوة الكرام المساعدة ممن لديه تفسير لهذا الموقف الغريب حيث ان اليوم الاحد وانا قلق من السير بها هكذا

[mishmishy]

معقول كل الناس اللى دخلت على الموضوع دى ومفيش اى حد قال اى حاجة؟

[Sherif Mandoor]

السربنتينه بتاعت الهواء الساخن اتخرمت اى ميكانيكى يلغيها ولازم تحل موكيت الارضيه علشان الميه متعملش بارومه

[mishmishy]

هى مش بتتصلح؟ ولا هتبقى صعب علشان التابلوه؟ وهل موكييت الأرضيه بيتفك عادى؟ وشكرا بجد لاهتمامك

[embabi]

هى مش بتتصلح؟ ولا هتبقى صعب علشان التابلوه؟ وهل موكييت الأرضيه بيتفك عادى؟ وشكرا بجد لاهتمامك

موكيت الارضية بيتفك عادي ويركب تانى
وفعلا لازم يتنشف كويس عشان ميعملش بارومة

لو ضرورية جدا بالنسبالك هتتغير الدفاية كلها
ومعظم الناس فى الاوبل والسي خصيصا لاغيينها

[pepo2011]

ياباشا دا السخن الراجع بتاع التكيف بتتلغي من برة عادي مش بتاثر في حاجة بالعكس
وبخصوص الموكيت ممكن تروح مغسلة وتنشف الموكيت بالهوا والبخار وتسيب العربية مفتوحة شوية في الشمس لو مش عاوز تفك الموكيت وانا رايي بلاش تفك حاجة الفبريكة

[احمد فهمى]

خرطوم السخن روح ﻷي حد بتاع تكيف يطببو من بره لحد ما تشوف التسريب الداخلي منين ولو مبتستخدمش السخن سيبو كده والموكيت كما وضحلك الاخوه الافاضل

[Mecha]

خرطومين االسخن اللي خاشين الصدر ,هتحلهم وتشحط فيها مسمارين وتربط عليهم بكوليهات .وتزود مية التبريد ,لو سبتها هتشوي المتور

[mishmishy]

هو ايه اللى هيشوى الموتور مش فاهم؟

[Mecha]

مية التبريد اللي بتنقص م الدفايه ,هتشوي وتكوي المتور

[mishmishy]

ما انا اكيد هزود المياه لحد ما ينتهى العطل. مش هسيب المياه تنقص كدة وخلاص

[embabi]

لو هتلغى الدفاية اقفل الدايرة ومتطببش الخطين الخارج والداخل للموتور
كل شوية الطبب دى هتضرب
عملتها بيجو ٤٠٦ بتاعة ابن عمى وجابت وش سلندر

قد يكون الوضع مختلف شوية لكن انا عندى فى الفكترا سي عاملها كده وقافل الدايرة

[mishmishy]

انا قفلت الدايرة بخرطوم حرف u واصل بين فتحات الخرطومين اللى كانوا داخلين صدر العربية