لمبة الترس الي بتظهر جنب الغيار

[than387]

لمبة الترس الي جنب الغيار بتظهر والداء بتاع السياره مش مضبوط كأن في حاجه فالكهرباء بتنتش العربيه. كنت الاول بشيل الاطاش السالب واوصله تاني يختفي الترس والعربيه بتمشي كويس
ولكن الان مهما اشيل الكابل السالب واضعه مفيش فايده
مع العلم ان اخر حاجه عملتها في العربيه كان اني شيلت الكمبروسور بتاع التكييف والدينامو ووضعتهم تاني عند بتاع التكييف طبعا
الي عنده فكره عن المشكله او يعرف حد يحلها يا ريت يتفضل
سيارتي هي 318i 2004 هاي لاين
وشكرا

[Ghost2]

السلام عليكم

حضرتك بتحس ان الفتيس بيأخر في الغيارات .. يعني بيغير على rpm عالي .. لو كده يبقى الكونترول قاري حاجة اسمها تفويته على الفتيس وممكن يكون في ورق عايز يتغير .. وممكن يكون الفتيس عايز يغير كونترول ولما اللمبة دي تنور معاك هتحس ان الموتور صوته عالي لما تدوس بس مفيش سحب .. لو المشكلة في الكونترول هتغيره والمشكلة هتروح .. انما لو المشكلة في الفالف بادي او الورق يبقى حضرتك لازم تغير الفتيس لانك مهما صلحته المشكلة بترجع تاني وفي الحالة دي هتغير الفتيس .. بس انا عايزك تنزل عند حد عنده الكمبيوتر وتشيل الاخطاء من عليه و بعدين تجرب العربية على الدائري و لو ظهرت تاني هتروح لميكانيكي فتيس شاطر وتجرب كنترول تاني .. ولو اشتغل تمام خلاص ... ولو المشكلة رجعت يبقى تغير فتيس وخلاص .. لانك لو المشكلة في البادي فالف .. محدش هيفكلك بادي فالف من فتيس سليم .. يبقى هتجيب فتيس وتريح دماغك .. وخلي بالك .. انصحك ان الموضوع ده يتم في وقت قريب .. عشان الكونترول ميقراش اخطاء تانية وتقبل تحياتي

[farahat]

قال ما حضرتك تفكر في أي عيب لازم تكشف عليها عند حد عنده الجهاز عشان تحدد المشكلة فين بالظبط ، لأن المشكلة دي ممكن تكون حاجات كتير من أول حساس كرنك أو الفيشة بتاعته لحد لا قدر الله كونترول أو فتيس كامل .
يبقى الصح إن يتكشف عل العربية ويتحدد العطل الاول .

[BMW5260]

الكشششف أولاً وهو اللي هيحدد أي عطل

[maskeen]

طيب انا العلامه دى بتظهر عندى اول ما ادور العربيه ثم بتختفى بعد 10-15 ثانيه..ولكن لا تظهر اثناء القياده

انا قريت فى الكتالوج ان بعض العلامات التحذيريه تظهر بشكل مؤقت عند ادارة السياره حتى تمام المراجعه عليها ثم تختفى, هل ده معناه ان انا كده سليم ولا برضه فى مشكله؟

ايه الرعب والقرف ده, مالها ال كورولا والله كانت فله!!!

[pepsi007]

الجهاز هو الي هيحدد

[maskeen]

الجهاز هو الي هيحدد

طيب هى العلامه دى بتظهر عندك فى ال 523 اول الدواره وتختفى برضه ولا لا تظهر خالص؟

[pepsi007]

لا مش بتظهر بس كانت بتظهر في ٣١٨ موديل ٢٠٠٠ و شلتها بالجهاز

[than387]

على فكره انا نسيت اقولكم اني اول ما بدورالعربيه وعلى السلنسيه الار بي ام بيلعب فوق وتحت ده غير موضوع العلامه
وتقبلوا تحياتي

[than387]

على فكره انا نسيت اقولكم اني اول ما بدورالعربيه وعلى السلنسيه الار بي ام بيلعب فوق وتحت ده غير موضوع العلامه
علي فكره انا هروح اكشف ع الجهاز بس يا ريت تقلولي على افضل واحد ويكون كويس
وتقبلوا تحياتي

[than387]

السلام عليكم

حضرتك بتحس ان الفتيس بيأخر في الغيارات .. يعني بيغير على rpm عالي .. لو كده يبقى الكونترول قاري حاجة اسمها تفويته على الفتيس وممكن يكون في ورق عايز يتغير .. وممكن يكون الفتيس عايز يغير كونترول ولما اللمبة دي تنور معاك هتحس ان الموتور صوته عالي لما تدوس بس مفيش سحب .. لو المشكلة في الكونترول هتغيره والمشكلة هتروح .. انما لو المشكلة في الفالف بادي او الورق يبقى حضرتك لازم تغير الفتيس لانك مهما صلحته المشكلة بترجع تاني وفي الحالة دي هتغير الفتيس .. بس انا عايزك تنزل عند حد عنده الكمبيوتر وتشيل الاخطاء من عليه و بعدين تجرب العربية على الدائري و لو ظهرت تاني هتروح لميكانيكي فتيس شاطر وتجرب كنترول تاني .. ولو اشتغل تمام خلاص ... ولو المشكلة رجعت يبقى تغير فتيس وخلاص .. لانك لو المشكلة في البادي فالف .. محدش هيفكلك بادي فالف من فتيس سليم .. يبقى هتجيب فتيس وتريح دماغك .. وخلي بالك .. انصحك ان الموضوع ده يتم في وقت قريب .. عشان الكونترول ميقراش اخطاء تانية وتقبل تحياتي

هو بيغير عادي على ار بي ام عادي بس باداء مش كويس يعني مش سلنسيه
واحيانا وانا سايق العربيه تبطل
مش عارف انا كان عندي البطاريه بتنام باستمرار وبعملها توصيله هل هو ده الي عمل كده
انا غيرتها وما زالت نفس المشكله

[Ghost2]

العربية كده محتاجة كشف كمبيوتر .. وتقيس البطارية بالافو ميتر عشان تشوف شحن اليطارية .. وشحن الدينامو ,, والار بي ام بيعلى ويوطى دي مكن تشوف البوابة وحساس التي بي اس

[than387]

العربية كده محتاجة كشف كمبيوتر .. وتقيس البطارية بالافو ميتر عشان تشوف شحن اليطارية .. وشحن الدينامو ,, والار بي ام بيعلى ويوطى دي مكن تشوف البوابة وحساس التي بي اس

فين

[Ghost2]

شغل الكمبيوتر والكهربا انا بعمله عند واحد اسمه عصام منصور في الحرفيين في شارع كده ورا مجدي البيومي بس شاطر اوي .. و في حازم الشربيني كمبيوتر ... بس عصام دو كويس روحلة

[farahat]

على فكره انا نسيت اقولكم اني اول ما بدورالعربيه وعلى السلنسيه الار بي ام بيلعب فوق وتحت ده غير موضوع العلامه
علي فكره انا هروح اكشف ع الجهاز بس يا ريت تقلولي على افضل واحد ويكون كويس
وتقبلوا تحياتي

كدة الأعراض إلي حضرتك بتتكلم عليها دي كلها بتروح ناحية حساس الكرنك مش مشكلة في الفتيس ، إكشف ون شاء الله تطلع كدة بس ، ودي حاجة بسيطة .
سعره جديد حوالي 600 جنيه وإستيراد بيعمل 150 -200 ، بس ما أنصحش في ده بالإستيراد .