للبيع عزيزتى البي ام

[totty]

اخوانى الاعزاء كل عام و انتم بخير للاسف قررت الاستغناء عن عزيزتي البى ام ال523 بتاعتى موديل 2000 بيزنس لاين لظروف وقف الحال اللى احنا فيه فى الشغل .........المهم علشان ما اطولش عليكم انا حزين جدا لكن الضغط زاد على فقررت ابيع العربيه .....طبعا اللى متابع معايا الموضوع من اوله انا لسه شارى العربيه دى من واحد جارى كان جايبها من الزيرو و ده راجل كبير و لكن كان بيسافر بيها كل فترة الى الغردقه فعلشان كده هى عامله 265000 كيلو الحاله العامه ممتازة و انا غيرت لها العفشه كلها بعلبه الدركسيون هى حاليا محتاجه جوز مساعدين امامى و شويه مراجعه على العفشه الاماميه و الخلفيه انا بمنتهى الامانه شاريها ب 105000 و الكلاك دة يشهد عليه الاستاذ عمرو بيه و الراجل بصراحه ما قصرش معايا فى اى مساعده لكن العين بصير و الايد قصيرة انا صرفت عليها 15000 جنيه ما بين العفشه و الكومبريسور بتاع التكييف و البطاريه و الكاوتش و انا مش عارف اقول ايه لكن حكم الزنقه اللى انا فيه بيضطرنى انى ابيع و مش عاوز العربيه تطلع برة لانها واحده من القلائل فى النضافه العامه هى لونها اسود فرش اسود فابريكه ماعدا اللاكسدامات لو حد يعرف الميكانيكى اللى فى طريق السويس يساله عليها هو لسه متفرج عليها و قالى هى تساوى 115000 جنيه طبقا للحاله اللى هو قيمها على اساسها لو حد عاوز يهادى حد انا موجود معاكو و الله الموفق ...................و اسف على الاطاله لكن الزنقه تحكم

[totty]

بعض الواصفات بالتفصيل
الموديل 523
سنه الصنع 2000
السعه اللتريه 2500 سي سي دوبل فانوس
اللون سوداء
الفرش الداخلى جلد اسود
الكماليات : جميع الكماليات الاساسيه للموديل ده مثل (نور زينون واطى , طارة دركسيون مالتى , كاسيت سي دي 6 اسطوانات , جهاز اتزان , جهاز مانع الانزلاق فى الفرامل , باور , سنتر بالريموت مع امكانيه فتح و غلق كل من الزجاج و الشنطه من الريموت , 2 مفتاح ريموت +2 مفتاح بدون ريموت +مفتاح بلاستيك اوريجنال , ستارة خلفيه كهرباء تكييف تاتش 2 مرحله , فتيس ستيبترونيك , نور شماسات , نور فى الاعتاب , و كماليات اخرى كثيره ) و كلها تعمل بكفاءه عاليه
دهان الفابريقه بالكامل ماعدا الاكسدامات
جنوط اسبور 17 بتاعة الموديل اللى بعدة
حالة العربيه جيده جدا لكنها محتاجه جوز مساعدين امامى و دول جديد ساكس المانى ب 1500 جنيه , استيراد ب 600 جنيه و كذلك محتاجه طلمبه بنين يمين و دى جديده 2000 جنيه استيراد ب 700 جنيه بالعوامه ولو المشترى عاوز اركبهم له انا ما عنديش مانع لكن على نفقته قطع الغيار و انا على المصنعيه ( اعمل ايه ما انا زى ما قولت على اخرى ) :((
لسه مغيرة زيت و فلتر و طقم سيور و معمول لها صيانه
.................................................. .......................الله الموفق

[medo20000]

ربنا يكرمك إن شاء الله بأحسن منها ويفك كربك فى أقرب وقت ...بالتوفيق

[mailo]

ربنا يكرمك إن شاء الله بأحسن منها

[inspiron]

يكفي أمانتك في العرض.ربنا يكرمك يا رب و يفك كربك و يخلفك خير إن شاء الله..أنا من ناحيتي هشوف أي حد من المعارف ولو في نصيب هكلم حضرتك.يا ريت تبعتلي رقم تليفونك.

لمن يهمه الأمر..يا جماعة العربية دي بالسعر ده بالحالة دي ممتازة.ورقم الكيلو متر ده والله مش كتير أبدا علي العربيه دي..يعني أذكركم بالعربية الـ 525 اللي كنت هشربها وربنا ستر.لما كشفت عليها طلعت عاملة 800000 كم..وكانت بتجري زي الوحش ومعندهاش مشكلة..يعني من الآخر المواتير دي ميهمهاش عدد الكيلو متر.أنا قولت رأيي بما يرضي الله ومش كسبان حاجة.الحمدلله أنا راكب زيها الـ individual.

[tommys]

ربنا معاك ويوفقك ويطلعك من محنتك على خير .... وإن شاء الله تتباع بسرعة .... وأنا من ناحيتي هاكلم ناس عليها وماتقلقش كلنا أخوة هنا

[totty]

بارك الله فيكم جميعا ووفقكم لما فيه الخير لكم و فرج الله عن كل مؤمن كربته و محنته ..........و اشكركم كثيرا على الاهتمام

[Mohamed Fathy]

دعاء الكرب
عَنِ ابْنِ عَبَّاسٍ رضي اللَّه عنْهُما أَنَّ رسُولَ اللَّه صَلّى اللهُ عَلَيْهِ وسَلَّم كَان يقُولُ عِنْد الكرْبِ : « لا إِلَه إِلاَّ اللَّه العظِيمُ الحلِيمُ ، لا إِله إِلاَّ اللَّه رَبُّ العَرْشِ العظِيمِ ، لا إِلَهَ إِلاَّ اللَّه رَبُّ السمَواتِ ، وربُّ الأَرْض ، ورَبُّ العرشِ الكريمِ » متفقٌ عليه .
اللهم رحمتك أرجو فلا تكلني إلى نفسي طرفة عين ِ وأصلح لي شأني كله لاإله إلا أنت الله ، الله ربي لاأشرك به شيئاً .رواه ابن ماجه .
قال رسول الله صلى الله عليه وسلم :" دعوة النون إذ دعا بها وهو في بطن الحوت :" لاإله إلا أنت سبحانك إني كنت من الظالمين لم يدع بها رجل مسلم في شئ قط إلا استجاب الله له ..صحيح الترمذي

[Mohamed Fathy]

السلام عليكم ورحمة الله وبركاته ..
دعاء الكرب للرآحة النفسيه بإذن الله ...

لا اله إلا الله الحليم الكريم
لا اله إلا الله العلى العظيم
لا اله إلا الله رب السماوات السبع و رب العرش العظيم
اللهم إنا نسألك زيادة في الدين
وبركة في العمر
وصحة في الجسد
وسعة في الرزق
وتوبة قبل الموت
وشهادة عند الموت
ومغفرة بعد الموت
وعفوا عند الحساب
وأمانا من العذاب
ونصيبا من الجنة
وارزقنا النظر إلى وجهك الكريم

[totty]

اللهم آمييييييين

[BIM2008]

السلام عليكم ورحمة الله وبركاته

انا ملاحظ حضرتك نزلت اعلانها علي كونتكت وبالنظر في المعروض

انا بصراحه مستغرب اسعار قريبه جدا لعربيات مشيت ما لايزيد عن نصف المسافه المطروحه ! ياريت حد يفهمني ...

شكرا

[yascro]

ربنا يحسن ليك سوقها

[totty]

موضوع المسافات ده موضوع غير موثوق بيه يعنى ممكن تكون العربيه عامله كيلومتر قليل لكن الصيانات مش متوافقه مع المواعيد او ملعوب فى العداد لانك لما تيجى تقيس المتوسط العام للمسافات السنويه طبقا للدراسات المعموله من المراكز المتخصصه فى الصيانه الخاصه بالتوكيلات التجاريه بتكون فى حدود 40000 كيلو فى السنه ده على المستوى العادل للاستهلاك فلما نيجي نضرب هذه المسافه فى عدد سنوات قدم الموديل من هنا تقدر تحدد المظبوط من غيرة دى نقطه التانيه انه ممكن تكون العربيه بتسافر كتير و ده افضل من العربيه المستهلكه بدون سفر لان الاستهلاك بيكون على طريق السفر اقل من الاستهلاك الداخلى ...........ده على حسب معلوماتى المتواضعه و الله اعلى و اعلم .....و بالنسبه لعمليه التسعير دى بيحددها العرض و الطلب و آليات السوق ثم الحاله العامه للسياره . بالنسبه للحاله بتاعتى انا قولت على اللى حصل معايا و ذكرت العيوب قبل المميزات و ان شاء الله لما تتحل ازمتى لن اتنازل عن هذا الموديل ابدا مهما قدم لان الموديل ده افضل موديل للفئه الخامسه على الاطلاق و ده على حسب ما ذكر سابقا فى مواضيع و نقاشات كثيره بداخل المنتدى ......و آسف على الاطاله و الله الموفق

[Deshahcoka]

باشا هوا ديه individual ؟ فيها فتحة سقف يعني و كدة زي ما بيقولوا كاملة يعني ؟

[totty]

للاسف دى فئة بيزنس بدون فتحة سقف و زينون واطى فقط وشوية نواكل ناقصه عن الانديفيديوال و حساسات خلفيه فقط و الموتور بتاعها يقل عن موتور الانديفيديوال بحوالى 18 حصان . اعتقد هو ده الفرق بين الاتنين فقط .....و الله اعلم .....ممكن حد من الاعضاء يفيدنا فى الفروقات بالضبط بين الاتنين