تجربتي مع كسر عمود الكامة .... للفائدة

[hobasalim]

السلام عليكم ورحمة الله وبركاته

عربيتي اوبل فيكترا ايه 94 موتور 2000 سي سي اوتوماتيك .....
بداية الموضوع كان من اربع شهور كنت مسافر على طريق الجيش وفجأه شميت ريحة شياط وصوت حكة حديد ركنت بطلت على طول وجيت ادور تاني الموتور يعتل ... المهم عشان مطولش طلع عمود الكامة قافش في الهيد المهم سحبت العربية والميكانيكي قاللي انه لازم يركب هيد تاني عشان يعرف السبب حاولت أخليه يفك الموتور ضحك بسخرية وقال هلتكلف نفسك على الفاضي احنا نركب الهيد وبعدين ندور العربية ونشوف ايه السبب وبالفعل تم التركيب (هيد بعمود الكامة استيراد السعر 500 جنيه) ودارت العربيه وجربها وقاللي الدنيا تمام ومفيش حاجة في العربية .... المهم اخدت العربيه ومشيت وانا قلقان وقررت اني مش هسافر بيها ومشيت العربيه تمام بس صوتها مش مريحني...
ومن اسبوع كنت رايح الشغل الصبح وماشي بالراحة وفجأه سمعت صوت (زي صوت الفيوذ الأصلي الكبير لما يضرب) وكان سريع حاولت اركز في الصوت منين لقيت العربية بطلت وانا ماشي ... وركنت وكنت حاسس انها نفس الركنة اللي فاتت مش عارف ليه بس فتحت الكبوت ملاحظتش حاجة المهم جيت ادور لقيت نفس التعتيلة بتاعة المرة اللي فاتت رحت راكن ورايح الشغل وسبت العربية في الشارع اللي وقفت فيه يومين بحاول اجيب الميكانيكي يبص عليها بس قاللي انه مشغول ومش هينفع يروح وهاتلي العربية قررت اني مش هاروحله ....
من كرم ربنا عليا وترتيبه العظيم اني كنت رايح لواحد صاحبي لقيت على اول الشارع بتاعه ورشه واقف قدامها 3 عربيات اوبل سألت الناس اللي بره في الشارع هو فيه حد بتاع اوبل قالولي ايوة رمضان اوبل وقد كان رحت الورشة وسألت عليه قالولي هو في القاهرة بيجيب طلبات لعربيه وجاي بكرة خد تليفونه وقوله على المشكلة وممكن يحلهالك في التليفون ... بالفعل كلمته وحكيتله القصه من الأول زي ما حكيتها لحضراتكم قاللي يا باشا انت عندك طرمبة زيت ضعيفة وكان لازم اللي غير الهيد يغير الطرمبة معاها أو على الأقل يطلعها يبص عليها قولتله ده السبب الوحيد قاللي لأ ده بالنسبة لحالتك لكن ممكن وش السلندر نفسه يكون معووج او مش مظبوط ويعمل كده برضه بس انا بقولك انت عايز هيد وطرمبة اقتنعت بصراحة ورحت يوميها بالليل سحبت العربية على الورشة وسبتهاله واتفقت معاه انه يجيب الحاجة قاللي الحاجة موجودة في الورشة وعلى ضمانتي المهم اختصارا لوقت حضارتكم تاني يوم تم فك نص الموتور (هيد الكامة ووش السلندر عشان يطمن عليه وفك كرتيرة الزيت وطرمبة الزيت) وطلعت الكامة مكسورة من النص وطرمبة الزيت محروقه من جوة وتم تركيب هيد استيراد حالته كويسة جدا وطرمبة زيت استيراد حالة الزيرو وتغيير الجوانات كلها طبعا وعجبني فيه ان كل حاجة طلعت خدها نضفها بقت زيرو وتقفيله كويس جدأ وعنده ضمير وعن شرط شغال لوحده بدون مساعدة ولا حتى صبي يناوله واليوم اللي بعده استلمت العربيه وقاللي انا مش هاركب المصفحة وعايزك تجرب العربية يومين تعمل فيها كل شيء تجري وتطلع مطالع وتفرمها وتجيلي عشان اطمن على الشغل تاني واركبلك المصفحة ولو عايزة ظبط ولا حاجة ... المهم اني مشيت وانا مستريح المرة دي لأني عرفت سبب كسر العمود وبرضه اطمنت على باقي الموتور ..

آسف للتطويل لكن حبيت انقل تجربتي لحضراتكم للفايدة وعشان الفايدة تكتمل نكتب اسعار قطع الغيار...
- هيد بعمود الكامة استيراد (400)
- طرمبة زيت استيراد (400)
- طقم بلوف او كوستبان 8 بالشواكيش استيراد (300)
- 2 جوان وش سلندر جديد (160)
- اويل سيل اسبراتير جديد (70)
- جوان كرتيرة زيت جديد (70)
- جوان الفرن (30)
- أنبوبة سليكون عضم (35)
- فلتر زيت (25)ملحوظة: نصحني اني مركبش فلتر الدايو gm وان الفيكترا ليها فلتر أكبر منه وهو ده الأفضل
- مصنعية (300)

أرجو اني ما كونش طولت عليكم بس انا استفدت كتير من المنتدى ولازم افيد غيري ... تحياتي للجميع

[ahmed.biso13]

جزاك الله كل خير

[waelfarid]

شكرا لنقل التجربة والحمد لله علي سلامتك وسلامة عربيتك والله يجازيه كل خير الميكانيكي المحترم الامين اللي ربنا رزقك بيه بعد الاولاني ماركة مشي حالك

[دعبدالرحيم]

الحمد لله انها جات سليمه ..والسؤال هي العربيه سخنت منك ولا لمبة الزيت نورت ?

[hobasalim]

الحمد لله انها جات سليمه ..والسؤال هي العربيه سخنت منك ولا لمبة الزيت نورت ?

خالص يا باشا ... الموضوع بيحصل فجأة فعلاً ... الحرار مظبوطة وخصوصاً إني ظابط دورة التبريد والعربية مش بتسخن ... ولمبة الزيت مش بتنور لأن الطرمبة شغالة بس مش بترفع الزيت لغاية الكامة ... والحمد لله على كل شيء

[smsmsmsm1983]

شكرا لنقل التجربة
ربنا يكتبه فى ميزان حسناتك

[miam0502788391]

شكرا على نقل التجربة

[Salamas]

ربنا يباركلك فيها والحمد لله أنها خلصت على خير

الميكانيكى عنوانه ايه يا باشا :d

[hobasalim]

ربنا يباركلك فيها والحمد لله أنها خلصت على خير

الميكانيكى عنوانه ايه يا باشا :d

متشكر لحضرتك على التعليق ....
وبالنسبة للميكانيكي هو من القاهرة بس فاتح ورشة في المنيا في الشارع الجديد ... بس انا ملاحظ ان حضرتك من القاهرة ... عموما هو بيروح القاهرة اسبوعيا عشان بيجيب طلبات لعربيات عنده في الورشة وبيقعد يومين ثلاثة هناك .. خد حضرتك رقم تليفونه وهو جدع تسأله على أي حاجة وهيفيدك

الاسطى : رمضان
تليفون : 01111348816

[m7nsh]

مبرووووووك يا باشا و حمدلله على سلامتها.. و تسلم لنقل التجربة

[mbx4e]

شكرا لنقل التجربة وحاليا حالة الموتور في السحب والصوت والنعومه ايه ؟ ومكان الاسطى رمضان في القاهرة فين؟

[hobasalim]

شكرا لنقل التجربة وحاليا حالة الموتور في السحب والصوت والنعومه ايه ؟ ومكان الاسطى رمضان في القاهرة فين؟

آسف للتأخير في الرد ... بالنسبة لصوت الموتور رجع لحالته الأولى صوته هادي وناعم والسحب الحمد لله تمام ، وبالنسبة للميكانيكي أنا مش عارف مكانه في القاهرة هو عمل العربية في المنيا بس خد حضرتك رقم التليفون وظبط معاه هو على طول في القاهرة

الاسطى : رمضان
تليفون : 01111348816

[mbx4e]

شكرا لامانتك في نقل التجربة واستجابتك وسرعة الرد

[Vectra 99]

بسم الله الرحمن الرحيم
الاخ الكريم hobaSalim أشكرك جدا لهذا الموضوع انا لسه العمود انكسر عندي واشتريت عمود كامة من الحرفيين القاهرة وماكانش نفس النوع واحتاجت اخرط جزء عشان يركب والعربية ما دارتش وفعلا من المواضيع في المنتدى ممكن يكون وش سلندر او طرمبة زيت ... او حتى فلتر زيت .. وعلى فكرة قبل ما العمود ينكسر عندي من النص ان كنت مغير زيت وفلتر من اسبوعين وحطيت نوع جديد اماراتي 5000 كلم كالتكس 20 دبليو والراجل باقول له ده تقيل قال لي ده احسن لموتور الاوبل عشان الزيت عندك غامق وده معناه ان الزيت خفيف الموتور بتاعك محتاج زيت اتقل ؟ والله اعلم السبب ايه لكن انا لما العربية بطلت مني طفت مرة واحدة من غير اي طرقعة او صوت كنت ماشي عالغيار التاني والشارع زحمة ولقيت الموتور فصل فجأة وما رضاش يقوم وبعد الفحص لقينا عمود الكامه ( الحديد الزهر ) مكسور من نصه بالظبط ؟؟ ولسه بقى لما نشوف ..