اوبل كورسا 2005 1600 سىسى

[amrzakii]

افيدونى بالراى يا اخوانى اريد شراء سياره اوبل كورسا 2005 ماشيه 800000 كم 1600 سىسى كامله مانيول ايه رائيكم فى السياره و هل بها مشاكل وكم ادفع فيها و شكرا

[Ahmad Allawy]

السلام عليكم..
هل هي ماشية 80 الف ولا 800 الف؟
عشان انا شاكك ان في صفر زيادة..

العربية دي المشكلة الوحيدة اللي مشهورة فيها اسطوانة و ديسك.. بيتغيروا كتير.. و ده شائع بس في ناس مش بيحصل معاها كده.. (زي ما تقول حظوظ..)
و تمنهم حوالي 1500 جنية بالتركيب و ممكن تلاقي انك محتاج تغيرهم كل 50-60 الف كم.. يعني مع السيرفيس بتاع الكاتينة و كده.. و ممكن متغيرهمش خالص.. انت و نصيبك
غير كده العربية كويسة جدا..
و السعر الحالي ليها ف السوق في حدود 50 الف جنيه.. و الاسعار اللي اعلي من كده مش منطقية حاليا.. و طبعا حسب الحالة ممكن تزيد شوية بسيطة عن ال50.. يعني 52 مثلا ولا حاجة..

[amrzakii]

شكرا جزيلا هى ماشيه 80000 و رشه حزامين

لا إله إلا انت سبحانك إنى كنت من الظالمين

[Ahmad Allawy]

شكرا جزيلا هى ماشيه 80000 و رشه حزامين

لا إله إلا انت سبحانك إنى كنت من الظالمين

الشكر لله يا فندم.. انا تحت امرك..
و ابقي طمنا عملت ايه.. و اقتنعت بيها ولا لأ..
اهم حاجة انك تجرب العربية.. عشان لو مارتحتش لينا نفسيا.. مش هتبقي مبسوط منها..

[Osama_soliman]

الاخ الفاضل /amrzakii


السلام عليكم ورحمة الله وبركاته

انا معايا نفس العربية من 8 شهور
وكلام مهندس احمد مضبوط لان هى ده المشكلة الوحيدة اللى قبلنى خلال هذه الفترة ولسه الكلام ده من يومين فقط (يعنى سوف اغير الاسطوانة والديسك فيها)

وللاطمئنان ممكن تكشف عليها فى اوتو ماستر اللى فى الحى السادس - مدنية نصر
انا كشفت على عربيى بمبلغ 200 جنيه وطلعوا كل الحاجات اللى فيها واخدتها وانا مطئمن

بالتوفيق إن شاء الله تعالى

مع تحياتى

اسامه سليمان

[bahaahssn]

معلش يا باشا تقصد اسطوانة و ديسك دبرياج

معلش يا باشا تقصد اسطوانة و ديسك دبرياج و لا ديسك فرامل
اسطوانة و ديسك دبرياج الأصلى تمنهم 850 و فى 750 المانى و انا مغيرهم عند 80000
انا شايف مشكلة العربية الحقيقية هى طول عمر تيل الفرامل قصير بالنسبة لعربيات كتير بس ده يعنى مثلان التيل الأصلى مصرى جنرال موتورز مبيعملش صوت و تمنه 135ج بيعد من 20 ل 25 الف كم و حسب الأستعمال و فى انواع كتير بتبدأ من 100 لحد 170
انا غيرت الديسك الأمامى عند 60000 كم و تمن الأصلى 425 و الألمانى بيبدأمن 350

[saiedccs]

السلام عليكم
انا معاي عربية 2003 او يد يعنى عمرها دلوقت 6 سنوات. الحمدللة ماشية زى الساعة كل الحكاية انها بدأت تحتاج دهان خارجى
فعلا عربية قوية وفيها كماليات عديدة

محمد سعيد

[MohamedGafar]

أنا كانت عندي واحدة كنت شاريها للمدام من واحد ربنا يباركله والله . كانت موديل 2005 وكانت عاملة 11000 كيلو وبعتها وهي عاملة 13000 كيلو وجبتلها أسترا 2006 عشان أوتوماتيك. وكانت فعليا زيررررررو سواء لما اشتريتها أو لما بعتها.

بصراحة كانت عربية رهيبة والله. ماعرفتش قيمتها غير لما بعتها. عبارة عن صاروخ مع إن معايا فكترا 2000 أوتوماتيك . بس العربية دي بالذات حاجة تانية خالص!. للأسف بسبب قوة موتورها مقارنة بوزنها بأشوف منها عامل حوادث كتير على الطريق والغالب الأعم شباب. آخرها واحدة سودة فوق كوبرى النزهة. والله زعلت عليها!

ربنا يسترها علينا جميعا وإن شاء الله تنبسط منها وربنا يكفيك شرها.

[Mustafa_Farouk]

السلام عليكم،

واحدة من العربيات اللي فعلاً بموت فيها، ما شاء الله حلوة جداً اللي كانت معايا، فعلاً ٤ سنين اللي فعلاً كنت بمشي بها وأنا مطمن.
بس أكيد في ناس لها وجهة نظر تانية ويقولو انها مش قد كدة والله أعلم.

[amrzakii]

انا اشتريتها على بركه الله و الحمد لله لم احس باى مشاكل حتى الان

[Ahmad Allawy]

انا اشتريتها على بركه الله و الحمد لله لم احس باى مشاكل حتى الان

الف مبروك يا باشا و ربنا يباركلك فيها و يمنع عنك اي مشاكل فيها ان شاء الله..

[ASKAFRAWY]

الف مبروك..العربية فى المجمل زى الفل عربية طالقة بس طبعا مشكلة الاسطوانة و الديسك يعتبر اكبر عيب فى الموديل دة

[MohamedGafar]

انا اشتريتها على بركه الله و الحمد لله لم احس باى مشاكل حتى الان

ألف مبروك عليك. فين الحلاوة بقي؟

[biboelking200]

الف مبروك يا باشا انا عارف انها جاي متاخره اوي بس معلش بقي امتحانات وانا معي اختها وربنا يكفيك شرها :d
والف والف مبروك تاني مره
انضام للعصابه يعني :d

[biboelking200]

طيب والنبي والنبي يا عمو حد ممكن يقول ايه حكايه الاسطوانه والديسك اللى بيتغيروا دول يعني اعرف منين اني الحاجات ديه عاوزه تتغير معلش اخوكم الصغيره حلاوة بقي وبيسال :::d:d:d:d:d:d:d: