مشكلة في سير الدينامو

[ahmedviking]

السلام عليكم

مشكله كدا بسيطه يا شباب في عربيتي الأوبل كورسا - 1600
ويا ريت لو حد عدت عليه قبل كدا او ليه خبره فيها يرد عليا

الموضوع انه من كام يوم الصبح وانا بدور سمعت صوت خشن فالماكينه- فتحت الكابوت لاقيت سير الدينامو مشعر شعره صغيره اوي وناطر من مكانه وحته من طالعه علي شفة الطانبوره الصغيره اللي فوق طلمبة الباور والمهم انه بيلف عادي ومش بيقع عالاخر بس بيشعر اكتر
رجعته مكانه ومشيت بيه شويه ولاقيته ناطر تاني رحت للميكانيكي قالي ممكن يكو ن السير فنغيره - غيرت السير ولما شيلت القديم كان اتقطع من النص كدا ( بالطول )

المهم غيرته وبعد يومين بابص عشان اتأكد لاقيت نفس الحركه
والسير ناطر برضو من نفس الحته - مع وجود رفه في دوران السير من ناحية الدينامو وعلي الطانبوره الصغيره نفسها اللي بينطر عليها

المهم رحت للميكانيكي تاني قالي بسسسسسسسس هي عاوزه شداد سير دينامو كامل ( مشتمل علي بلية الشداد ) المهم خدته من عنده استيراد وكان حالته كويسه جدا كأنه زيرو فعلا ( انا قلت له اني هاخده تجربه ولو حصل حاجه هرجعه ) - المهم ركب الشداد ومشيت يوم وكله تمام ومش بينطر علي حرف الطنبوره ( بس الرفه لسه موجوده شويه ) بعد يوم بابص دلوقتي لاقيته ناطر تاني بنفس المنظر بس لسه ماتقطعش

مش عارف بقي المشكله فين وليه الحاجه الغريبه دي وليه السير بيتحرك من مكانه ويطلع علي شفة الطانبوره ؟!!!! وايه حلها وعاوز اعرف قبل ماروح للميكانيكي تاني وعلي فكره هو ميكانيكي كويس ومش بيفتوا عادة يعين وباثق فيهم ( أشرف أوبل )- ايه الحل يا شباب ؟؟؟؟

[Ahmad Allawy]

بيهيألي هي مشكلة الشداد عادي...
لأنك انت بتقول انك اول لما غيرته كان في رفة برضه .. و دي ممكن جدا انها تكون السبب..
و بصراحة انت كان الافل تجيب ده جديد.. عشان هو مش غالي قوي يعني.. و بعدين هو جابه منين استيراد..؟؟!!!!
العربيات دي برازيلي و قطع غيارها استيراد قليلة قوي..

[samirayad]

روحله تانى .......وخليه يتأكد أن الشداد بليته كويسه برضه تانى الأول ........وبرضه أعتقد أن ممكن يكون عيب فى بلية الدينامو نفسه ( بتلف فى البيت بتاعها مع الموبينه بتاعة الدينامو )

[tananybasha]

انت غيرت السير بعد البلية و لا ركبت القديم برضو

[ahmedviking]

أحمد باشا علاوي : مفهتمش رأيك ؟ مشكلة شداد ؟ وازاي وانا غيرته ؟
وبعين انا كنت هجيب الجديد بس الوقت كان متأخر ولما وراني الاستيراد اقتنعت بيه لانه فعلا شكله نضيف ومفكوك بحالته وبصراحه مكنش فيا حيل اروح اي مكان تاني فقلت اجرب وبعدين جابه منين بقي والعربيه برازيلي مش عارف بس مش دي النقطه هم بيقولوا عادي علي المفكوك من عربيه عامله حادثه ولا اي حاجه انه استيراد دا المعتاد فالسوق يعني ( احنا في مصر )

استاذ سمير : هو ماعتقدش مشكلة بليه - لانه الاستيراد دا كانت بليته حالتها كويسه جدا وباين في وانت بتلفه بايدك انها ثابته اوي وبتلف في محورها وانا ارجح رايك انه مشمكن يكون بلية الدينامو لانه منبع الرفه من عند الدينامو - بس فالحاله دي هغير ايه فالدينامو بالظبط ؟


طناني باشا : انا بعد الشداد الجديد حطيت السير القديم لانه كان بحالته مكنش لسه لحق يحصل فيه حاجه وقلت برضو اجرب عليه عشان مش كل هشويه هجيب سير اجرب بيه معتقدش انه مشكلة سير فالمره التانيه

[samirayad]

وانا ارجح رايك انه مشمكن يكون بلية الدينامو لانه منبع الرفه من عند الدينامو - بس فالحاله دي هغير ايه فالدينامو بالظبط ؟

طيب حل وش الدينامو وشوفه الأول ..........لو البليه لفه فى الوش ..................غير الدينامو ............وخللى التانى عندك أحتياطى لأى حاجه تعوزها منه ( كتاوت _ سيلكونات _ طنبوره وهكذا )..............والدينامو الأستيراد عندك مش حيزيد عن 150 بكتيره ويمكن أأقل

[biboelking200]

ربنا معك يا عم وتحل مشكلتك ديه علي خير ويكفيك شر الفتاوي بتاعت الصنايعيه

[ahmedviking]

اااااااه شر الفتاوي
هي دي اهم حاجه
ربنا يسترها من شر الفتاوي
انا بافكر اروح بيها التوكيل واخلص

[ahmedviking]

هاشوف رايك كدا يا سمير واعتقد انه اقرب حل لغاية دلوقتي
بس الدينامو جديد يعمل كام؟

[samirayad]

أطمن برضه على أن بكرة الشداد لسه كويسه زى ماشوفتها قبل ماتركبها فى العربيه ( لأنها أستيراد برضه وفيها بليه )................لو كله تمام .....ممكن تروح لكهربائى كويس ......ويحل طنبورة الدينامو ....ويحل الوش يبوص عليه الأول ( علشان نجزم أن العيب منه برضه )................وبالنسبه للدينامو الأستيراد فى بورسعيد بيعمل 120 الى 150 تقريبا بكتيره ......وأعتقد فى الحرفيين حيكون فى الحدود دى برضه ( وأهم شىء تسأل عند كذا واحد ) .........طبعا حينما نتأكد من موضوع الوش

الموضوع انه من كام يوم الصبح وانا بدور سمعت صوت خشن فالماكينه- فتحت الكابوت لاقيت سير الدينامو مشعر شعره صغيره اوي وناطر من مكانه وحته من طالعه علي شفة الطانبوره الصغيره اللي فوق طلمبة الباور والمهم انه بيلف عادي ومش بيقع عالاخر بس بيشعر اكتر

على فكره حتة السير دى اللى مشككانى أن بلية الدينامو لفت فى الوش وعملت حمل على السير وحصله اللى حصل ......وتقريبا الشداد القديم كويس برضه

[ahmedviking]

شكرا يا باشمهندس سمير
انا هعمل كدا ان شا الله
بس هاروح بقي بكره لاني النهارده عندي كذا مشوار لاز ماعملهم - هارجع السير في مكانه كدا واشوف هيحصل ايه تاني
بس علي الله السير مايتقطعش او يشعر جامد تاني عشان اقدر امشي بيها شويه علي ماشوف الدينامو

بس انا معتقدش انه ممكن ينطر خالص من علي الطنبوره او لا قدر الله يتقطع نهائي وانا ماشي مره واحده كدا
مش كدا ولا ايه ؟

[samirayad]

بس انا معتقدش انه ممكن ينطر خالص من علي الطنبوره او لا قدر الله يتقطع نهائي وانا ماشي مره واحده كدا
مش كدا ولا ايه ؟

خير أن شاء الله يا أستاذ : أحمد ........ولاتقلق .....ماهو شغال كده من زمان ......وظبط السير الأول قبل ماتعمل مشاويرك .......والستار موجود ......وربنا حييسرلك الحال قريبا أن شاء الله

[ahmedviking]

الغريب بقي دلوقتي اني مشيت بالعربيه اول امارح وامبارح والنهارده وعملت بيها اكتر من 200 اكيلو والسير كان نزل مكانه ومتحركش خالص لغاية دلوقتي
انا متابعه وكل مابوقف العربيه بابص عليه والغريب اني بلاقيه بايت في مكانه ومبينطرش زي الاول خالص بس برضو الرفه لسه موجوده
يا تري اتابعه شويه ولو فضل علي كدا انساه ومافيش مشكله ولا اشوف المشكله فين ؟

[samirayad]

مفيش مشاكل ............خليك وراه .........هو حيروح مننا فين.............بس كنت عاوز أسألك السير مشدود كويس ولا مرخى ( أصل لو كان مرخى شويه ) حيكون ده السبب فى أستغرابك ......لأنه مش محمل على طنبورة الدينامو جامد مثلا .............

[ahmedviking]

لا يا هندسه هو مشدود كويس والواد الميكانيكي كان قرط عليه كويس وحتي خليته زود فالقرص عليه راح ناطر خالص - قام ظبطه ومحرقش عليه وخلاه مشدود يعني الطبيعي
هو لغاية دلوقتي لسه منطرش خالص وشغال فل بس الرفه موجوده اسيبه بقي ولا اشيك علي بلية الدينامو زي ماقلنا ؟
وشكرا علي اهتمامك يا باشمهندس :)