جنطت وربنا يستر

[m_hamdy1976]

اخواني عصابة الاوبل
عايز اخد رأيكم في حاجه عملتها وربنا يستر
نزلت عشان اجنط العربيه و وانا نازل كنت واخد قرار انه استحاله صيني
المهم نزلت ونقين جنط تايواني كويس وقبل مالراجل يركب لقيت جنوط بتلمع كده سألت الراجل قالي دي نيكل كروم صيني
طب وحلوه دي يا عم ؟
قالي ده مافيش احلي من كده (طبعا انا ساذج بالفطره في الحوار ده )
طب بكام ؟ بعد فصال وهات وخد اتفقنا علي 1250
المهم خليت الراجل يركبهم وانا منشكح جدا (يمكن اكتر من اسماعيل ياسين في فيلم العتبه الخضرا لما اشترى التورماي )

وانا بركن الجنط اتخدش (كالعاده ) لقيت قلبه من جوه اسود (مش حقد والا حاجه لاسمح الله لكن لونه كان اسود) انا استغربت جدا 00 البياع مصمم انه نيكل كروم وانا شفته من جوه قلبه اسود لما اتخدش

برجاء افادتي اولا اذا كنت خدت مقلب والا لا ؟ و ثانيا الجنوط دي ايه نظامها كويسه والا لا ؟

وشكرا

[Ahmad Allawy]

والله يا باشا انا مش هافتي ف الموضوع ده.. اذا كانت كويسة ولا لأ..
بس هي النيكل كروم مش بتبقي السبيكة كلها كده..
لأ خالص.. بتابقي سبيكة تانية و مطلية بالنيكل كروم..
بس المشكلة هنا في حاجة..
انه واضح كده انه طبقة الطلاء دي ضعيفة.. بدليل انها اتخدشت بسهولة و بان اللون الاسود اللي تحتها...!!!!
مش هو اللي خدش وهو بيركب؟ كنت ترجعها وقتي.. و تقوله مش شاري..
يا اما تحتار نوع تاني..
عموما.. هيبان مع الوقت اذا كانت كويسة ولا لأ.. و ربنا يباركلك فيهم و يبقوا تمام ان شاء الله..
بس قولي هما مقاسهم ايه؟.؟؟ ز كقاس الكاوتش اللي راكب عليهم ايه و نوعه ايه..؟؟

خلي بالك قوي بقي من المطبات.. و النقر و الحاجات دي.. عشان بتبوظ الكاوتش و الجنوط كمان..

[Fadi Ezzat]

بس هو لو صينى يبقى هتاخد مقلب جامد اوى لو انت جايب مقاس فوق ال 15
لان هتلاقية بيتعوج وكدة وكل شوية عايز يتعدل والكلام دة انما لو اصغر من كدة بيبقى ماسك نفسة شوية

[m_hamdy1976]

اولا مش عارف اشكركم ازاي علي سرعة الرد

بصوا يا جماعه انا عربيتي زي عربيتك يا علاوي بس انا موديل 95 (عربيتي اكبر من عربيتك بسنتين :))
الجنط 13 نفس المقاس اللي كان راكب ياتري ده كويس والا ايه ؟ طمنوني
الكاوتش انا كنت لسه مغير فردتين وكانوا كومهو وجبت الاتنين التانين وانا بجنط جبتهم هانكوك

بص يا احمد هو انا خيشت في الرصيف وانا بركن مش من الراجل اللي ركب انا كنت بحضن علي الرصيف فكان فيه كوم زباله كده دوست عليه وانا بنزلك خيشت وبدل مااحضن علي الرصيف الجنط خده بالحضن

بس انا عايز اتاكد انه الجنط من جوه مش مفروض يكون لون المعدن بيلمع زي بره ؟

مستني ردودكم يا اصدقائي الاوبلاويه

[Ahmad Allawy]

تحت امرك محمد بك..
احنا تلاميذك..
متقلقش مقاس 13 زي ما اخونا فادي قال هيبقي يتحمل كويس متقلقش ان شاء الله..
كان ممكن تجيب 14 بس كان لازم تغير كاوتش..
و طالما علي القاسات الاصلية بتاعتها.. عادي مفيش قلق من الكاوتش.. بس خلي بالك برضه من النقر و الحفر الجامدة اللي بتبقي مفاجأة علي الطريق دي.. عشان الحاجات دي اللي كانت بتعوج الجنط الحديد.. ممكن تكسر الجنط ده.. او تعوجه بس عوجه رخمة متاخدش بالك منها.. انها تخليه مش مستدير كويس.. تخليه شبه بيضاوي يعني..

الجنط متقلقش منه انه يبقي من جوة لونه اسود.. ده العادي.. السبيكة مش كلها جوة بيكل كروم.. دي بتبقي طبقة خارجية بس..

و ربنا يباركلك فيه.. و يفضل تمام و زي الفل..

[m_hamdy1976]

ياباشا تلاميذ ايه بس دانا من يوم ماجبت العربيه دي وانا بتعلم منكم

علي فكره الراجل اللي جبت منه برضه اتفقت معاه ان لو حد من نايل موتورز راحله يبعيلوا بالسعر اللي انا خدت فيه بعد فصال ييجي ساعه 00 ماهو طالما ماعنديش خبره افيدكم بيها لازم اعمل اي خاجه نرد بيها الجمايل الكتير دي
انا خدت منه جوز الكاوتش الهانكوك مقاس 13 ب450 الكوري

الراجل ده نمرته 0108403614 واسمه محمود والمحل في اول احمد سعيد لازق في البنزينه علي طول اسم المحل مؤسسة العمرين

[Ahmad Allawy]

ياباشا تلاميذ ايه بس دانا من يوم ماجبت العربيه دي وانا بتعلم منكم

علي فكره الراجل اللي جبت منه برضه اتفقت معاه ان لو حد من نايل موتورز راحله يبعيلوا بالسعر اللي انا خدت فيه بعد فصال ييجي ساعه 00 ماهو طالما ماعنديش خبره افيدكم بيها لازم اعمل اي خاجه نرد بيها الجمايل الكتير دي
انا خدت منه جوز الكاوتش الهانكوك مقاس 13 ب450 الكوري

الراجل ده نمرته 0108403614 واسمه محمود والمحل في اول احمد سعيد لازق في البنزينه علي طول اسم المحل مؤسسة العمرين

ربنا يكرمك يا باشا..
هو انا بس عندي اقتراح..
ممكن لو حبيت نكلم حد من الادارة بحيث يكون معاك لو اتفقت مع حد علي عرض و كده.. عشان بيعملوا اتفاق مكتوب.. و يبقي العرض لمدة معينه.. وكده..
ممكن تبعت لكريم منير او شاركي تقولهم.. و ربنا ييسر الحال ان شاء الله..