** Vw Golf Gt *** Vs Fiat Bravo Veloce***

[CryptonX]

وحشين بمعنى الكلمة !
( ياريت تعذروني علي كبر حجم الصور - بس بجد حرام اضغرهم و حتعرفوا ليه )

بما ان البرافو ال 150 حصان و الجولف ال 140 حصان بقى موجودين في مصر و بقو مملين خلاص و محدش عايزهم ( هاهاهاهاهاهاها )

قلت نشوف مقارنة ..... سخنة شوية ....................... مقارنة .... بجد قعدت افرأ و اشوف كل صورة ..... وانا بموت ....

VW GOLF GT
هي هي الي نزلت عندنا مؤخر الي TSI بس دي النسخة ال 170 حصان بناقل حركة اوتوماتيكي DSG .
محركها 1400 سي سي برده و بيولد عزم 240 نيوتن في المتر و مع وصول معظم العزم عند 1750 لفة .

FIAT BRAVO VELOCE
طبعا كلكو شفتو البرافو ال -TJET ال 150 حصان الي اقل مايقال عنها " شكلا علي الاقل " انها تحفة فنية ......

ارموها في الزبالة ....
ليه ؟

فيات قررت تعمل نسخة اعلي !

طيب ازاي ... ABARTH قامو بالمهمة .

بدل ال 150 .. زود عليهم 35 علشاني انا و خليهم 185
وبدل ال 220 يا عم .. بتوع العزم خليهم علشان خاطري انا 272 نيوتن في المتر عند 3300 لفة مع موصول 85% من عزم المحرك عند كام ؟؟

1750 ؟
1500 ؟
1000 ؟
لأ . من 1500 إلى1750 لفة تاخد حوالي 230 نيوتن في المتر
من نفس المحرك ...


---------------

نسيبنا من كلام المحركات .. من علي الورق طبعا ...

GT

VW GOLF GT
و نروح للشكل !لم تختلف كثيرا عن الجولف العادية باسثناء جنوط مقاس 17 و الجريل الاسود الامامي ذو علامة ال GT
داخليا كراسي جلد طبيعي و طبعا التصميم الالماني الانيق جدا بدون تكلف او فشخرة فاضية و طبعا معمول ليعيش 20 سنة قدام ! فقط في علامة GT علي الدركسيون .

و هنا نختم الفرق بين الجولف و الجولف GT .



-------------------------------

_------------------------------
FIAT BRAVO VELOCE

الخطوط الايطالية مفيهاش كلام ياجماعة و كلكم اجمعتم علي الكلام ده في المعرض .. صح ؟؟؟

غلط !

فيات زودت BODYKIT كامل للبرافو فيلوسي - و لون واحد فقط هو اسود ملوكي و جنوط 18" سوداء
مع حتة لوجو صغنطوط .. جنب الجنط عليه عقرب كدة .. بيسموه " ABARTH
و كراسي جلد احمر طبيعي .

اسيبكم شوية مع الصور :










----------------------------------------------

بعد فاصل الوهم ده ...
نرجع مرة تانية للنقطة الاهم .....

مين اسرع ؟؟
بالرغم من عدم توافق الفرص في الطرفين
البرافو اعلي في القدرة الحصانية و العزم ولكنها اقل بكثير في شيء وهو ناقل الحركة ذو الست سرعات المانوال .... و ده ممكن يدخل حسابات كتير اوي ... علي عكس ال DSG الستيبترونيك بتاع الجولف .. الي اسمحولي ان انحني قدام VW بسببه .. فعلا تكنولجيا تثبتلك ان المانوال مبقاش هو الفيصل في السباقات و ان فرق الاحصنة و العزم .. ممكن يتعوض بناقل حركة اقل ماقول عليه انه رهيييييب !

فياتاوية ! متخافوش :)
شباب فولكس - متقلقوش .

النتائج بصراحة مرضية للطرفين . طب ازاي ؟

ياتري مين ...






من صفر الي مائة كيلو في الساعة
فيات برافو فيلوسي - 7.64 ثانية
فولكس جولف جي تي - 8.03 ثانية

من 100 الي 180 :
فيات برافو فيلوسي - 10 ثواني
جولف جي تي - 14 ثانية

اقصى سرعة :
برافو فيلوسي 236 كم / ساعة عند 6000 لفة

جولف جي تي 220 كم / ساعة عند 6500 لفة .

--------------

طبعا عرفته ليه اتكلمت عن ال DSG باحترام بالغ ! شوفو الفرق بين المحركات اد ايه .. اتلخص في اجزاء من ثانية بسبب ناقل مانوال و ناقل DSG .

يعني الجي تي بدون ال DSG كان ممكن تفرق فيها ثانية او اكثر كمان .

فعلا تحية ل VW !
نيجي لفيات .. المقارنة شبه مش عادلة علشان في ناقل DUALLOGIC نزل من فيات وهو نفس فكرة ال DSG و كان حيغير كتير في النتائج .

بس ارجع و اقول .. فيات ادركت كدة كويس و علشان كدة زودت العزم و القدرة الحصانية علشان تعوض .

ناهيك عن الاداء المحركاتي
السيارتين ثابتتين مثل الاسمنت بتفوق للجولف في راحة الركاب ( السيارة الهاتشباك رقم واحد مش من هواء ) .

وفي اخر الاختبار في موقع .. احتارو بين اختيار السيارتين للأسباب

الجولف اقرب للسيارة الكاملة في كل شيء و اداء مماثل بقصور كبير في الشكل الخارجي و سعر عالي جدا .

البرافو اقرب للسيارة الرياضية من الكاملة و في لبعض الاحيان يطغوا طابع Abarth علي الراحة . لكنها افضل شكلا و اداءا و ارخص سعرا .

و سابوا القرار لك .. عزيزي الشاري :)

--------

نشكر حسن قرائتكم و نعتذر عن توقف دقات قلبكم لدقائق ... ارجو التنفس بانتظام و غلق هذا الموضوع نهائيا :)

الموضوع من ترجمتي لموقع sgcarmart و تعليقي عليه
بالاضافة الي معلومات اضافية من بعض المواقع الاخرى

الصور من موقع sgcarmart- و للأسف مفيش صور اكتر للجولف ( مش تحيز والله ) .

[Ahmed Samy]

اخد نفسي بقه .........

بص يا عم كريم ............

جولف بس بصراحة العقرب و الانتيريور بتاع البرافو تحححححححححفة

[CryptonX]

تصليح بسيط يا جماعة :)

استحالة تكون البرافو بتولد 230 نيوتن عند 500 لفة علشان اكيد العربية مش حبتقى دايرة ساعتها !

انا نسيت 1 قبلها :)
هي 230 نيوتن عند
1500 - 1750 نيوتن :)
( ارجو التعديل من المشرفين )

شكرا لهشام عبد المجيد للتوضيح .

---

و علشان الغلطة دي :

خد عندك فيديو الاختبار :

http://www.sgcarmart.com/news/reviews/videos/bravo%20vs%20golf%20gt%20320x240.swf

[Chicco]

موضوع هايل ...ألف شكر يا باشا
أكتر حاجة تناسب الموضوع ده أغنية قديمة لصباح ....الاتنين حلوين الاتنين طعمين محتار اشيل مين جوا عيوني :)
أعتقد أن ناقل الحركة ال-dsg هو المستخدم في النيسان Gtr مش كده ؟

[Nile_Storm]

ايه الكلام ده
ايييييييييييييه ده كله اييييييييييييه ده كله
الاتنين تحف
بس انا بحب البرافو اكتر

[NaderNabil]

واحد برافو فيلوسي و صلحه بعد اذنك....

طب انا بحلم بالبرافو العادية ام 125000....تيجي انت و تفقعني بالبلوة المنيلة دي؟

[Ahmad Allawy]

موضوع خرافي..
تسلم ايدك يا كيمو..
هي فعلا البرافو كانت كلمة واحدة بس هي تعليق كل اللي شاقفوها من اصحابي في المعرض اللي فات..
"برافو"
بس كده.. و الجولف اكيد مفيش عليها كلام..

[فادى]

يا أستاذ كريبتون الدى سى جى ملوش دعوة بالتسارع, هو تسارعه ممكن يكون قريب بعض الشىء من الفتيس المانيوال, هو أسرع من الأوتوماتيك التقليدى لكنه ليس أسرع من المانيوال.
الدى سى جى هى علبة تروس يدوية لكن النقل يتم اوتوماتيكيا بواسطة عتلة أو أزرار, و لا الدى سى جى و لا الديوال لوجيك يمكنه أن يتفوق على العلبة المانيوال التقليدية.
و يبدو أن محرر الموضوع تجاهل الوزن تماما, و أعتقد ان الوزن هو سر الفرق فى التسارع و ليس الدى سى جى.
يبلغ وزن الجولف جى تى حوالى 1340 كيلو و هو وزن ثقيل نسبيا.

http://en.wikipedia.org/wiki/Special:Search?search=golf+gt&go=Go

أما الفيات برافو فيبلغ وزن النسخة العادية المزودة بمحرك بنزين حوالى 1205 كغ.
و هذا هو السبب فى فرق التسارع بينها و بين الجولف, لأن علبة التروس لن تحدث كل هذا الفرق.
و هو ما يعكس خبرة فيات بصنع سيارة رياضية خفيفة الوزن, عكس فولكس التى تفتقد للخبرة اللازمة فى هذا المجال, مما أدى الى خروج الوزن عن السيطرة لو جاز التعبير.

[NaderNabil]

فيديو يوضح الفارق بين الDSG و المانوال العادي:

http://www.youtube.com/watch?v=gmMNRQ1GJ3o

[Ahmad Allawy]

شكرا يا جماعه علي الاهتمام الكبير ده..
معلومات مفيدة..
منكم نستفيد..

[Chicco]

أعتقد أن ناقل الحركة ال-dsg هو المستخدم في النيسان Gtr مش كده ؟

ما هو عشان كده أنا بسأل .....ملحمة الدراما اليونانية قصدي اليابانية بتاعة النيسان GTR ما خلصتش ..... و سبحان الله فادي باشا تدخل أهو ......بس فيديو هايل يا نادر باشا .....الغريب إن سواقين الجولف يابانيين ...طبعا فادي باشا مش حيصدقهم .....فينك يا برو باشا :)

[SEATLOVER]

موضوع هايل يا كريم
بس هاقولك جملة صغنطوطة

نحن نثق فى ارقام ال VW ..... ولا نثق فى مفاجآت الفيات

[CryptonX]

موضوع هايل يا كريم
بس هاقولك جملة صغنطوطة

نحن نثق فى ارقام ال VW ..... ولا نثق فى مفاجآت الفيات

شكر يا سيات بس الي انت قلته بالظبط هو بالظبط لماذا يعشق الناس و انا بالذات السيارات الايطالية بالرغم من عدم كونها افضل او احسن السيارات في فئتها و تفضيلها علي مثيلاتها الالمانية الفائقة و لكن الرتيدة .

انا بعشق المقاجئات :)

[SEATLOVER]

الرتيدة

يا نهارررر .. جبتها منين دى
دى يعنى اية دى يا كريم ؟؟

[Mzeid]

السلام عليكم ..
بالنسبة للفيات إبتداء من البونتو الجديدة فهي إتعدلت بتعمل تكنولوجيا و تصميمات جميلة .
و فيات أنا متوقعلها إنها تتقدم و تثبت أقدامها في السوق لأنها بدأت بجد الشغل ..
بس مش العربيات الفيات بتسخن بسرعة .. ؟!
و بمناسبة الأرقام و أنا بتفرج على البرافو في ال SHOW ROOM اللي في الدقي فمسؤول المبيعات هناك قالي إن سرعتها القصوى 240 كلم / ساعة قلت في سري يا راجل :)