طلب مساعدة من مالكى الكورسا

[Chucky]

انا معايا سيات ابيزا موديل 94 و قررت انى اغيرها و اجيب بدلها اوبل كورسا هاتشباك (93 - 2000 ) بس بصراحة انا معرفش حد من اصحابى معاه اوبل كورسا... انا قراءت المواضيع اللى عنها هنا فى المنتدى و عرفت معلومات كتيرة جدا عنها و من المواضيع عجبتنى العربية اوى

بس نفسى اتفرج عليها و اجرب اسوقها قبل ما اشتريها... لو حد معاه العربية دى و ينفع يخلينى اتفرج على عربيته يبقى بجد خدمة عمرى ما هنسهاله

انا معرفش بصراحة ده طلب طبيعى ولا غريب...

[Ahmad Allawy]

يا اهلا بيك يا باشا..
هو طلب عادي طبعا مش غريب..
ايه الغريب في كده..
انا معايا العربية .. و لو حبيت في اي وقت نربط كده و تجربها..
بس في حاجة مهمة جدا لازم تكون في بالك ..
ان العربيتين قريبين قوي من بعض.. يعني مش مستاهلة ..
يعني هتبقي نقلة ضعيفة قوي..
عموما.. جرب الاول.. و شوف هترتاح معاها ولا لأ..
انا كل يوم بعد الشغل فاضي من الساعه 8 بالليل.. و ساكن ف المقطم..
و ممكن نظبط و نخليها ف الويك اند..

[Chucky]

يا احمد باشا ربنا يخليك على ذوقك ده
شوف انت المعاد المناسب ليك و اللى تكون فاضى فيه و انا ان شاء الله اقابلك فيه... انا اى معاد من بعد الساعة 6 هيكون مناسب ليا ان شاء الله

ده كفايا ذوق حضرتك و انى هتشرف و اتعرف على موسوعة الاوبل كورسا فى نايل موتورز

و بالنسبة ليا انا ميفرقش معايا موضوع النقلة ده اوى... لانى انا اصلا طول عمرى بحب الموديل ده من الكورسا و كان نفسى اجيبه و اخيرا اخدت القرار بأنى اشتريها بدل الابيزا

[Ahmad Allawy]

ربنا يكرمك يا باشا..
علي ايه بس.. ده اقل واجب والله..
انا النهاردة مش هاقدر و بكرة عندي مشوار..
و ممكن بقي يوم التلات او الخميس او الويك اند..
شوف اللي يناسبك.. امتي و فين.. او انت ساكن فين عشان نشوف مكان محايد نتقابل فيه..
وبعدين موسوعه ده مش حقيقي خالص علي فكرة..
دي مبالغات جامدة..
ده انا سمعت اسم سنسور من كام يوم.. اول مرة كنت اسمع عنه.. مع انه قدام عيني ف الكبوت بقاله سنة..
انا معلوماتي اللي عارفها ف الحاجات اللي غيرتها.. او عملتها ف عربيتي.. غير كده مش موسوعه خالص..
عموما.. مستني رد سعاتك.. و نظبط ان شاء الله..

[Chucky]

خلاص تمام... انا يناسبنى يوم الخميس او الجمعة

شوف حضرتك انهى الانسب ليك و اللى تكون فاضى فيه و انا تحت امرك... و انا بالنسبالى عادى لو تحب انا ممكن اجيلك المقطم اصل بصراحة مينفعش بعد اللى حضرتك بتحاول تعمله ده اتعب حضرتك كمان و امشورك

[Ahmad Allawy]

يا سيدي الفاضل.. انا مش كبير قوي يعني عشان حضرتك و سعاتك و الكلام الكبير ده..
انا غالبا اصغر منك ف السن اصلا.. :) :)
قولي بس انت ساكن فين او كده عشان لو انا نازل مكان قريب منك نتقابل.. و العملية في بيتها يعني.. مفيش مشاكل..

[Chucky]

انا ساكن فى حدائق حلوان

و معلش لو امكن نخلى معادنا يوم الخميس لان يوم الجمعة طلع عندى ظروف و مش هعرف اخرج خالص طول اليوم

لو مفهاش تعب لحضرتك يبقى كتر الف خيرك

[Ahmad Allawy]

شغال..
نظبط و نبقي نتقابل في المعادي و تجرب و تشوف و تعمل كل اللي انت عايزه ان شاء الله..

[Atef Saleh]

و الله روح جميله جدا يا سيد علاوى و على فكره انا كنت جارك فى المقطم لحد سنتين فاتوا اييييييييييييه فكرتنى بالمقطم و جماله .

[aismail]

السلام عليكم
فيه استفسار صغير
انا شايف ان موضوع الكورسا من 98 الي 2000 فيه تناقض شوية
فمثلا المقارنة اللي اتعملت بين المحرك 1000 اللي في الموديلات من 97 الي 2000 وال 1200 اللي في الموديلات من 95 الي 97 جاية في صالح ال 1000 علي اساس انه اقوي وموفر في البنزين وبيشد افضل ومن ناحية تانية الناس بتقول ابعد عنه علشان صيانته غالية مع العلم انه حاليا كل العربيت فل انجيكشن زي المحرك 1000 يعني معني كده ما نشتريش جديد كمان عشان صيانته غالية انا شايف اصلا ان المحرك الالف محرك سابق عصره علي اساس انه قوي وموفر
فارجو من السادة الافاضل توضيح التناقض ده

[A.Elsheikh.01]

ابو علاوي يا حوبي
عايز لفه :)

[Ahmad Allawy]

و الله روح جميله جدا يا سيد علاوى و على فكره انا كنت جارك فى المقطم لحد سنتين فاتوا اييييييييييييه فكرتنى بالمقطم و جماله .

ربنا يخليك يا باشا..

والله المقطم دلوقتي حاله لا يسر عدو ولا حبيب..
بدأ يتزحم شوية. و المأساة الكبيرة بقي ف الغاز الطبيعي اللي دخل مناطق كتير ف المقطم.. و هتقولي دي ميزة.. ولكن العيب.. تقريبا المناطق دي مفيش فيها 2 متر علي بعض سليمة ممكن تمشي فيها بعربية طبيعية.. محتاج 4*4 اقل واجب..

[Ahmad Allawy]

ابو علاوي يا حوبي
عايز لفه :)

يا باشا انت تأمر..
عربيتك يا معلمي..
هنتقابل الخميس ان شاء الله.. لو حبيت تيجي تنورنا..

[Ahmad Allawy]

السلام عليكم
فيه استفسار صغير
انا شايف ان موضوع الكورسا من 98 الي 2000 فيه تناقض شوية
فمثلا المقارنة اللي اتعملت بين المحرك 1000 اللي في الموديلات من 97 الي 2000 وال 1200 اللي في الموديلات من 95 الي 97 جاية في صالح ال 1000 علي اساس انه اقوي وموفر في البنزين وبيشد افضل ومن ناحية تانية الناس بتقول ابعد عنه علشان صيانته غالية مع العلم انه حاليا كل العربيت فل انجيكشن زي المحرك 1000 يعني معني كده ما نشتريش جديد كمان عشان صيانته غالية انا شايف اصلا ان المحرك الالف محرك سابق عصره علي اساس انه قوي وموفر
فارجو من السادة الافاضل توضيح التناقض ده

المشكلة اللي فيه ان الحساسات اللي فيه.. لما بيحصل فيها مشاكل بتبقي مقرفة شوية.. و تمنها غالي شوية.. و ممكن تتعبك شوية لحد ما تجيبها نوع نضيف.. و متكونش مضروبة..

[Atef Saleh]

ماتخلوا المقابله فى الفسطاط عندى و المدينه رايقه وفاضيه تجربوا براحتكم و بالمره نتعرف و اتشرف بمقابلتكم .....