الاوبل الفيكترا كالابرة فى كوم قش!!!!!

[egyplan]

البحث عن سيارة اوبل موديل 99 - 1600 سى سى بحالة كويسة كانك تبحث عن ابرة فى كوم قش
- تلافى سيارات فى السوق متلمعة ومشدودة وتلاقى التابلوه ضايع والصالون فى التراوة وطبعا تلاقى كلا المواتير متلمعة وبتبرق وطبعا متعرفش ايه اللى مستخبى خلف هذه اللمعة
- عربيات متلصمة واسعار مبالغ فيها
- تجد عربية اوبل بسعر اسكودا اوكتافيا وحدث ولا حرج عن كم التزوير فى السيارات بالسوق.
--------------------------------------------------------------------------------------------

[ah-elgendy]

انت لقيت سعرها فى السوق فى رينج كام ؟

[egyplan]

السيارات اللى مع التجار وبيكونوا داهنين السيارة دهان جديد شديد وملمعينها جامد وفوانيس بتلمع
وتلاقى من الداخل يااما تكييف مش شغال والتابلوة خربان وطبعا كاسيت صينى تعبان فلة
وباكيتات مكسرة والكراسى متبهدلة فقط اهتموا بالشكل الخارجى جامد هذه النوعية منها عربيات كتير
وتخوفك انك تشتريها من التجار سعرها فى اول الكلام كده 54 او 51 الف
ال 54 اللى تكيفها بيقولوا شغال وال 51 اللى تكيفها خربان
والالوان بقى احمر واسود وابيض
بس تخاف من التجار لانهم مثلا ممكن يحطولك بطارية فسبة مكان بطارية الاوبل واهو كله شغال
--------------------------------------------------------------
والسيارت بتاعت الناس العاديين - شاب ومعاه واحد صاحبه او خوه
تلاقى السيارة متبهدلة شوية من الخارج
مرايات مكسرة - فوانيس مخرمة - اكصدامات ملوحه وتلاقى صاحب السيارة مش فاهم اقوى فى السيارة
وطبعا من الداخل مهتم بيها شويه من حيث النظافة بس برضة تلاقى بكتتات وازارا من التابلوه مكسرة
دول فئة بتتكلم فى 55 الف اول الكلام وطبعا كالعادة بيقولك التكييف محتاج فريون
واللى يقولك التكييف محتاج فريون تعرف على طول بنسبة كبيرة ان التكييف خربان او فيه مشكلة
لانه ايه اللى يخليه معاة عربية مكيفة ويتسلق فى الحر ده عشان شحنه فريون؟
-------------------------------------------------------
فيه بقى شباب فاهم فى السيارات وغاوى وشادد العربية وتحس ان فعلا العربية مظبوطة
وتحث بثقة فى كفائة السيارة ودول بقى ياعم الحاج بيتكموا فى 63 الف يابرنس
لك ان تتخيل ان الاوكتافيا موديل 98 فابريكا برة وجوه وتكييف واخر حلاوه الناس بتتكلم فى رنج من 65 الى 68 مثلا
-------------------------------------------------------
فايه اللى يخليك تدفع 63 الف فى اوبل فيكترا عربية مش مرتفعة على الارض ومتبهدلة جامد فحت
وانت ممكن تزود المبلغ شوية وتركب اوكتافيا !!!!
----------------------------------------
انا كنت متخيل بمبلغ 52 الف جنية تقدر تشترى اوبل كويسة

[haisam ali]

لا حول ولا قوه الا بالله ... هيا الدنيا غليت اوى كده ... والله العظيم انا كنت بايع عربيه اوبل فيكترا ٩٩ اقل مايقال عنها انها كانت زيرو الكلام ده من سنه كده بحوالي ٥٢ الف بس كانت عربيه مفيهاش غلطه ... والعربيات دى اما تشتريها جديده اوى اما بلاش منها خالص والعربيه اللى تشك فيها وتلاقى فيها حاجه مبهدله ابعد عنها لان ده اللى ظاهر مابالك بقى باللى مستخبى والنظيف فى ركوبه الاوبل بيهتم بيها فى كل قطعه

[egyplan]

haisam ali
الحمد لله على كل حال
لو كنت فكرت اشترى سيارة اوبل منذ عام كنت اكيد هشتري سيارتك لانك اكيد فاهم ومحافظ على السيارة
فعلا يااما العربية تكون ممتازة يااما هيطلع عينك وتكره نفسك
لان قطع غيار الاوبل حراقة جدا فلو فيه اى مرمات هتتكلف جامد
انا سمعت من الناس فى السوق ان طلمبة البنزين للفيكترا ب 3 الاف جنية وناس قلولى الاسترا 2000 افضل
فبصراحة الانسان بيصبح محتار ومش عارف يشترى سيارة كويسة ب 55 الف.

سوق السيارت تلاقى الارقام خرافية جدا ومبالغ فيه جدا:

- سيارة كورولا 2008 تقريبا ب 135 الف!!!!!!!!!!!!!!!!!!!!!!!!!!!!!!!!!
- اوبل فيكترا 99 مشدودة ومتكلفة ب 63 الف!!!!!!!!!!!!!!!!!!!!!!!!!!!!!!!!
- لانسر 2010 تقريبا ب 115 الف!!!!!!!!!!!!!!!!!!!!!
- فليشيا كومبى ب 39 الف!!!!!!!!!!!!!!!!!!!!!!
- فليشيا عادية ب 35 الف!!!!!!!!!!!!!!!
- اوكتافيا 98 ب 67 الف!!!!!!!!!!!!

تخيل الفليشيا ب 35 الف ولقيت راجل كبير عاوز يشترى سيارة لابنه وقاعدين يتحايلوا على التاجر انهم يشتروا ب 33 الف وهو مش راضى....
وحسيت انهم مش فاهمين فى السيارة فنصحتهم بعيوب السيارة امام التاجر ومخفتش وقلتله المفروض تقلهم
- العربية عالمة فوق 230 الف كيلو وهو عمال يقولهم العربية كانت مركونه فى شركة
- وعمال يقلهم العربية مكيفه وانا طبعا عارف ان تكييف الفليشيا بيسخن الموتور ففهمتهم
- والقربة كانت مشققه وقلتلهم خلوا باكم انتوا مش فاهمين لازم تجيبوا ميكانيكى والعربية الفليشيا تمنها 30 الف فقط لما تكون ممتازة

بصراحة انا اتصدمت من السوق وكنت متخيل انى هلاقى سيارة كويسة

[medoshalan]

طب دلوقتى يا باشا انا معايا فيكترا موديل 2000 هى مانيول 1600 سى سى هى مرشتش بره غير الرفرفين اللى ورا بس هى طبعا فيها شويه تجاريح خفيفه وكل حاجه تانيه تمام التكييف تلاجه ومن جوه مفيهاش غلطه وفيها زينون فوجات والعالى كمان وجايبلها طقم ساوند ومعايا الكاسيت لاصلى محتفظ بيه فى البيت طقم كاوتش جديد من شهر وطنابير اماميه زيرو من شهر ومغير تيل امامى وخلفى وماستر من شهر وكل حاجه شغله سنتر ووحدات رفع وازاز كهربا 4 باب العربيه وطاره مالتى وايرباجات والطبلوه كله سليم كلها تمام وعايز انزل بيها السوق اطلب فيها كام عشان عايز اجيب حاجه موديل السنه ومش عارف متوسط الاسعار عامل ايه يا ريت تفيدنى عشان عايز انزل بيها اليومين الجايين وهل اخد حد معايا ولا ايه لان مليش فى البيع والشراء اوى دى تانى عربيه ليا واول عربيه اديتها لاخويا ومش بعتها

[ashourashour]

انسى العربيه دي متفكرش فالموضوع ده تاني مش هتلاقي كله كنب والنضيف صاحبه مش هيبيع و مش هتشوفها معروضه

[egyplan]

طب دلوقتى يا باشا انا معايا فيكترا موديل 2000 هى مانيول 1600 سى سى هى مرشتش بره غير الرفرفين اللى ورا بس هى طبعا فيها شويه تجاريح خفيفه وكل حاجه تانيه تمام التكييف تلاجه ومن جوه مفيهاش غلطه وفيها زينون فوجات والعالى كمان وجايبلها طقم ساوند ومعايا الكاسيت لاصلى محتفظ بيه فى البيت طقم كاوتش جديد من شهر وطنابير اماميه زيرو من شهر ومغير تيل امامى وخلفى وماستر من شهر وكل حاجه شغله سنتر ووحدات رفع وازاز كهربا 4 باب العربيه وطاره مالتى وايرباجات والطبلوه كله سليم كلها تمام وعايز انزل بيها السوق اطلب فيها كام عشان عايز اجيب حاجه موديل السنه ومش عارف متوسط الاسعار عامل ايه يا ريت تفيدنى عشان عايز انزل بيها اليومين الجايين وهل اخد حد معايا ولا ايه لان مليش فى البيع والشراء اوى دى تانى عربيه ليا واول عربيه اديتها لاخويا ومش بعتها

شوف يا استاذ يافاضل:
لو عاوز تنزل السوق هتقابل طريقتين:
1- هيقابلك وانت داخل السوق اكتر من تاجر هيحاول يشترى منك العربية بالغتاتة والالحاح وهيعرض عليك سعر تعبان جدا وهتلاقى اكتر من واحد يدخل فى الحوار ويقعد يفطسلك العربية

2- هتدخل السوق وتقف فيه وهتضرر تسال عن سعر العربية اليوم من واقع الناس اللى واقفة زيك فى السوق يعنى هتلف على كل واحد وتسالة العربية بكام هتلاقى مثلا اللى يقولك 55 الف وبكده هتقول نفس رقمه لو عربيتك قريبة من حالة عربيته

وفى الاخر هتلاقى بعد ساعة او اتنين كل عربيات الاوبل نفس الماركة بنفس السعر واللى هو فى الاساس مبالغ فيه بحوالى 5 الاف جنية لان كله بيعمل حساب الفصال
وانت بقى وحظك ممكن يجيلك زبون او ميجيش وتروح اخر اليوم وتحاول مرة اخرى وهكذا

السوق من الاخر اما هتلاقى اسعار عالية جدا (تجار تبيع) او تلاقى اسعار منخفضة جدا ( تجار بتشترى)

الطريقة التانية انك تحط اعلان فى المواقع وبرضة هتلاقى الاسعار عاليه حته عشان موضوع الفصال ده

من واقع الخبرة ان السعر بيتحدد من طريق ناس باعت وناس اشترت خارج السوق بعيدا عن المبالغة فى السعر او تفطيس السعر
ولو عاوز تعرف السعر الصح اعرض السيارة على تاجر يسعرها ( هيفطسها ) وفى نفس اليوم تسال تاجر ايضا معاه نفس موديل وحاله السيارة بيبيعها ( هيرفع تمنها)
وانت بقى تلاقى الرقم متوسط الرقمين

مثال :

هتروح تسعر السيارة على تاجر هيشتريها هيقولك مثلا السياره دى ب 45 الف
وتروح تشوف تاجر بيبيع نفس السيارة فى نفس الحالة هتلاقية بيبعها مثلا ب 53 الف
يبقى المتوسط السعر الحقيقى حول ال 48 الف

انا طبعا بقولك من واقع وجهه نظرى وما رايته فى السوق


انت بقى مش شرط تاخد معاك حد ... ممكن فقط تاخد معاك واحد صاحبك عشان يسليك وتقعد تحكى معاه لانك ممكن تقعد اليوم كله فى السوق
بس خلى بالك :
1- لازم تفضى العربية من اى محتويات ثمينه يسهل سرقتها
يعنى اى فلوس اى معدات ترويش خفيفة اى اطقم عده للتصليح الطفاية الكوريك مفتاح العجل
لانك ممكن تتقلب وتتسرق من غير ماتاخد بالك
حتى الولاعة بتاعت العربية ممكن تتسرق
لانك فى لحظة ممكن تلاقى اتنين بتفرجوا على العربية مع بعضهم واحد تلاقيه بيبص على الصالون والتانى بيبص على الشنطة
فلازم تكون العربيه فاضية من اى اكسسوارات

2- ورق السيارة يكون فى جيبك

اعرف متوسط السعر ولو عاوز تبيع ممكن نتكلم فى التفاصيل لانى مش تاجر انا عاوز اشترى سيارة

[shady.punto]

على فكرة النقاش محترم جدا وعقلانى جدا خصوصا كلام العضو المحترم egy plan واضح من كلامة انه فاهم ولافف فى السوق كتير
وكنت حابب اشارك وعندى استفسار
انا عربيتى استرا موديل 2000 ماشية 100الف ك رشة بره ودواخل العربية جديدة تماما يعنى عربية حاله تحفه
لو حبيت ابيع تعمل كام فلوس
مستنى رد كم

[amr elsisi]

اختلف معاك
مثلا انا عربيتي فيكترا بي جايبها 45
صارف عاليها فوق ال 35
انت متخيل لما اجي ابيعها
حبيعها مثلا ب50
ولاحتقارنها بباقي الي في السوق

[egyplan]

للاسف يا استاذ عمر
فيه حاجة اسمها سياسة سوق فموضوع ان حد يقول انه صارف على العربية رقم بكذا لا يغلى سعر السيارة الا اذا كانت هذه الاشياء كماليات ويقيمها المشترى الذى يقدر هذه الكامليات
مثلا لو شخص مركب دى فى دى بشاشات وبلوتوث كيت وكار باركينج سنسور (هذه كماليات لها قيمة ماليه ولا توجد فى اساسيات كماليات السيارة) فمثلا لو السيارة سعرها 50 الف وهذه الكماليات تقدر ب 5 الاف يصبح الاجمالى 55 الف

اما اذا كانت المرصوفات عبارة عن صيانات وعمرات فهذه لا تحتسب فى السعر الخاص بتقييم السيارة وذلك لنك لو اضفت سعر صياناتن خمس سنين ركوب كمثال وكانت القيمى 30 الف على سيارة قيمتها 50 الف فان الاجمالى سيصبح 80 الف جنية لسيارة موديل 99!!!!!!!!!!!!
وهذا السعر اكيد يشترى اوكتافيا موديلات 2003 الى 2006 بحالة كويسة

اما فى حالة ان اصر البائع على هذه الارقام فستجد السيارة لا تجد لها زبون

مثال / فى احد المواقع الالكترونية الخاصة ببيع السيارات احد الاشخاص مسعر سيارة فيكترا 99 ب 63 الف
اتصلت به وسالتك فعلمت انه شادد العربية عفشة وموتور وكاوتش جديد وبطارية جديدة و........

فى حين ان هذه السيارة مثلا سعرها فى حدود 55 الف

عندما كنت اتجول فى السوق رايت هذه السيارة وبنفس السعر (عرفت انها نفس السيارة من الصورة لان شكلها مميز وكانت متصورة بنفس الشماسة)
ولا تجد من يشترى السيارة فقط الناس تسال عن السعر ولا تشترى

اما من يريد ترويش وتدليع السيارة فهو اكيد شخص لن يبيع السيارة لفترة من الزمن كى يستمتع بكم المبالغ الخاصة بالكماليات

[azkalany]

طب دلوقتى يا باشا انا معايا فيكترا موديل 2000 هى مانيول 1600 سى سى هى مرشتش بره غير الرفرفين اللى ورا بس هى طبعا فيها شويه تجاريح خفيفه وكل حاجه تانيه تمام التكييف تلاجه ومن جوه مفيهاش غلطه وفيها زينون فوجات والعالى كمان وجايبلها طقم ساوند ومعايا الكاسيت لاصلى محتفظ بيه فى البيت طقم كاوتش جديد من شهر وطنابير اماميه زيرو من شهر ومغير تيل امامى وخلفى وماستر من شهر وكل حاجه شغله سنتر ووحدات رفع وازاز كهربا 4 باب العربيه وطاره مالتى وايرباجات والطبلوه كله سليم كلها تمام وعايز انزل بيها السوق اطلب فيها كام عشان عايز اجيب حاجه موديل السنه ومش عارف متوسط الاسعار عامل ايه يا ريت تفيدنى عشان عايز انزل بيها اليومين الجايين وهل اخد حد معايا ولا ايه لان مليش فى البيع والشراء اوى دى تانى عربيه ليا واول عربيه اديتها لاخويا ومش بعتها

ربنا يباركلك فيها
شوف طالب فيها كام وقول عشان انا بدور علي فيكترا لو في نصيب اشتري

[Super_Star_h]

والله يا باشا اصبر ومتستعجلش
انا كنت بدور زيك على عربيه وربنا كرمنى بالاوبل
عربيه حالتها كويسه ومش مزعلانى فى حاجه

[egyplan]

نفسى اشترى سيارة اوبل فيكترا شامبين نظيفة 1600 يا جدعان
طب انا ممكن اعطى حد فيكم 1000 جنية عمولة نظير تعبة لو يجيب عربية كويسة