ما تم و سيتم في البي ام ...

[Xpert]

المهم ... بعد ما التيربو باظ و الانجكشن باظ ... قفلنا المكنه علي اللو كومبريشن بتاع التيربو و قلبناها كربراتير عادي و اسبراتير واقف الكتروني .... لحد ما ربنا سهل ... و قررنا تغير البساتم (لحد ما المعلم اقتنع ...) .....
المعلم قرر ... انه يجيب بساتم جديده ... رحنا جبنا بساتم هاي كومبريشن من التوكيل ... 10:1 ... طبعاُ كل ده في بلوك اصلاً 2800 سيسي .. و الشميز 86مم ... و الخرطه بتاعه التيربو 3200 سيسي 89 مم ... و المعلم قرر .. انه يخرط البلوك 92 مم ... تيجي ازاي .. مش عارف .. يا عم البلوك هايطق نصين ... ماسمعش الكلام .. يا عم .. اعمل اللي انت عاوزه .. انا مش خسران حاجه ...
المهم .. نزلت جبت البساتم (عارف ان البلوك هايطق .. المهم عملتهله المكنه علي مزاجي ... بحيث ان البلوك لو طق .. انزل اجيب بلوك فاضي و اقفله عادي ...) ...
المهم .. 400 كم قطعهم البلوك بالعمره .. و قد كان ... مشوارين المنيا و تاني مشوار جبنا العربيه و الدخان طالع من كل ناحيه ... اركن تاني لحد ما ربنا يحلها ... هب هب و المعلم قرر .. انه ينزل يتفرج علي البضاعه اللي موجوده في مصر (فاكر بقي انه هاينزل يلاقي حاجه استيراد نمره واحد زي اللي كان بيجيبه من سويسرا .. ههء .. قال سويسرا قال ... ده نزل الحرفيين لقي شويه زباله .. لحد ما مسك في واحد معرفه ... هب .. جابله مكنه استيراد فرنسا .. و حليتها من علي النص بايدي ..) ....
الحاله العامه .. الموتور 3400 سيسي .. هاي كومبريشن 10:1 من المصنع .. و ده كده فيرشن نادر .. و اللي فاهمين في البي ام عارفين .. الموتور نازل علي ام 535 .. جبت معاه فتيس 5 غيار اسبورت دوجليج .. بس جبته بعد الموتور باسبوع ... وصل الموتور بني سويف محملاً في عربيه ربع نقل .. (هم بقوا حراميه كده ليه ؟ .. 300 جنيه من الحرفيين لحد بني سويف .. لييييه .. 138 كم بعيد عن المنيب .. انت مش رايح اسوان يا عم ! ) ...
المهم .. الموتور اتركن .. العبد لله مسك حوض العربيه ماخلتش فيه مسمار زياده او مسمار ليه علاقه بالعك اللي فات ... و ياللا .. نجيب الميكانيكي .. نركب المكنه ... ركبنا المكنه في الحوض .. عملنا قاعده للفتيس لاختلافه عن القديم .. و جبت قاعدتين موتور فيات 131 قعدت عليهم الفتيس (الفتيس راكب علي قاعدتين موتور :D ) ....
ركبنا الموتور .. جه وقت الانجكشن ... لقيت حساسات ناقصه .. نزلت جبتهم .. طلع البلاوي اللي عندي .. طلع الوايرينج دياجرام بتاع الموتور .. وصل توصيلاتك شغل الخواجه .. حط المفتاح ...





.....




....



مادارتش :D ... و اديني مستني الكهربائي يجي من بورسعيد علشان يعيش هوه مع نفسه بقي في الحساسات و الضفيره و السلوك و الليله ... اصل انا خلقي ضيق طبيعي و باتخنق بسرعه

المفروض انه جاي بكره ... (باكتب الكلام ده النهارده .. النيفا عطلت امبارح .. و صلحت فيها حاجات النهارده .. المفروض ان البي ام تدور .. هاسيبها للمعلم و اخد منه النيفا اجددهاله .. و يرجع ياخد النيفا و يسيب البي ام تتجدد بالكامل برضه ... بس طبعاً ... ده المفروض .. و اذا تم افتراض شيء .. قول ان شاء الله ... شكله هاينام علي البي ام و مش هاشوفها تاني هههه :D )

[fahd_628]

ربنا معاك يا اكسبرت

هما كلهم باظو كدة مرة واحدة :) انت حظك معلش وحش :d

و ابقى طمنا عملت اية :)

[Xpert]

عادي بقي .. المعلم باين نيته وحشه ههههه

[Karim_Monir]

مش قولتلك ارحموا عربياتكم بقي يا بيشوي
ده انا حاسس انهم هايمشوا بالكوكا كولا بعد كدة
ولو مالقتش
كركدية او عصير قصب
ها ها ها

[Xpert]

عادي يا عم ... بس احنا لسه في تطوير تكنولوجيا مواتير عصير القصب ده ههه
اصل احلي حاجه في البلد هنا ... البلد بتاعتنا و محدش ليه عندنا حاجه .. حتي القسم بظباطه بدبابيره بالمساجين اللي فيه ملكنا ... احنا اللي حاكمين البلد ... علشان كده .. احنا واخدين راحتنا .. و بنفتري علي خلق الله ... و احلي ناس تهزر معاهم .. سواقين النقل :d

[mars3v]

كنت لسه هبعتلك امبارح اسألك عملت ايه، بس دخلت نمت :d ...انا قولتلك شوف حد بيفهم يعملهالك و بلاش تعمل نفسك المخترع الصغير :d... انا عربيتى لسه مرميه زى الكلب اليتيم عند الميكانيكى

[Xpert]

الكهربائي جاي اهه في السكه و زمانه علي وصول .... :d لما نشوف بقي هايعمل ايه ههههه

[mohamed ibiza]

الف لا بأس يا اكسبرت هي العربيات كده لما تفتح بتفتح من كله ربنا يعينك و يوفقك يا خبير Bmw الاول في نايل موتورز











Ibiiiiiiiiiiiiiiiiiiiiiiiiiiiiizzzzzzzzzzzzzzzzzzz zzzzzzaaaaaaaaaaaaaaaaaaaaaa For Ever

[SEATLOVER]

ربنا معاك يا بيشو ..انت محسسنى انك بتعمل فى العربية (عملية قلب مفتوح )

[Xpert]

اقوي .. اهه الكهربائي جه اهه و هانعمل كونسولتو في العربيه هههه

[Xpert]

اخر الاخبار و التطورات ... العربيه دارت الحمد لله و كان العيب في حساسات الفتيس زي ما قولت و المعلم ماقتنعش (ده مش سهل انه يقتنع .. انا مالي بقي ..) .. تم تغير طلمبه البنزين و حساسات الفتيس و خراطيم البنزين ... بكره ان شاء الله تظبيط الردياتير و تركيب دائره تبريد الباور و سربنتينه التكييف .. و كذلك تعديل الشكمان ...
تطورات النيفا في قسم اللادا ..

[S H @ F T]

مبروك ياباشا على الدوارة
وعقبال باقي التظبيط

[Xpert]

الله يخليكو يا رجاله ... بس خلاص المهمه كانت تغيير المكنه .. لسه بقي الباقي في الخطه الخمسيه الجايه :d

[Xpert]

تم تجربه العربيه ... العربيه طلقه طلقه لدرجه ان انا نفسي ماعرفتهاش ... العربيه ماشيه بدون شكمان و عباره عن تلوث ضوضائي حالياً ...غداً ان شاء الله تركيب الشكمان ... (ربنا يسهل ...)

[Xpert]

تم تركيب الشكمان .. و تم اكتشاف ان الموتور بيسخن ...
هالغي الترموستات و اضبط تاكيهات .. و ربنا يسهل ...