ممكن مواصفات وكماليات العربية دي وقت ما نزلت؟

[Mik_t4]

شباب انا عايز اعرف مواصفات bmw e30 وقت ما نزلت كماليات وانظمة الفرامل وكدا
اتمني حد يفيدني في الموضوع دا

[samehelrewesh]

معلش ياعنى اييه كماليات العربية وقت ما نزلت
ما العربية مثلا نازلة باور وسنتر وازاز كهربا وفاتحة سقف وتكييف
ايه الفرق بين وقت ما نزلت ودلوقت ؟

[mailo]

هو عايز يعرف الكلام اللي إنت قلته ده
عشان يبقى عارف العربية لما حد يقول له مثلا مرايات كهربة يبقى عارف هي كده ولا متركبلها المراية

[Mik_t4]

انا عايز اعرف وقت مانزلت هل كان فيها سنتر واي بي اس وباور والحجات دي لكن التكييف والكاسيت دا معروف
عايز الحجات المهم دي

[fouaa]

متابع

[samehelrewesh]

فى مرايات كهربا
سنتر( شامل شنطة وغطا التانك)
باور
زجاج كهربا ( فى عربيات ازاز عادى )
فتحة سقف ( فى عربيات مفيهاش - فى عربيات بتكون يدوى وفى كهرباء)
تكييف
كمبيوتر اعطال ( بيكون راكب فى السقف ) موجود فى بعض العربيات
ال ABS بقى فى ناس بتقولى انه نزل فى موديل E30 موديل 91 بس احنا عندنا اخرها موديل 90 فى مصر
بس الكلام دا كله ياباشا هيعتمد على الموديل اللى انت بتتكلم عليه
ياعنى مثلا انا معايا عربيتى موديل 89 318 مانيوال تكييف سنتر مفيهاش باور ولا ازاز كهربا
صحبى معاه عربية موديل 88 بس 320 تكييف فاتحة سقف كهربا ازاز كهربا كمبيوتر كشف اعطال مرايات كهربا باور
وواحد تانى معاه عربية موديل 90 316 فاتحة سقف عادية مش كهربا مفيهاش باور ازاز كهربا سنتر تكييف
هى البى ام على طول بتنزل فئات ترضى بيها الناس كلها
زيى مثلا ال e46 كدة فى منها البيز لاين وفى الهاى لاين هتلاقى نفس الشكل بس فرق كماليات

[Ahmed Selim]

الكماليات مختلفة بشكل كبير.

يعنى أنا كان معايا واحدة مفيهاش أى حاجة.....و لا حتى إزاز كهرباء و باور.....مكنش فيها غير مرايات كهرباء بس.

و ركبت واحدة موديل 89 أو 90 مش فاكر كانت 325 أصلى كان فيها abs و كميبوتر أعطال و كل حاجة.

[Mik_t4]

متشكر جدا يا شباب ردود مفيدة جدا
انا بس معلش عايز استفيد منكم اكتر

ياريت الي كان معاة عربية زي دي يقولي اهم حاجة لاحظها فيها وعيوبها قبل مميزاتها وكمان وهو بيشتريها ركز علي اية وشاف اية لان انا اعرف نظري بس مشترتش عربية قبل كدا
اتمني تفيدوني في الموضوع دا

[samehelrewesh]

ياريت الي كان معاة عربية زي دي يقولي اهم حاجة لاحظها فيها وعيوبها قبل مميزاتها وكمان وهو بيشتريها ركز علي اية وشاف اية لان انا اعرف نظري بس مشترتش عربية قبل كدا
اتمني تفيدوني في الموضوع دا

أهم حاجة فيها الشاسييييييييييه
اى حاجة تانية مقدور عليها
لو متور بايظ سهل يتغير لو فرش متهان سهل يتظبط عفشة مفيش اسهل من كدة
كل دا مقدور عليه ف العربية دى انما اهم حاجة الشاسيه
وتركز قدام تحت علبه الفيوزات وتحت البطارية وعلبتين الشاسيه اللى ورا العجل عشان هى لو عليها متور كبير وبيتلعب بيها بتشرخ من الاماكن دى والشاسيه من جنب التانك ( بس دا لو مكنة من اول 2500)

[Mik_t4]

متشكر جدا علي الرد
بس لالالالالالالا ياعم انا عمري ما هجيب واحدة 2500 دي تخرب بيتي ضرايب وبنزين
انا عايز واحدة 1800 مثلا او 2000 عشان ضرايبها متبقاش كتير
الا هي ضرايبها بتتحسب ازاي واد اية؟
ومعلش اية هما العلبتين الي ورا الحجل قصدك الشنطة؟؟؟

[Mik_t4]

ومعلش استقسار كمان
لو عايز جبتها كوبية وعايز اخليها شكل الي في توقيعي كدا تتكلف كام؟؟؟

[gomgoma22]

أهم حاجة فيها الشاسييييييييييه
اى حاجة تانية مقدور عليها
لو متور بايظ سهل يتغير لو فرش متهان سهل يتظبط عفشة مفيش اسهل من كدة
كل دا مقدور عليه ف العربية دى انما اهم حاجة الشاسيه
وتركز قدام تحت علبه الفيوزات وتحت البطارية وعلبتين الشاسيه اللى ورا العجل عشان هى لو عليها متور كبير وبيتلعب بيها بتشرخ من الاماكن دى والشاسيه من جنب التانك ( بس دا لو مكنة من اول 2500)

الله يفتح عليك --- انت جبت الخلاصه

[samehelrewesh]

الا هي ضرايبها بتتحسب ازاي واد اية؟
ومعلش اية هما العلبتين الي ورا الحجل قصدك الشنطة؟؟؟

الضريبة بتتحسب على السعة اللترية بتاعت المتور
بص انا ضريبة ال 1800 معايا حوال 375 تقريبا ف السنة
( نفسى افهم لزمة الضريبة دى ايه من اول ماركبت عربيات والله مش لاقيلها لازمة مش كفاية المخالفات )
لا علبتين الشاسه اللى انا اقصدهم دول قدام لما تلف العجل شمال او يمين هتشوفهم عادى لو حد فاهم فيها هيعرف اذا كان فيها حاجة ولا لا
اللى ورا دا بقى بيبقى جنب التنك

اسعار الكوبية بقى انت وحظك وحالة وموديل العربية ممكن تجيب حاجة ب 25 وممكن تجيب حاجة ب 40 انت وشطارتك
عشان تخليها الشكل بتاع Randdy دا هيبقى بردة حسب بتاع الفيبر اللى بتتعامل معاه فى واحد ممكن يعمله ب 1500 وواحد ب2500 و واحد ب 3000 كدة ياعنى
بس نصيحة لوجه الله بلاش الفيبر دا ف مصر عشان
1- مفيش ضمير فى التركيب والخامات
2- مش بيستحمل مطبات مصر
3- لو واحد ريح عليك وهو بيركن بوظلك الدنيا

بجد العربية وهى استوك وتركب عليها الجنط الجميل والفرش اللذيذ كدة هتبقى تمااااااااام اوى
وطبعا دا مجرد رأيى مش اكتر وانت ليك ذوئك بردة

[Mik_t4]

باشا شكرا علي المعلومات
بس ياتري ضرايب الموتور ال 2000 هتبق كام
وهل الاكصدامات الي في توقيعي فايبر ؟

[E30power]

الاكصدام الى فى توقيعك يبتباع ب 350 الكساحة بس من غير الفوجات كامل ب 750 يعنى الاكصدام كام بالفوجات بالكساحة ..لسة سائل علية عند واحد اسمة الاصيل فى الحرفيين .....طبعا استيراد

عموما ال e30 الى يبينهالك السمكرة والرش هتطلع ببساطة زى الصورة دية ...