أوبل أسترا 2013 ؟؟!!

[hdlhkhgikn]

السلام عليكم ..

أنا قررت أخيراً والحمد لله بعد تفكير لمدة 3 سنين انى اغير عربيتى اللى هى اصلا لانسر بوما 2004 ... وبصراحة كنت خلاص مقبل على شراء التويوتا 2013 بس لما قريت شوية هنا حسيت انى بفكر لسة جوة الصندوق ونفس التفكير المصرى اللى هو ( يبنى هات توتيوتا عشان لما تيجى تبيعها متخسرش) كلنا بنفكر كدة بصراحة بس انا قررت أغير تفكيرى المرة دى وأركب "عربية" بجد مش مجرد عربية اعرف ابيعها .. للعلم انا مليش خبرة كبيرة فى العربيات .. بالعكس انا اصلا فكرتى عن العربيات زفت بسبب ان عربيتى اللانسر جايبها مستعملة من 2006 وطلعت عين اللى خلفونى وصرفت عليها كتير اوى وللعلم بردة مبجربش عربيات كتير لان العربيات مش من هواياتى .. عموما انا مبحبش ابيع ولا اشترى كتير فى العربيات والعربية بتفضل عايشة معايا فترة من الزمن مش اقل من 6 سنين .. انا حبيت العربية الاوبل الاسترا دى لما قريت كلامكم عنها ونزلت اتفرجت عليها النهاردة هى وال 408 الجديدة والاوكتافيا والتويوتا وعجبتنى جدا جدا بس اللى مستغربلة انى ملقتش ال cosmo اللى انا عايز اجيبها بس مش مشكلة مدام انتوا قولتوا كويسة هتوكل على الله وأسمع كلامكم .. انا قررت انى اشترى الأسترا cosmo وأخاطر بكل ما املك فيها .. انا مش من مستخدمين الاوبل خالص واول مرة اركب عربية ملهاش بيع فى مصر اوى وبصراحة خايف يبقى اختيارى خاطىء بسبب تقييمات سمعتها هنا .. انا مش خايف انا مرعوب بصراحة .. يا حضرات لو سمحتوا ممكن حد يطمنى شوية عن العربية دى ويقولى انى مش هرمى فلوسى فى الارض وانا بأمانة هاخد كلامة ثقة طالما هو بيفهم فى الاوبل او فى العربيات عموما .. اسف على الكلام الكتير وأتمنى حد يفيدنى .. شكراً :)

[Ahmed_Adham]

اطلب نقل الموضوع لقسم الاوبل أحسن عشان تاخد ردود اسرع. فيه موضوع عن العربيه فيه كلام كتير عنها ونقد بالسلب والايجاب. لو عيوبها مش مأثره معاك يبقى اتكل على الله.

[hossam.h]

يا باشا الاوبل ديه اسطورة عمرك ما هتندم انا لسه جايب اوبل فيكتر 2002 1600 سى سى و الله العظيم كل شوية بتحجج بججة علشان انزل اسوقها و الله متعة ده انا بجيب ال200 من غير ما احس و الله و ثبات رهيب ما بالك بقى باسترا 2013 يعنى كمان تكنلوجيا اعلى نصيحتى توكل على الله و اشتريها و اللى بيركب اوبل عمره ما بيندم ولا بيفكر يبيعها اصلا

[m.farouk]

العربية هايلة وليها سوق فى مصر يعنى مش هتخسر فلوسك ولا حاجة

[ak007]

عربيتي الاولي كانت اوبل استرا 2005
كنت ولسه بايعها السنه اللي فاتت
كنت بجيب بيها 180 وكاني مش سايقها
بص لو مش هاتجيب حاجه اعلي من الاسترا
اوعي تجيب ااقل منها
يعني فكك من التويوتا ولا اللانسر ولا البطيخ دا

اقولك موقف
كنت سايق بسرعه وكان جمبي واحد صحبي معاه لانسر
وفجاه العربيه اللي قدامنا وقفت فجاه
والمسافه اللي بيني وبينها مكنتش تسمح اني امسك فرامل
رحت واخد بيها غرزه شمال في يمين وعديت منها الحمد لله
صحبي حلفلي اني لو عملت الحركه دي بعربيته كانت اتقلبت

اتوكل علي الله الاسترا تحفه
ناعمه
ثابته
سريعه

[the_first_knight]

اختيار موفق إن شاء الله

[عبد الرحمن اسامه]

عمرك ما هتندم إن شاء الله، اختيار موفق جداً.