الي خبرا e36 كوبية

[maruti]

انا اودامي e36 كوبية فابريكة برا وجوة حالتها ممتازة جدا بس يصراحة نسيت اسئل موديل كام من كتر ما هيا عجبتني
فا احب اعرف قطع الغيار بتاعتها اخبرها اية موتوفرا ولا لا وغليا ؟
وبعد كل دا تمنها كام علشان صاحبها عارضها ب 100 الف فا عايز اعرف سعرها كدا مناسب ولا لا ؟
وشكرا جداااااا ليكم

[fahd_628]

............................

[fahd_628]

بص يا باشا انا لسة جايب اختها بنفس الحالة ب 94,000 الف

كانت حالتها ممتازة جدا و ستوك 100 % مفيهاش 1 % لعب حتى الكاسيت و السماعات بتوعها و كان فيها جنط بتاعها 16" و كاوتش جديد و بطارية جديدة و صيانة توكيل و طقم دبرياج جديد من التوكيل

فا انت شوف و قيس كدة بس انا رأى 100 الف تنزل شوية

انا قدام عينى واحدة اتباعت على 90 برضة بس كانت راشة سدر و مش فابريكة من برة و ملعوب فيها كتيير
فا بص هى ملهاش سعر محدد لأنها نادرة و الحالة منها مش كتيير و معظم الى راكبينها شباب و بيهينوها طبعا و يسقطو مواتير و كدة

المهم

بص علشان تكشف كويس

اول حاجة تبص عليها هي رقم الشاسية حتلاقية تحت الزجاج عند فبرة الطوربيدو ناحية الشمال لو انت باصص لوش العربية

تكتبة عندك بالزات اخر 7 حتلاقيهم حرفين و 5 ارقام دول اهم حاجة و غالبا حتلاقيهم JG لو كلة سليم و تخش على موقع http://www.bmw-z1.com/VIN/VINdecode-e.cgi حيجيبلك كل حاجة عن العربية

بعد كدة تبص ناحية الرفر من جوة نفس الناحية ( الشمال لو انت باصص قدام العربية ) حتلاقى المفروض Plate مكتوب فيها ال VIN ال 14 رقم دول تقارنهم بالى موجودين تحت الفبرة

بعد تدخل العربية و تشيل المفتاح و تخليك دايس على الزرار بتاع ال RESET لل TRIP حتلاقيه نور
دور المفتاح تكة واحدة و سيب حتلافية دخل فى كان حاجة كدة

رقم 4 لازم تلاقى نفس اخر 5 ارقام فى رقم شاسية العربية !

تمام كدة

بعد كدة تروح على الكنبة الخلفية

ترفعها لفوق علشان تشيلها حتطلع معاك بس انت ارفعها من على الأطراف ! سهلة مفيهاش حاجة

لازم حتلاقى ورقة كدة بيضاء فيها كل بيانات العربية و خرجت امتى من المصنع و الساعة كام و حتلاقى ال 14 رقم تأكد ان كلهم واحد !!!! و حتلاقى كام رقم كدة الأرقام دية خليها عندك علشان تتأكد لما تروح البيت قبل ما تشترى ( حتلاقيها تحت فى اخر الورقة ) دول ال Options الى نزلو للعربية دية بالتحديد يعنى حتلاقى 0214 مثلا يعنى تكييف ( الرقم مش صحيح بس نفس الفورم كدة ) تعرف الأكواد دية من على النت علشان تعرف هوة لاعب فى اية فى العربية او مركب اية زيادة من عندة علشان فية عربية مبتنزلش بتكييف مثلا و تلاقيها فيها تكييف

بعد كدة تروح على سمكرة و بوهيجى يقولك العربية دية اساسياتها سليمة ولا لأ لأنك عمرك ما حتعرف بالنظر كدة الا لو كنت خبير و خلية يكشف كويس لو فية بارومة ولا حاجة بالزات فى العتب و الرفارف قدام و ورا

بعدين قولى العربية كانت بفتحة سقف و تكييف ولا لأ ؟؟؟؟ نصيحة متجيبش عربية كوبية منغير فتحة سقف لأنها بتبقى مش مرغوبة اوى لبعض الناس ( انا الصراحة لو مكنش فيها فتحة سقف مكنتش حشترى )

و التكييف كان تاتش ولا لأ

و الشبكة من قدام القديمة ولا الجديدة

دية القديمة

http://images.paultan.org/images/BMW_E36_M3_8.jpg

و دية الجديدة

BMW E36 318is | Flickr - Photo Sharing!

و هل العربية فيها 1 ولا 2 ايرباج ؟؟؟

جاوبنى على كل الأسئلة دية علشان اعرف الكلام ماشى مع بعضة ولا لأ ! و ياسلام لو تكلم الراجل و تعرف موديل كام :)

و لو تعرف موديل كام يبقى تمام اوى

و اخيرا تبقى مكتوبة كوبية فى الرخصة علشان ساعات بيعملو مشاكل بس دية ممكن تبقى تعملها بعدين مش مشكلة تقريبا والله اعلم انا كنت واخدها مكتوبة كوبية فى الرخصة

انا طولت عليك بس عاوز افيدك لأقصى درجة والله :)

بالنسبة لقطع الغيار فا الفوانيس الأمامية و الشبكة و الأكصدامات و التابلوة و الكنصول و الدريكسيون و عصاية الفتيس و الهاندبريك و جميع الأجزاء الميكانيكية واحدة

غير كدة مختلفة

يعنى فوانيس الأشارة مختلفة و الكابوت و الرفارف الأمامية و الخلفية و الشنطة و الفوانيس الخلفية و الزجاج كلة مختلف و الكراسى طبعا الأمامية و الخلفية و فرش البيبان

بس الحاجات دية انا لاقيتها موجودة يعنى مش حتغلب متقلقش بس اكيد مش زى السيدان

و فى الأخر متجيبش العربية دية الا لو كنت بتحيبها و عاوزها لأنها مش سهلة فى البيع زى السيدان علشان سعرها بس صدقنى لو بتحبها حتنبسط بيها جدا جدا جدا جدا جدا

و فية حاجات لو غلبت فيها تجيبها من التوكيل عادى جدا بتجيلك بالطلب فى خلال 15 -> 45 يوم حسب الحجم و الأسعار مش هبلة يعنى الأسعار غالية شوية بس بتجب الحاجة جديدة اصلية

اخر حاجة لو العربية 1600 متتوقعش انها حتجرى طيارة يعنى :) يعنى الفيرنا تطلع منها مثلا :) بس هية جريها ممتاز بالنسبة لأنها عربية قديمة نسبيا و الموتور اكيد مشى كتيير و توكنولوجيا قديمة نسبيا

بس هية بتطلع من عربيات كتيير زى الميجان و الجيتا و الأوكتافيها دول الى جربت معاهم

السيراتو ثبت معاة فترة و بعدين فرق عنى حاجة بسيطة

و لو عاوز اى استفسار اتفضل انا تحت امرك

[maruti]

بجد يا باشا الف الف الف شكر ليييك ولتعبك
بس للاسف اتصلت بصاحب العربية علشان اكشف عليها صدمني والي انو بعها :( يلا ربنا يبارك الي اشتراها
وشكرا تاني لمجهودك يا باشا

[Mik_t4]

معلش خيرها في غيرها