يعني اية (ارجو الاجابة)

[Mik_t4]

يا شباب
انا عندي 21 سنة
ومن زمان بحلم اركب بي ام دبانة
وبعد ماعرفت اسعارها قلت انزل للاقدم
نزلت اي 30 لقيتها في الخمسينات
فا جالي ياس بصراحة
لحد ما في مرة وانا بتسلي علنت لقيت واحد جايب عربية من المانيا 318 موديل 97 جايبها ب 1200 دولار وشحنها للمينا ب450 دولار لمصر وجة راح مدخلها معاقين انا استغربت لما لقيتة كاتب انها مزادتش عن 30 الف وحاتط صورة عربية عليها نمر مصر بس بصراحة العربية مستحيل تكون من مصر وعشان كدا اقتنعت واعدت ادور عالنت علي الموضوع دا وانا بدور وصلت لحاجة افظع وارخص ان لقيت ان في عربية مرسيدس عيون 2006 نصين بتتباع ب 45 الف بس انا مفهمتش ازاي نصين دي
فعشان كدا انا اشتركت مخصوص في المنتدي معاكم عشان ابق من الناس الي بتفهم في البي ام
واتمني متبخلوش عليا وتعرفوني ازاي الطريقتين وانهي طريقة افضل وارخص
اتمني حد يعرفني اية حوار المعاقين واية حوار النصين
وميرسي مقدما

[fny81]

متابع

[Mik_t4]

تابع ونورنا كمان وكمان

[MohamedGobran]

بص يا حاج انا عارف ان الكلام إلى هقولهولك ده ممكن يحبط إلى انت بتفكر فيه بس الحقيقه ان الطريقتين مينفعوش معاك لانك فاهم الموضوع غلط شويه و انا إن شاء الله هفهمك و لو فيه اى حاجه فى كلامى غلط يا ريت الساده الاعضاء يصححوها على طول

نبدأ بالمعاقين :
حضرتك البلد هنا عامله قانون ان الشخص المعاق من حقه انه يجيب عربيه مجهزه طبيا و الاجهزه ده بتعوضه عن الطرف إلى بيكون فقده فى جسمه لا قدر الله و العربيه دى بتنزل مصر و بتكون الجمارك عليها 20 او 25 % مش متذكر الرقم كام بالظبط

المهم الموضوع و ما فييه انت مينفعش معاك الموضوع ده علشان صاحب العربيه يكون لازم يكون معاق و طبعا بيجيب ما يثبت كده و العربيه طبعا إلى المعاق بيشتريها بيكون عليها حظر بيع 5 سنوات و مينفعش حد يسوقها غيره حتى لو كان راكب جنب إلى سايقها.

نيجى بقى لموضوع النصين :

حضرتك معنى عربيه نصين يعنى العربيه بتيجى من بره متقطعه و بتيجى مصر تحت اسم ( قطع غيار ) يعنى العربيه ملهاش ورق ولا رقم شاسيه يعنى مينفعش تترخص اصلا .... والعربيه مش بتيجى متقطعه نصين بس دى بتكون متقطعه 4 قطع يعنى السقف لوحده و الحوض الامامى بتاع الموتور و الشنطه والارضيه و القوايم يعنى العربيه بتيجى متقطعه كذا حته و طبعا سعرها بيكون كده لان العربيه مش هتمشى دى هتتباع قطع غيار يعنى مثلا واحد لاقدر الله عمل حادثه و العربيه وشها مش هينفع يتسمكر بيجيب نص امامى جديد و يلحمه بدل المخبوط او مثلا واحد عايز باب عربيه فهما بياخدوا ابواب العربيه النصين دول ويبيعوها .....يعنى تقدر تقول دى عربيه واقفه كامله شوف انت عايز تاخد منها ايه تركبه فى عربيتك لكن مينفعش تلحمها و تمشى علشان ملهاش ورق

اتمنى انك تكون فهمت كلامى ولو فيه اى حاجه مش فاهمها قول جزر بس

[MohamedGobran]

حضرتك ده شكل العربيات النصين

[Mik_t4]

جزر بس
انا سمعت ناس كتير معاها عربيات بي ام قديم وارد الخارج وجايبينها بطريقة المعاقين وهما زي القرود عاديين خالص وجايبينها باسعار خرافية في التلاتينات يبق ازاي مينفعش

[fahd_628]

بص يا باشا الأسعار بتبقى حسب الحالة

ال E36 بتبقى من اول 55 الف لغاية 80 الف ( انا بتكلم على السيدان )

الطبيعى بتبقى ب 70 مثلا اكثر شوية او اقل شوية دة بالنسبة للحالات الكويسة

الى ب 80 دية تلاقيها موديل عالى ( 1997 مثلا او 1998 ) و فيها كماليات زيادة و بتبقى فابريكة مثلا برة و جوة

الكوبية و الكابريولية اغلى من كدة زى ما انت عارف

بالنسبة للدبانة فا خلى بالك كويس و انت بتشترى علشان العربية بتبقى مع شباب و طبعا دريفتات و كل الكلام دة و بيهينو العربية

موضوع ان العربية نصفين دة موضوع خطير جدا و اوعى تشترى عربية نصفين

دية بتبقى عبارة عن عربية جاية من برة مقطوعة نصين ( بتبقى داخلة قطع غيار ) بتبقى شبة دية كدة



و بيقومو لحمينها فى مصر هنا و يجيبو رقم شاسية عربية عاملة حادثة و حطينة عليها و يمشو العربية

بس طبعا العربية دية خطر و ممكن ورقها ميمشيش فى المرور دة غير ان اصلا العربية عمرها ما بتبقى مظبوطة و اثناء الحادثة بقى محدش يعرف اية الى حيحصل


المهم انت و انت بتدور تكشف على العربية كويس جدا جدا جدا و لضمن حاجة التوكيل ! الكشف ب 1000 جنية تقريبا بس بيقولك على كل حاجة فى العربية

و دائما حاول تختار عربية بيتى كدة مش عربية شاب

و مينفعش تدخل عربية معوقين اكثر من 1600 سى سى خلى بالك !!!!

و العربيات الكابريولية فى مصر نسبة كبيرة منهم ( ان مكنش كلهم ) مغيرين ارقام شاسيهات او نصين و طبعا الكلام دة مينفعش و حيسبب مشاكل فى المرور و ممكن متعرفش ترخصها و تلبس فى الحيط :) و طبعا فلوسك كدة ضاعت ! مش بس كدة انت كدة ممكن تدخل نفسك فى قضايا

المهم :) انا كدة عقدتك من العربية :D :D

دور على حاجة نضيفة فابريكة دواخل بالكامل و معمولها صيانة كويس و انت حتنبصت بالعربية ان شاء الله

[Mik_t4]

وكمان بيقولو في حاجة اسمها فك الحظر بس بتدفع فلوس وتاخد انت العربية عادي

[Mik_t4]

اية يا جماعة هي الدنيا ضلمت فجاة لية
80 اية بس ياعم انا لسة بدرس
80 دي جاية معاقين ولا سوق عادي؟
طيب مش في دبانة 1600 كابريولية ولا لا ولو فية مش ممكن تدخل معاقين؟
ياريت تقيدو كشاف يا جماعة متضلموهاش كدا
انا في ناس عندي في بلدي جايبين عربيتين بالنظام دا بس واحدة جولف وواحدة دايو بس للاسف مليش تعامل معاهم وقلت اكيد هتفيدوني

[fahd_628]

وكمان بيقولو في حاجة اسمها فك الحظر بس بتدفع فلوس وتاخد انت العربية عادي

الكلام دة كان من كام سنة

دلوقتى ممنوع لازم 3 سنين او 5 مش فاكر

[MohamedGobran]

ما هو حضرتك فك الحظر يعنى تدفع باقى جمارك العربيه يعنى تمنها بيبقى زى العاديه

وموضوع البى ام ما هما بياخدوها من معاق و يخلوه يمضى على وصل امانه بتمن العربيه إلى هما دفعوه و لا بيعمل عقد بيع و لا اى حاجه و بيمشى بيها عادى و لما كان اى ظابط يوقفه كانت بتعدى بالكوسه زمان لكن دلوقتى معرفش بقى نظامها ايه لان قانونيا مينفعش اى حد يسوق عربيه معاقين غير صاحب العربيه المعاق نفسه

[MohamedGobran]

حظر بيع السيارات المعاقين 5 سنوات من تاريخ دخولها مصر

[Mik_t4]

ياااااااااااااا حلاااااااااااااااااااااوة
دا انا ماصدقت ان الفلوس ممكن تتوفر قريب وحاتط عيني عالموضوع دا
انتو حطمطو معنوياتي
انا مكنتش هجيب الا العربية دي سيدان او حتي فستان او شسية بس وكشافات
انتو كدا اديتوني ارقام مش ممكن تتحقق

[Mik_t4]

فرحوني كمان وكمان

[MohamedGobran]

ولا إحباط ولا حاجه دى مسأله سوء فهم ان حضرتك فهمت الموضوع كله غلط